والله يا زميلي حضرتك أسلوبك محترم جداً وراقي وانا مش بتهكم والله على شركة رينو, أنا بس قولت رأيي بالأسباب الموضوعية في أول رد وبعدين طلعت بفتي لما بتكلم بالمنطق الى معظم الناس متفقة معايا فيه.
نيجي بقى لرينو الشركة كشركة لا خلاف انها عريقة بس اسمحلي حضرتك اقول نقط ممكن نختلف او نتفق فيها:
1-أي شركة سيارات يقاس نجاحها بالإنتشار وحجم المبيعات, وده ممكن يتاخد على مستوى عالمي او مستوى بلدنا بس, ولو على المستوى العالمي رينو في مراكز متأخرة في المبيعات وكانت بتعاني من خسائر كبيرة قبل الأزمة المالية كمان وحضرتك ممكن تراجع أرشيف جريدة الحياة, أو مجلة توب كار المترجمة بالعربي وتتأكد, بالنسبة لمستوى بلدنا حضرتك شايف ان سمعة الرينو مش حلوة وده مش من فراغ ومش عشان زي ما الناس بتقول ثقافة الشعب المصري مابيحبش التغيير, بدليل عندك البروتون اهي لا ياباني ولا الماني ولا فرنسي والناس بتشكر فيها وبتقبل عليها.
2-إعادة بيع الرينو: أي عربية سعر إعادة بيعها عالي مابيجيش من فراغ وده لأن المشتري عارف ان مصاريفها هتكون اقل وقطع غيارها اوفر وصيانتها اسهل ومعنى كده ان الرينو ضعيفة في الجوانب دي كمان.
3-عمر الرينو الإفتراضي: وده أحد العلامات الكبرى لتفوق شركة صناعة سيارات, حضرتك ممكن تشوف عربية الماني أو إيطالي أو بيجو من السبعينات ماشية في الشارع وشكلها طبيعي, لكن مستحيل تلاقي الموضوع ده في عربية من رينو, وده مؤشر ان العمر الإفتراضي لمحركاتها أقل منهم مش بالضرورة يكون قصير بس على الأقل أقصر من الباقي بكام سنة وده ضعف أيضاً في النقطة دي.
4-الرينو حتى الآن لم تثبت وجودها في مصر أو في دول الخليج وسط الشركات التانية فواضح ان المشكلة مش في وكيل مصر أو في الشعب المصري دي شكلها ظاهرة لكل البلاد الي درجات الحرارة فيها عالية.
5-تاريخ الرينو في العربيات الملاكي مش مشجع عشان زمان كان في أعطال كتيرة جداً ومنها تجربة شخصية لإبن خالتي الي باعها بعد تعب كبير ولف ومصاريف, وده ممكن يكون انتهى الوقتي او الشركة صلحت العيوب دي بس هتاخد وقت على ما تثبت ده عند الناس.
6-حضرتك قولت رينو كانت بتصنع عربيات نقل جنود ودبابات, ده شيء كويس بس هل ده مقياس للعربية الملاكي؟ يعني مثلاً في دبابات وعربيات نقل جنود صيني هل الشركة دي ممكن تعمل عربيات ملاكي احسن من تويوتا ؟
7-انا ماليش اي مصلحة اني اقلل من رينو بس انا بنصح الناس لوجه الله فقط بس بلاقي ملاك رينو متعصبين جداً لعربياتهم ويقولوي انتا بتفتي مع انك لو شوفت قسم رينو هتلاقي كم مشاكل رهيب في عربيات ماعداش عليها 4 و5 سنين, ادخل اي قسم اوروبي هتلاقي حجم المشاكل اقل بكتير جداً, وده مش هاخدو مقياش بس مؤشر لا يغفل برضو.
فا انا اتمنى ان رينو تثبت جدارتها فعلاً لان منافستها للشركات التانية في صالح المستهلك المصري بس المهم مايدفعش دم قلبو في أسعار قطع الغيار المولعة.
اتمنى ان كلامي مايزعجش حضرتك بس دي وجهة نظري الي ممكن تكون غلط ياريت لو عند حضرتك اي تصحيح انا عندي قابلية كبيرة اغير وجهة نظري لو اقنعتني لاني زي ما قولت ماليش مصلحة.
وتقبل تحياتي
المفضلات