حادثة التونسي والمطب الجديد علي الكوبري

**al_manara** · 26-06-2010 03:48 AM

المشاركة الأصلية كتبت بواسطة adel_2346

يا جدعان ازاى مطب على كوبرى ايه العبقريه دى

كنت قريت في الاخبار ان اللجنة الهندسية اوصت بعمل المطب عشان العربيات الي ماشية بسرعة تهدي سرعتها لانة دة خطر حاليا علي الكوبري لانة معرض للانهيار . ومنعوا العربيات النقل تعدي من علية الي ان يتم صلاحة

**kemoelord** · 26-06-2010 04:03 PM

وايه الجديد يعني , الحكومة هتفضل منتظره حدوث الحوادث والكوارث والمصائب كده للابد سواء بالنسبة لكباري او مناطق عشوائيه او طرق غير صالحه للاستخدام الادمي او ماء شرب مصدره من صرف صحي وغيره وغيره , يعني الي خلى اهم كوبري في جمهوريه مصر العربيه يا بيتم فيه اعمال صيانه ولا يحزنون وحصله بالفعل " هبوط " وعطل الدنيا وبقت كارثه وانا شخصيا كنت هلبس على الكوبري في اليوم ده لولا ان مكالمة تليفونيه حذرتني منه , الاهمال في كل حته زي السرطان

**ihabchina** · 27-06-2010 02:32 PM

احنا لحد اليوم بناعى مش عارفين نروح شغلنا ولا عارفين نروح بليل وحاجة وحشة خالص بصراحة
بنحاول نهرب طول الاسبوع اللى فات عن طريق الدائرى وقرفة او طلعة المقطم من عند السلاب والنزول نزلة الاوتستراد اللى قبل كوبرى الدويقة
والنهاردة برضة مع بداية الاسبوع نفس الحوار وشكل الموضوع هيطول ومفيش حل

**Survival** · 27-06-2010 07:04 PM

لا حول ولا قوة الا بالله
انا بحزن لما بيحصل الحوادث دى فى بلدى
الكوبرى ده كارثة و معروف لكل اللى بيمشي على الطريق ده و عمرى ما هنسى انى كنت هموت عليه
كنت بنقل حاجات لشقتى و كان معايا اتنين و الساعة كانت حوالى 9 ونص بالليل. طبعا انا عارف مكان مطبات الهوا دى كويس لانى اخدتها قبل كده. المهم فى التلت الاخير من الكوبرى اخدت اليمين و كنت ماشي حوالى 60 كم/س و و على اخر الكوبرى اسمع احلى فرمله جايه من ورايا و الحمد لله ان مكنش فى حد على شمالى والله معرف ازاى بصيت فالمراية اليمين و ونقلت للحارة الشمال و لاقيت العربية اللى بتفرمل بقيت جنبى على اليمين و وشها فى نص عربيتى. واللى كان سايق شاب و جنبه طفل صغير.
و من ساعتها و انا مش بزود على 80 كم/س باى حال من الاحوال سواء على الاتوستراد او الكورنيش حتى لو ماشي لوحدى فالطريق
للأسف مشكلة مصر مش حكومة او مسئوليين انما هى فى وجهة نظرى مشكلة ثقافة عامة مبنية على الجهل الشديد
طول عمرى بسأل هى الحكومة دى شعب جه احتلنا من بره؟!!!!!!!!!!!! وبيعمل فينا كده ليه؟