الموضوع: استكمالا لمسلسل النحس

ازيكم ياوحوش معلش انا اسف على التاخير بس اصلى مزنوق على الاخر فى مشروع التخرج ادعولى بالتوفيق
المهم امبارح كان المفروض انهم يكلمونى يقولوى اجى امتى علشان استلم العربية ولما لقيت الساعة بقت 11 ومحدش كلمنى قلت اطب انا عليهم علشان شكلهم كدة سقطونى وكبروا دماغهم منى
وفعلا نزلت من البيت على 11ونصف وكنت فى توكيل العامرية تقريبا كدة على 11ونصف اول لما دخلت لقيت الانسة اللى استلمت منى العربية سلمت عليها وقلتيلها اية اخبار العربية قلتلى ارتاح شوية فى استراحة العملاء وانا هدخل الورشة اشوفهالك واجيلك اقولك على الاخبار
دخلت الاستراحة وبعد حوالى ربع ساعة لاقيتها داخلة تدور عليا وقالتلى انهم اشتغلوا فى العربية امبارح وحلولى مشكلة عضة المارشدير قلتلها ازااااااااااااااى قالتلى لما مهندس حسام يسلمك ابقة اسئلة قلتلها طب فى تكلفة عليها قالتلى هية تكلفتها الف جنية بس ما تقلقش انتة ضمان قلتلها طب والازاز قالتلى همة دلوقتى بيقفلوا فى الفتيس ونصف ساعة كدة والعربية تدخل ورشة السمكرة علشان يركبوا الازاز قلتلها طب هستلم العربية امتة قالتلى على الساعة اربع كدة قلتلها مينفعش قبل كدة قالتلى لا
طبعا انا اكتئبت وحسيت انى ظلمتهم واتسرعت انى جيت بدرى وهدفع تمن كدة انتظار 3 ساعات ومجيبتش معايا اللاب حتى يسلينى ولا حتى جورنال
المهم كانوا مشغلين فيلم قعدت اتفرج علية مفيش نصف ساعة لاقيتهم بيندهوا اسمى قمت اشوف فية اية لا قيت واحد بيعرفنى بنفسة انة مهندس حسام وبيقولى اية اللى تم فى العربية قالى احنا حلنالك مشكلة العضة قلتلة لوسمجت عايز حضرتك تشرحلى المشكلة والحل
قالى هية المشكلة ان مجموعة الخامس والمارش مع بعض فدة اللى كان بيعمل العضة وانهم بعتوا لرينو فرنسا وكان الحل بتغيير مجموعة الخامس ولاقيتة بيرسملى حاجات غريبة كدة طبعا مخبيش عليكوا انا اة مهندس بس مدنى ومفهمش كلمة فى الميكانيكا فسكتت ومطولتش فى الكلام
وقولتلة طب ورزنة الدواسة عملتوا فيها اية قالى هوة فعلا فى ناس كتيير بتشتكى منها واحنا بعتنا المشكلة لرينو فرنسا ومنتظرين الرد
وبعدين لاقيتة بيقولى على المرايا (اللى هية اصلا مش موجودة فى امر الشغل ) بيقولى المرايا لاقيتها رايحة فى داهية قلتلة اة منا عارف قالى انا مش هقدر اغيرهالك لانها خبطة ومش فى الضمان بس انا لاقيتلك عندى مرايا قديمة فركبتهالك بدالها وبدون اى تكلفة عليك (طبعا هو قالى الكلمتين دول وانا اتثبتت وبقيت عايز ابوسة او اشيلة من على الارض )بجد فرحتى ساعتها بالحركة دى خلتنى بقى عندى استعدااد استلم العربية بايظة حتى مش مشكلة دة انا فرحت بالمرايا اكتر من الازاز واللهى
قلتلى هية تمنها كام لو هغيرها لاقيتة اتصل ببتوع قطع الغيار وقالى 600 جنية قلتلة طب واللى كهرباء قاللى حوالى 700 جنية
وبعدين قاللى انة شاف الصورة اللى الفنى صورها للعربية وورهالى وقالى انة وافق على طول انها تتغير فى الضمان قلتلة هوة الازاز لوكنت هعملة على حسابى كان هيتكلف كام قالى لية انتة عايز تدفع قلت لا بس كنت عايز اعرف تمنة قالى هوة بالضريبة والمصنعية 660 جنية (دة طبعا للازاز الخلفى ) وقالى دة الاصلى وقالى فى نوع تانى اللى هوة الجريش بحوالى 400 جنية ودة هوة مش المفروض يركبة بس قالى ساعات لو عندة عميل قديم ومش عايز يدفع ال660 جنية بيركبلة الجريش دة
وبعدين قالى انتة عملت صيانة ال6 شهور قلتلة لا قالى اة يبقى انتة من الدفعات الجديدة قلتلة لا والله انا مستلم من شهر 12 بس بسبب الامتحانات فالعربية علطول مركونة قالى خلاص هعمل الصيانة علشان متروحش عليك (ساعتها انا كنت عايز ابوسة للمرة تانية)
قالى فية حاجة تانية بس راحة قلت ابقى انتهازى واستغل الكرم المفرط دة وقلتلة يشوفلى الفريون بتاع العربية ان كان عايز يتظبط قالى لية فى حاجة قلتلة بحس بتقل فى السحب على الاوا والتانى قالى خلاص هشوفهولك بس حضرتك حتضطر تستنانى حوالى نصف ساعة على مااعملك الصيانة والعربية تتغسل قلتلة مش مشكلة (مع ان الانسة كانت قايلالى الساعة اربعة)وانا اصلا روحت من التوكيل حوالى واحدة ونصف ويمكن قبل كدة كمان
مفيش ربع ساعة ولاقيتهم يبندهوا عليا تانى لاقيت انسة تانية بتكلمنى الاول كنت فاكرها خدمة عملاء طلعت مهندسة هية كمان وقالتلى تانى على تم فى العربية قلتلها تمام وقالتلى معلش المهندس حسام بيعتذرلك انة مش هينفع يودى العربية تتغسل علشان الازا ز لسة متركب وكدة غلط علية قلتلها مش مشكلة وقامت مسلمانى اذن الخروج وورقة فيها اللى تم
وراحت معايا علشان تسلمنى العربية اول حاجة روحت ابص عليها هية المرايا (القديمة ) لاقيتها راكبة وزى الفل وانا طبعا متوقع بما انها (قديمة )انها تكون مابتتقفلش فقلت اجرب واقفلها كدة بالراحة لاقيتها بتتقفل فاستغربت قمت داخل من جوة وقلت احرك المرايا وانا متوقع انا مش هتشتغل لاقيتها بتتحرك معايا قلت ابص على جسم المرايا اشوفها ان كان فيها خدوش لاقيتها سليمة ولا قيتها انضف من اللى كانت راكبة اصلا قلت امال اية بس قديمة دى هوة مفهومهم عن القديمة انها مش بكياسها يعنى ولا اية وساعتها مش قادر اوصفلكم كنت فرحان قد اية
قمت رايح ابص على الازاز لاقيتة تمام بس بعد كدة بعد اما خرجت استغربت انى ملاقيتش علية كتابة الرينو بس قلت مش مشكلة هوة كدة كدة ماكد عليا انة الاصلى
وطبعا ملاقيتش ولا حتة ازاز من اللى كانوا مبهدلين العربية
وسئلت المهندسة فى حد هييجى معايا يجرب العربية علشان موضوع العضة قالتلى لا بس انا هكلمك بكرة علشان اطوئن ان كان فى مشكلة او حاجة قلتلها شكرا
وطبعا رغم ان الركنة كانت واسعة تعمدت انى اجيب مارشيدير والعربية لسة بتتحرك لقدام علشان اشوف العضة لاقيتها ولله الحمد اختفت تماما والغيارات كلها بقيت سلسة جدا والعربية عموما ادائها بقى افضل
بجد انا بعد التجربة دى ابصم بالعشرة لتوكيل رينو انة افضل توكيل فى مصر
شكرا لرينو وشكرا لوحوش الرينو اللى لولا مساعدتهم ونصايحهم كان زمان الواحد محتاس
الف شكر لكل الوحوش

