الموضوع: الفيوزات اللي طلعت عيني ... ارجو المساعده

المشاركة الأصلية كتبت بواسطة triton

السلام عليكم


من كام يوم العربيه مكانتش عايزه تنطق ... المهم طلع فيوز الدوراه و الراجل راح مشعره لان مكانش موجود فيوزات نضيفه بتتباع عندي في منطقتنا

المهم الموضوع حصل تاني والعربيه عطلانه فانا عايز اغير كل الفيوزات بنوع نضيف واخلص لاني زهقت


اجيب الفيوزات منين و اعرف ازاي كانت عندي مشكله في الكهربا بتعمل كده في الفيوزات ؟؟؟؟

اللى فهمته من كلمة فيوز الدوارة إنه فيوز الكابل الموجب بتاع البطارية و ده يعتبر الفيوز العمومى للعربية.


لو ده ضرب يبقى إحتمال كبير يكون فيه مشكلة كبيرة لأن ده أمبيره عالى فكونه يضرب يبقى لازم قبل تغييره أو تشعيره يتراجع كويس على كهربه العربية و حاول تشغل كل الكهرباء اللى فى العربية مع بعض (يعنى جميع الكشافات و كشافات الصالون و الكاسيت و المساحات و التكييف و مروحته على السرعة القصوى ومروحة الموتور و....) و حد يقيس الأمبير الخارج من الدينامو كام علشان يتأكد إن الأمبير فى الحدود المسموح بيها...

مش مشكلة نوع الفيوز...المهم تحط القيمة الأمبيرية المظبوطة تمام زى المكتوب عليه ( و لا زيادة و لا نقص ) القيمة بتكون مكتوبة على الفيوز نفسه و على المكان اللى هيتركب فيه مثال (8a) يعنى الفيوز ده 8 أمبير و هكذا....

تراجع الكهرباء كويس جدا و بعدين تتأكد إن كل الفيوزات محطوطة بقيمها المظبوطة و بلاش تشعر أبدا لحسن تطيرلك حاجة تكون مكلفة جدا لا قدر الله...

خد بالك المفروض الفيوز يضرب علشان الأمبير زاد و ده معناه فى الكهرباء حاجة بتعمل قفلة...يعنى ممكن حاجة بتلمس أو بتشرز أو بتقفش مع السخونية فبتعلى الأمبير جدا و الفيوز يضرب...الصعوبة إنك تجد الحاجة اللى عاملة المشكلة و بعدين تغيير الفيوزات ده سهل جدا و إن شاء الله العربية تضبط معاك...

المفروض الفيوزات تلاقيها عند بتوع قطع غيار رينو....لو مش موجودة ممكن تجرب بتوع الإلكترونيات زى النخيلى و الرويعى و ما شابه...فيوز العربية بيبقى 12 فولت و الأمبير مختلف على حسب متوصل بإيه.....

المشاركة الأصلية كتبت بواسطة acoal

مشكور للرد والافاده انا كنت عايز اتاكد من علاقه جوده الفيوزات وعمرها الافتراضى يعنى انا لو جبت فيوز اغلى شويه هيدينى نتايج ادق بمعنى لو ركبت فيوز نضيف ومضربشى معنى كده ان العربيه تمام ؟ لو ضرب معنى كده ان العربيه فيها مشكله ولا الفيوز الرخيص اللى ميكملشى 35 قرش ممكن يدينى نتايج امشى وراها ؟

المفروض الفيوز مش تكنولوجيا عاليه أو حاجة....الأنواع المنتشرة فى العربيات دلوقتى أسمها blade fuses أو بنسميها بالعربى فيوزات شوكة....مش الأنبوبة الزجاج اللى بقت أقل إنتشارا فى العربيات الحديثة....

طبعا فيه نسبة خطاء فى قيمة الفيوز مهما كان نوعه لكنها قليلة جدا فى الأنواع النظيفة...المفروض سعر الفيوز بالطبيعى يكون رخيص جدا....

فكرته عبارة عن سلك أو شريحة معدنية بتنصهر و تقطع الدايرة الكهربية لو التيار زاد عن القيمة المكتوبه عليها...طبعا مرور التيارفى الموصلات بيصاحبه طاقة حرارية تزداد طرديا مع قيمته...

لو أنا حاطط لحضرتك فيوز 8 أمبير فى فانوس الإضاءة مثلا...مش معنى كده إنه المفروض يشتغل عند 8 أمبير..لكن بيكون مثلا شغال عند 6 أمبير و بزود 2 أمبير safety لو التيار على لأى حاجة غير طبيعية...لكن لو عدى ال8 أمبير يبقى فى شىء غير طبيعى فى الفانوس(قفلة أو تلميسه أو...) و ده لازم يتعالج الأول و بعدين نحط الفيوز ال8 أمبير تانى...أما لو حضرتك شعرت... فعليا الفانوس هينور لكن التيار معدى ال8 أمبير فده هيأثر على شىء أخر زى سخونية و سيحان فى سلوك الضفيرة أو دويل اللمبة أو ترامل و سوكتات السلوك و قصر العمر الإفتراضى للمبة و هكذا...و كل ده علشان معلجناش العيب قبل التغيير....

طبعا فيه ناس بتفتى أكتر و تقوم علشان متشعرش و تبقى بتشتغل نظيف تقوم رفعة قيمة الفيوز و حطة مثلا 15 أمبير علشان تريح نفسها و متوريش للزبون إنها بتعمل شغل بلدى و تشعر أو علشان تطلب تمن للفيوز...طبعا نفس المشاكل السابق ذكرها...

المفروض الأمان اللى إحنا سيبينه (2أمبير) فى المثال السابق يعوض نسبة الخطاء البسيطة الموجودة فى الفيوز إلا لو حضرتك بقى بتتكلم عن فيوز تحت السلم...فى الحالة دى هيضرب على طول....