الكليو كلفتكم قد أيه في الصيانة وقطع الغيار؟

**Sharky** · 25-02-2008 10:17 PM

المشاركة الأصلية كتبت بواسطة moustafafarouk600

el kalam dah 3ala el Clio only or with Megane also ??!!
ya3ny the megane after 10000 km will be like that ??

مصطفى باشا الموضوع دا متهيألى محدش فى الميجان حصلوا الكلام دا
لكن انا حصلى حاجة قريبة من كده لقيت العربية بقطع كإنها متلتة و دا كان سببة كويل الإنجكشن و لما بيتغير العربية بترجع زى الاول لكن أعراضه ما بتبقاش زى ما أبو عبدالله بيقول فى الكليو
يعنى بتحس إن العربية مخنوقة و مش بتجرى فقط

**أبو عبدالله** · 25-02-2008 10:55 PM

يا ليمو باشا وبرضه التلكس غيره وكل اللي اعرفهم غيروا التلكس ده
وبرضه في خرطوم للهواء اللي داخل الماتور بضه يبوظ في اقل من 100 الف وبيتغير وسعره مش رخيص بس مش متذكر كام
يعني فيها حاجات كده بقت معروفه

ولكن انا مش بقول انها وحشه للدرجه دي
فانا اشهدلها ان عزمها ونعومة سحبها جمال جدا ولكن كعربيه اجمالي في احسن منها للمستهلك بكتير
وبرضه انا عند كللامي العربيه متعبه جدا في السواقه وبالذات لو مسافات

**د.اشرف هنداوى** · 27-02-2008 11:38 PM

يا ابو عبدالله انا ملاحظ ان معظم مشاركاتك قصدي كلها عن الكليو نقد جامد جدا مع ان حضرتك ما عندكش كليو ؟
اعتقد علشان كل الناس تستفيد من المنتدي كل واحد يقول خبرته مش رأيه الشخصي
ولا ايه راي حضرتك ؟

مع خالص احترامي لك و لأرائك خصوصا عن الدايهاتسو اللي كانا بنستفيد منها

**أبو عبدالله** · 28-02-2008 11:25 AM

المشاركة الأصلية كتبت بواسطة achrafhendawy71

يا ابو عبدالله انا ملاحظ ان معظم مشاركاتك قصدي كلها عن الكليو نقد جامد جدا مع ان حضرتك ما عندكش كليو ؟
اعتقد علشان كل الناس تستفيد من المنتدي كل واحد يقول خبرته مش رأيه الشخصي
ولا ايه راي حضرتك ؟

مع خالص احترامي لك و لأرائك خصوصا عن الدايهاتسو اللي كانا بنستفيد منها

أتفق معاك تماما فيما قولته
ان الواحد المفروض يتكلم عن تجربه
ومتهيألي المفروض ان لو حضرتك زي ما انت ملاحظ ان بنقد الكليو هتلاقي اني لا اتكلم في كل العربيات حيث انني لا اتكلم الا عما اعلم عنه وجربته وليس كل انواع السيارات
انا بركب الكليو دي زي عربيتي لأن مع قريبي اللي عنده عالطول
ودائما انا اللي بصلحهاله كمان في غالب الوقت

فأكيد مش هفتري على عربيه واتكلم عنها وانا لا اعلم عنها شئ
وانا متهيألي ذكرت حاجات في العربيه أكيد محدش هيعرفها الا اللي مجربها
وانا ذكرت فيها برضه حاجات تبهر زي جري الماتور وقوته وسحبه ولكن كل السلبيات بصراحه كتر من الأيجابيات اللي فيها
وعلى فكره العربيه دي لا يباع منها الا في القاهرة
يعني حضرتك لو رحت اي محافظه تانيه هتعد الكليو اللي فيها على صوابع اليد الواحده

ولذلك الموديل الجديد منها لا يباع الأن
لأن العربيه فعلا فيها حاجات رخمه زي الضيق الداخلي لها
علو مصاريف الصيانة وقطع الغيار النار في سبيل انها عربيه بــ 72 الف تقريبا

