الموضوع: اللي متضايق منها يتفضل يمشي بسلام

المشاركة الأصلية كتبت بواسطة nabaster

احمد بيه سامي

الله يرحم والدك ويسكنه فسيح جناته والاعمار بيد الله واكيد ده اجل والد حضرتك

يمكن مدخلناش في مناقشات كتير قبل كده

بس حضرتك من الناس القلائل الي بحترم وجهة نظرهم وكلامهم بيدخل دماغي

بس برضه ميمنعش اني اختلف معاك شويه في وجهات النظر

حضرتك احنا شعب فيه جميع مقومات النجاح وعندنا عنصر بشري يقوم تلات جمهوريات مش جمهوريه واحده بس

في عضو قال في مشاركه قبل كده ان البرازيل (تقريبا) كانت في جهل وكساد ومرض وفي خلال فتره قليله بقيت من الدول الكبيره الغنيه

طيب الناس دي احسن مننا في ايه؟؟

حضرتك قلت بنفسك ان التغيير ممكن بس هنتعب علشان تغير واحد او اتنين من مقومات الفساد والجهل والفقر

طيب هوا واحد بس هوا الي هيغيير؟؟؟

معاك ان ده مستحيل

يبقي دلوقت الاحسن نغير طريقة التفكير

يبقي ندور الاول علي القائد الي يساعدنا علي التغيير ده

والقائد ده هوا الي هيكسر الدايره وهوا الي هيرتبها

بس لازم نتعب شويه ونبقي مستعدين للتغيير

لان القائد ده مش من يوم وليله هيجيلك لحد عندك وتصبح تلاقيه

القائد محتاجلك علشان يبقي قائد

يعني انتا الي هتدور عليه وتجيبه

حضرتك وصلك بقي ايه الي ناقصنا (كبدايه) ؟؟؟؟

بالمناسبه انا من الناس الي عايزه تسيب البلد انهارده قبل بكره

بس البلد دي ليها فضل عليا

اينعم شايف فيها مرمطه كل يوم

بس اكيد مش هنشوف في يوم من الايام اعلان في الوسيط عن حد عايز يبيع وطن او جنسيه

a.yakout

كلامك سليم يا ياقوت
بس برضه فكرة ايجاد أو خلق او استجلاب قيادة جديدة

تندرج تحت ضغط المآسي الثلاثة

في من الفساد ما يمنع رجل ان يداعب حلم القيادة

و في من الجهل ما يحجب عن الكثيرين كيف يجب ان تكون حياتهم و هم اسياد الناس

ومن الفقر ما يخيف الغالبية من فقد قوتها يوم يسقط البديل


احنا عشنا كتير في ذل لدرجة انه طبع على شخصياتنا

مجرد فرحة واحد على معاملة حسنة مش شرطي مرور في بلد اجنبي ده معناه ان عندنا ندبات في وجه شخصيتنا

و الوجه المشوه لا يبتسم بسهوله يا صديقي

وخصوصا لو كان في يوم

أوسم الوجوه



و اخيرا انا فعلا باتشرف بالحوار معاك لأن المشاعر متبادلة

الاستاذ esam_comm انا رديت عامه لو حالتك خاصه ديه راجعه ان ربنا رحمك من اللى بيشوفوا المصريين بالخارج
يعنى حضرتك فى الخارج و مستريح و شركتك مصريه و عاجباك البلد!! فى راى حضرتك هل هذا الطبيعى و المتداول بين الناس
عشان كده انا فى ردى قلت انه مش موجه لحضرتك بالذات
على العموم طبعا مش المقصود ان تشتم فى البلد و الحكايه مش شتيمه فى البلد الموضوع ابعاده اعمق من كده

وكون حضرتك مسافر تعمل ايه بجد مش من اختصاصى الفكره ان حضرتك مسافر هناك اكيد عشان فلوس (يعنى اكيد طبيعه قطر الساحره مش هيه السبب) اللى يهمنى ان حضرتك مشيت من البلد عشان الفلوس و مش عجبك اللى بينقد البلد!! ده اللى يهمنى

و اللى انا قلته نابع من كل واحد سافر يعمل فلوس و رجع يقول مصر مش عارف ايه و هيه امى و كل ده و بعدين يقعد يتكلم عن ازاى المرور وازاى الخدمات و اكم واكم و فى الاخر يكسر الاشاره و يقف مكان غيره فى الطابور

ده رايى برضه و ده رد عشان حضرتك متخيل ان اللى بينقد البلد متجنى عليها!