المشاركة الأصلية كتبت بواسطة michaelmagdy

معلش ربنا يسترها معاك و يعديهالك على خير انا عن نفسي بتعامل مع الميكانيكيون العرب و هم ناس نحترمين جدا

امين يارب بس على فكرة انا من اسكندرية وعرفش ان كان فية فرع ليهم هنا ولا لا

المشاركة الأصلية كتبت بواسطة yahiazakaria

شكرا لنقل تجربتك عشان الكل يستفيد توكيل رينو توكيل محترم بالفعل مش بالكلام

العفو يا فندم وبالصراحة انا طول عمرى بسمع كلام كويس عن التوكيل ودى كانت اول مرة اجرب بنفسى

المشاركة الأصلية كتبت بواسطة cementman

شفت اهو الموضوع و لا نحس و لا حاجة
لولا الازاز اتسرطن ما كانتش المراية اتغيرت و لا الصيانة الدورية اتعملت
يبقى تقول ايه " الحمد لله" لأن مفيش حاجة اسمها نحس

الحمد لله بس انا كانت حالتى صعبة جدا اليومين اللى فاتوا بسبب ضغط المشروع ومشاكل كتير وبصراحة مكانتش ناقصة العربية خالص وخصوصا انى منت محتاجها جدا اليومين دول فجالى احباط بس الحمد لله ما ضاقت الا اما فرجت

المشاركة الأصلية كتبت بواسطة yassen010

والله حاجة ممتازة بس لازم تشكرهم او تشكر اللي عمل معتك كده

انا فعلا شكرت المهندس حسام والانسة اللى سلمتلى العربية مع ان الناس دى مش محتاجين شكر لانهم ناس شغالين بضمير وبمعايير اوروبية ودى الحاجة اللى انا مستغرب انها بتحصل فى مصر ودة معناة ان المصرى رغم انة شخص مزاجى لكنة لو اتحط فى سيستم صح هتاخد منة احلى شغل