زي مثلا يقولك الوسع الداخلي للشنطة 510 لتر
يا فرحتي لما الشنطه واسعه وانا قاعد مخنوق داخل العربيه
هيا مش عربيه نقل دي سيدان

طيب انا هقولك على حاجه
مش شنطتها 510 لتر
وانا شنطتي 225 لتر

مره حطيت في شنطتي سخان ميه كهرباء 50 لتر
دخل عندي عادي والله في اي حاجه
جيت ادخله في شنطة الكليو مرضاش يدخل من ضيق فتحة الشنطة
طيب يا فرحتي شنطتي 510 لتر ومش عارف ادخل فيها حاجه زي كده

القصد انا النجاح مش بالأرقام وبس
النجاح في الأستخدام الفعلي

وشكرا لك وعالعموم انا لا افتى فيما لا اعلم فيه

**limo** · 28-02-2008 12:17 PM

الاخ العزيز ابوعبدالله
لو تسمحلى حضرتك اعلق على بعض النقاط الى انت ذكرتها عن تقيمك للكليو
اولا انا مش معاك خالص ان عيوب الكليو تعلوا عن المميزات فياريت علشان الموضوع يكون اكثر افاده حضرتك تحصر جميع العيوب وجميع المميزات ونتقاقش فيها
-موضوع قطع الغيار
انا لم انكر ان قطع غيار الكليو غاليا لاكن مش نار
العمليه مش بحسب بثمن العربيه بكام وقطع غيارها بكام لا الموضوع بتحسب بعوامل كتير منها العمر الافترادى
عندك الاسبرنزا شوف قطع غيرها عامله ازاى والفرنا شوف قطع غيارها دلوقتى
مش بس كده عندك العربيه البرودا كانشيل شوف سعرها كام وقطع غيراها عامله ازاى
عندك الياريس الى 85 الف شوف سعر الطاسه بكام وسعر طاسه الميجان بكام
والامثله كثيره
-انا اعرف ناس معاهم كليو عامله 130 الف كم ومعاملوش حاجه فى العربيه غير الصيانه الدوريه وتغير بعض الاجزاء الاستهلاكيه الى تحتاجها اى عربيه

- اما عن مساحه الشنطه الخلفيه فطبيعى جدا ان السخان يدخل فى عربيتك لانها هاش باك -لاكن فى حاله لو مسافر وهتشيل حاجات كتير فى الشنطه انى عربيه هاتشيل اكثر الهاتش باك ولا السيدان ؟
كمان الى مصغر فتحه باب الشنطه الرف الخلفى الكبير وفى حين ان باب الشنطه صغير والعيب ده موجود فى الياريس والكورولا الشكل القديم لاكن مش موجود فى الانسر او الانوس او النوبيرا .
وشكرا لسعه صدرك

**أبو عبدالله** · 28-02-2008 01:53 PM

يا استاذ ليمو
انا مش في طور اني اتكلم على ليه العربيه فتحتها ضيقه ولا كبيره
المهم في النهايه هيا ليست مثل كثير من السيدان زي الفيرنا مثلا
شنطتها فتحتها اكبر وهتشيل السخان

وانا مش بقارنها بالهاتشباك
انا بأعطي مثل ان الأرقام مش كلام وبس وانما فعل كمان

العربيه معاك قطع الغيار مش في كل الأحول بتقاس بثمن العربيه انا القصد من ذلك ان لو شفت العربيات اللي في سعرها واعلى منها في السعر كمان هتلاقي قطع غيارها ارخص او متساويه ومعمره اكتر كمان منها

مميزات السيارة بالنسبة لي :
1- ماتور قوي وسحبه ممتاز
2- خامة التابلوه جميله بصراحه
3- اداء الفرامل جيد
4- استهلاك البنزين جيد ايضا

