الموضوع: احب احيي المرور على حسن التعاون (بعتولى المخالفه على البيت)

عمااااار يامصر ومرورك الجميل وتقدمه المزدهر يجماعه فعلاً احنا مش مقدرين الحكومه واللى بتعملو عشان المواطن , وزراة الداخليه محسسانا اننا فى اوروبا من اول عربيات الاتارى ال بى ام الى توصيل المخالفات الى المنازل شئ رائع بجد
المهم وانا راجع البيت لقيت ورقة محطوطه فى المدخل مكتوب عليها اسمى وجايه من البريد ولازم استلم جواب من مكتب بريد ومذكور العنوان , دماغى قعدت تودى وتجيب وانا من امتى اساساً حد بيعبرنى او بيبعتلى اى حاجه روحت البريد ويارتنى ماروحت لقيت الظرف مكتوب عليه مرور القاهرة قولت اهلاً ربنا يستر فتحت الظرف ويارتنى مافتحته ( إنه فى يوم 12/6/2010 تم تسجيلك مخالفه رادار لتجاوز السرعه للسياره كذا رقم كذا ) مع العلم انى اليوم ده انا ماسفرتش فيه كان سفرى اليوم اللى قبليه
طيب لو انا تجاوزت السرعه والرادار صورنى ليه مخدوش المخالفه فوريه يعنى ليه مكانش فيه لجنه واقفه فى الطريق تاخد المخالفه فورى زى محصلى قبل كده , كده انا اتغرمت تكلفة تأخير الغرامه لإن الظرف جالى بعد اسبوع من المخالفه ومفروض ادفع دلوقت ج300 ولو كانت فورى 150ج
حسبى الله ونعم الوكيل فى الحكومه وفى وزارة الداخليه كلها