لما الناس تشوف مافيش مشكله او ان المشكله بسيطه فى الوقت الراهن يبقى عمرنا ما هننفع عشان الناس مش شايفه المصيبه اللى احنا فيها

مصر لا تملك مقومات دوله و الفساد و النفاق فى كل مكان يستطيع ان يستوعب اى تغيير يطالب به الناس لازم صدمه كبيره تحصل توحد الناس لازم شريحه عريضه من الناس تؤمن باللتغيير عشان تقود المجتمع احنا ماعندناش الشريحه ديه
و اى حد بيفكر بمنطق ماحنا اجسن من غيرنا يبقى ده مسمار فى الوطن من اجل ثبات الحال الى التدهور المستمر

الخوف من التغيير هيودينا فى داهيه

و اخيرا
لعمرى ما ضاقت الاوطان برجالها.....أنما بأحلام الرجال تضيق

المشاركة الأصلية كتبت بواسطة ahmed anwer

لا مؤاخذة محسسني ،،، إن أمريكا و أوروبا بيتخانقوا عليكم !!!!!!

ده اللي عايز يهاجر ،،، بيبيع هدومه و يعمل عجين الفلاحة و يمكن آه و يمكن لأ !!!!

و ساعات نوم العازب يا هندسة

المشاركة الأصلية كتبت بواسطة esam_comm

حاول تقرأ اللي انت كاتبه المفروض انه رد عليا او علي وجهه نظري بس حط نفسك مكاني وشوف هاتضايق ولا لاء من كل الكلام اللي مكتوب والمفروض انه لشخص ماتعرفهوش انا مش عارف ارد اقول لحضرتك ايه بس ممكن حد تاني كان يرد عليك رد مش كويس بس دي مش طبيعتي
تاني حاجه انا بشتغل في فرع شركتي المصريه في قطر وقبله كنت بتنقل من محافظه لمحافظه تاني داخل مصر يعني انا مش تحت كفيل والكلام ده وبعدين كون اني اسافر احوش فلوس اصرفها دي حاجه تخصني ماتخصش حد تاني وانا اعرف اتصرف وافكر لنفسي كويس شكرا لحضرتك ووفر النصايح لحد يكون محتاجها وانا مش هارد في الموضوع ده تاني واوعدك لما الاقي حد بيشتم علي مصر والمصريين وبيقول انهم متخلفين هابقي اشتم عليها علشان مابقاش عايش في وادي والناس عايشه في وادي تاني وشكرا