عيوبها :
1- ناشفه جدا سواء الكراسي او العفشة بتاعتها مقارنة بمثيلاتها
2- قطع غيار غاليه مقارنة بعمرها الأفتراضي
يعني شوف بعد 100 الف كيلو هتصرف كام في الصيانات الدورية وقطع الغيار الاستهلاكية وشوف عربيه غيرها مثيلة في السعر بتاعها هتصر كام ايضا وانت تعرف
3- العربيه ضيقه جدا جدا من الداخل سواء في الامام او الخلف وانا اتحدى احد ان ينكر ذلك
4- وضع الدركسيون وعدم اتاحة الفرصه على تحريكه متعبه جدا في السواقة خصوصا لو بتقعد كتير في العربيه واظن ان اللي مجرب عربيات احسن هيعرف الفرق
يعني انا وانا معايا النوبيرا مكنشي الكرسي بالنسبة لي وحش وانما لما جربت الكورولا والسيريون بتاعتي عرفت اني كنت بتعذب على الكرسي بتاع النوبيرا

5- احتمال حدوث اعطال كهربائية مفاجأة ترتفع لنسبة 40 % تقريبا خصوصا البطارية عمرها الأفتراضي ضعيف خصوصا انها اغلى من الذي يباع بالخارج من انواع تانيه معروفة
6- معرفش حد معاه العربيه لم يغير التلكس بتاعها قبل 100 الف كيلو الأولانيه
7- اسعار الصيانه مرتفعه
8- مفيش ميكانيكي يعرف يشتغل فيها ومقتصر ذلك للتوكيل
9- الجلد اللي حوالين الزجاج الامامي والخلفي غالبا بتتشال بد فتره قصيره لتقع لا انت تلحقها وتعينها
10- وضعية مفاتيح فتح الزجاج ومفتاح السنتر لوك بصراحه غبيه جدا جدا للصبح

كفايه كده لو افتكرت حاجه هبقى اقولها ان شاء الله

**limo** · 28-02-2008 09:01 PM

الاخ العزيز ابو عبدالله
معلش انا اصلى مش هسيب حضرتك غير لما تقتنع بالكليو وتشترى واحده كمان فاستحملنى شويه
-اولا موضوع السخان وفتحه الشنطه الضيقه المصنع اكيد مش هيضع فى اعتباره اماكنيه دخول سخان فى العربيه ولا لان السخان انت ممكن تضعه فى الكنبه الخلفيه او على شبكه فوق سقف العربيه .مش قضيه
ما الكورولا والياريس برضو باب الشنطه صغير معنى كده انى مجبش ياريس ولا كورولا علشان باب الشنطه صغير ؟
-انا مش هتكلم عن قطع الغيار غاليه ولا رخيصه بس ليا تعلق على ان قطع الغيار مش معمره
اولا اغلبيه قطع الغيار فرنساوى مش تركى هي اينعم موجوده بكثره فى تركيا بس صناعه فرنساوى بس مش تركى
حضرتك شوف العربيات الكيو 2001 الى ماشيه فى الشارع عامله ازاى اعتقد انها ليه ماسكه نفسها
فياريت حضرتك تقولى ايه الى باظ فى العربيه بالضبط وباظ بعد كام كيلو علشان تحكم ان العربيه انها مش معمره
http://nilemotors.net/Nile/showthread.php?t=2757

ده اسعار الصيانه وقطع الغيار لاخونا شاركى موضحه اسعار الصيانات لغايه 100 الف كم وبعد 100 الف ما يخلصوا تداء تانى من الاول يعنى هيه هيه بعد 100 الف كم مفيش اى زياده

-اما عن موضوع الكراسى الاماميه والخلفيه الناشفه فانا شايف ان الكراسى عاليه و مريحه فى السفر -لاكن من اريح من الكرولا مثلا -لاكن اقدر اقول انها اريح من الانوس والفرنا
-اما عن موضوع الدركسيون وعدم تحركه اعلى واسفل فده عيب فعلا لاكن الحمد لله مش مسبب لى مشكله
5- البطاريه ازى عمررها ضعيف انا البطاريه اصليه فرنساوى اعدت معايا 4 سنين و5 شهور بالضبط وجب بطاريه اى سى دلكو ب250 جنيه والعربيه ماشيه زى الفل
6 -حضرتك بقول احتمال حدوث اعطال كهربائيه 40 % انت مش شايف ان النسبه ده فيها مبالغه شديده
انا المشكله الكهربايه الوحيده حصلت اول ما جبت العربيه واتحيت فى الضمان علطول فى 5دقائق على مدار 4 سنوات لم يحدث لى اى مشاكل كهربائيه
7-بالنسبه ان محدش بيفهم فيها -الكلام ده مضبوط على الاجزاء الحساسه فى المتور والمحرك نفسه لاكن عفشه وباقى العربيه ممكن اى ميكانيكى يشتغل فيها عادى واعتقد ان الكلام ده مش موجود فى الكليو بس وانما العربيات الحديثه كلها
كمان فى ناس متخصصه فى تصليح الرينو بسى احنا بنكلم فى الاضمن
8-بانسبه لجلد الزجاج الامامى والخلفى
اولا الزجاج الامامى والخلفى مثبت بسيلكون مش كاوتش يمكن الزجاج الامامى معظى بكاوتش ليس لتثبيت الزجاج وانما علشان يخفى حدود الزجاج
والجرء االى بتشال ده جزء صغير جدا بتاع زوايا الزجاج الى فوق ومفش منه ضرر انه يتشال
9 انا معايا الهاف اوبشين مش الفول اوبشين وفعلا وضعيه مفتاح الزجاج الكهرباء فى السمامات الاماميه مش ظريف

10- حضرتك نسيت تقول ان العفشه ناشفه شويه علشان خدمه شاقه
وكمان ميزه ان العربيه عاليه عن الارض

اشكرك وانا سعيد جدا بمناقشه اخ فاضل مثلك
فى النهايه احب اقول ان كلمه قولتها فى موضوع سابق ان الكليو ممكن تكون مناسبه لشخص ومش مناسبه لواحد تانى الموضوع

-

**د.اشرف هنداوى** · 29-02-2008 01:37 AM

انا عشت في فرنسا 7 سنين و الكليو هي السياره الأولي هناك اكتر من البيجو و السيتروين
طبعا علشان صناعه فرنسيه بس طبعا الناس دي مش حتشترى اى عربيه علشان صناعه بلدها بس لكن علشان هي تستحق

-مش معني انها مش منتشره في مصر انها وحشه
- عربيه ناعممممممممممممممه للصبح
- انا مش شايف انها ضيقه ابدا و كنت باركبها انا و مراتى و ابني و صديق لى و اسرته من غير ما نتخنق
- لولا اختلاف الأذواق لبارت السلع و اكيد مش حنتفق كنا علي حاجه واحدة
بس ما نطلعش فبها القطط الفطسانه- دي صناعه فرنسيه مش هندي او صيني

**Sharky** · 01-03-2008 11:50 PM

المشاركة الأصلية كتبت بواسطة limo

عندك الياريس الى 85 الف شوف سعر الطاسه بكام وسعر طاسه الميجان بكام

أنا أكتر واحد أجاوب على السؤال دا لإنى معايا الإتنين
الطاسة الواحد فى الميجان بـ 95.00 جم يعنى الأربعة بـ 380.00 جم
الطاسة الواحد فى الياريس بـ 250.0 جم يعنى الأربعة بـ 1000.00 جم يعنى أجيب جنوط أحسن :D

بالنسبة للكليو أنا ليه مهندس عندنا فى الشركة أسكندرانى أصلا و بيشتغل فى القاهرة بينزل جمعة و سبت الأسكندرية و شارى العربية من 2003 و عامل بيها دلوقتى 215.000 اف و بيقولى العربية زى الفل و مابيعملش فيها اى حاجة غير الصيانات الدوربة فقط