والله ماحدش يقصد يهاجم حضرتك لأن فعلا الناس وصلوا لمرحلة من الخنقة والاحتقان لا يعلمها إلا الله وأنا متفق جدا مع حضرتك على حب الوطن وإنه جزء من فطرة الإنسان بل هو جزء من الدين ، وأيضا متفق مع حضرتك إن كل بلد في الدنيا فيها سلبيات وإيجابيات ومصر أيضا تعتبر كبلد زي أي بلد تانية فيها سلبيات وإيجابيات، لكن ايه شكل السلبيات دي؟ وهل سلبيات ممكن نتعايش معاها ولا مش ممكن؟
لو حضرتك تعرضت للمواقف الآتية حضرتك ممكن تغير وجهة نظرك:
1. تخيل لو حضرتك سايق عربيتك في شارع أول مرة تخشه ومافيهوش ولا يافطة ويطلعلك واحد بيقولك انت ماشي عكسي ويسجلك مخالفة أو تخلص نفسك بإنك تديله اللي فيه النصيب
2. تخيل لو أي مشوار في أي مصلحة حكومية لازم يلففوك كعب داير مع إن الموضوع سهل وممكن يخلص بكل سهولة
3. تخيل علشان تعمل أي ورقة في أي مصلحة حكومية لازم تدفع المعلوم علشان ورقك يمشي ولو مادفعتش خليك مستني.
4. تخيل لو حضرتك شاب في مقتبل حياته وعايز يجيب شقة بدون الاعتماد على أهله شوف هتاخد قد ايه وقت علشان تكون نفسك.
5. شوف المرتبات في مصر عاملة ازاي وشوف الأسعار عاملة ازاي؟ تخيل حضرتك كيلو اللحمة يوصل 60 جنية بل وفي حتت تانية يوصل 80 جنيه
6. تخيل حضرتك بتفتح الجورنال أو أي موقع إخباري مصري وتشوف كوارث كل يوم. وكل يوم بتلاقيه أسوأ من اللي قبله
7. حضرتك سمعت عن قصة الشاب خالد محمد سعيد؟ تخيل لو كان ده ابن حضرتك
8. هل تجولت في شوارع القاهرة وشفت التلوث البشع والزحام الرهيب كل يوم؟ شفت العشوائيات اللي في مصر؟
9. شفت شوارع مصر عاملة ازاي من بلاعات ومطبات وحفر وعيون قطط؟ شفت كمية الحوادث اللي بتحصل يوميا من الشوارع دي؟
10. تخيل حضرتك البلد بتتنهب قدام عنيك وانت لا حول لك ولا قوة.
11. تخيل التزوير بيحصل قدامك عيني عينك وماتقدرش تعمل حاجة.
12. تخيل لو حتة أمين شرطة (مع احترامي لجميع أمناء الشرطة المحترمين) ماعهوش اعدادية ويهزءك ويقولك أنا ممكن أحبسك؟
13. لو حضرتك نزلت شرم الشيخ ولا الغردقة ولا الأماكن دي شوف المصريين هناك بيتعاملوا ازاي والأجانب بيتعاملوا ازاي.
14. تخيل حضرتك بتشرب المياه وعارف إنها ملوثة وبتاكل الأكل وعارف ان هو ملوث.

خلاص مش قادر أكمل خلاص. هل حضرتك ممكن تتخيل البني آدم العادي يستحمل الكلام ده؟

المشاركة الأصلية كتبت بواسطة ahmed samy

ومين قاللك اننا هانتغير علشان نفكر ازاي

دي حلقة مفرغة من الجهل (بكل أنواعه) و الفقر و الفساد

لو بدأت بأي واحد الاتنين التانيين هايخلصوا على مجهودك

ما ينفعش تعلم واحد و انت ممعاكش فلوس تعلمه و الفساد مش هايديك فلوس ولا فرصه

و ما ينفعش تقضي على الفساد لأن ما فيش متنورين كفاية ولا ذمم و جيوب شبعانة تقدر تستغنى عن الفساد اللي فاتح بيوت البعض و مديهم الحد الأدني من الحياة و هم بيخدموا الحرامية الكبار

و ما ينفعش طبعا تقضي على الفقر أول واحد لأن الفساد هاياكلك

انسى يا ياقوت

لازم الدايرة تتكسر و تتبعتر و تتعمل من الأول

وده نريا مستحيل لأن في الدايرة مربوط 80 مليون بني ادم مابين فاسد و جاهل و فقير وفي بعض الحلقات المنورة ما بتقدرش تندمج في الدايرة ولو حاولت توقفها ...بتتفعص

فبتضطر تخلع من الدوران لحتة تانية

و دول يتقال عليهم خونة و غير وطنيين

لازم علشان تنال لقب وطني انك تكون "شهيد الوطن"

+11111111111111111111

بس إن شاء الله هتتغير من عنده. دوام الحال من المحال

مش هاقولك غير "مصر بلد الفساد"...شوف انت بقى هاتقول ايه وانت شايف كل حاجة حواليك فساد فى فساد والسيئات اكتر من الحسنات بكتييييير