الموضوع: محتار أجيب سكودا أوكتافيا أو رينو فلوينس

طيب تعالو نقارن بين الاوكتافيا و الفلوانس كأرقام و انا مش هقارن الجولف معاهم علشان الجولف هاتشباك و انا هقارن مش بس مواتير لأ انا هدخل الوسع الداخلي و شنطة العربية و الكلام ده معانا فالجولف تتحط في فئة لوحدهاو بصراحة حاسس ان سعرها استهبال بصراحة و انا هتكلم على الاوتوماتيك في العربيتين

نبدأ بالموتور و الفتيس
الاوكتافيا موتورها بيطلع 102 حصان الفلوانس بيطلع 105 يبقى هنا الفلوانس افضل بس في الاخر اعتقد انو مش عاوز توب سبيد عالية فال3 حصان مش فرق بس كأرقام بس

اقصى عزم الاوكتافيا 148 عند 3800 لفة
الفلوانس 145 عند 4250 لفة
و هنا الاوكتافيا تكسب علشان بتطلع عزم اعلى عند لفات اقل

الفتيس في الاوكتافيا 6 نقلات في حين ان الفلوانس 4 و ده هيوفر بنزين اكثر و يريح الموتور اكثر

نيجي للتعليق الاوكتافيا و الفلوانس ماكفرسون قدام
ورا الاوكتافيا Multi-element و الفلوانس Flexible beam و محدش يسألني ده ايه لأني بصراحة مش عارف بس عاوز اعرف

الفرامل في الاثنين ديسكات قدام و ورا وABS & EBD & BAS دول ستاندرد في الفلوانس

الاثنين باور كهرباء بيتقل مع زيادة السرعة

الشنطة الاوكتافيا 560 لتر الفلوانس 530 و هنا الاوكتافيا افضل

اقصى سرعة الفلوانس 180 الاوكتافيا 184 و ده ميعتبرش فرق زي ما قلنا

التسارع من 0-100 الاوكتافيا 14.1 ثانية الفلوانس 13.9

معدل استهلاك البنزبن داخل و خارج البلد مختلطين الاوكتافيا 7.8 لتر/100 كيلو الفلوانس 7.5 و ده في صالح الفلوانس بارغم من فرق الاحصنة و ان الفتيس 4 نقلات

سعة تانك البنزين الاوكتافيا 55 لتر الفلوانس 60 لتر مش هتفرق اوي بردو

وزن السيارة الاوكتافيا 1930 الفلوانس 1760 و ده هيبقى افضل للموتور في التسارع و استهلاك البنزين

طول السيارة
الاوكتافيا 4569 الفلوانس 4620 و ده هيدي وسع اكثر للركاب اللي ورا في الفلوانس

العرض
الاوكتافيا 1769 الفلوانس 1809 ثبات اكثر + وسع

الارتفاع
الاوكتافيا 1462 الفلوانس 1479 هيدي وسع للناس الطويلة اما الناس اللي زي حالاتي مش هتفرق خالص =)

قاعدة العجلات
الاوكتافيا 2578 الفلوانس 2702 ثبات اكثر

ارتفاعها عن الارض
الاوكتافيا 140 و الفلوانس 120 الاوكتافيا تكسب في دي علشان مطبات بلدنا الجميلة

من حيث الكماليات:
الاثنين فيهم
- سنترلوك
- فتح لشنطة العربية من الريموت
- زجاج كهرباء
- مرايات كهرباء مع امكانية طيها
- مثبت سرعة
- مالتيفنكشن مع دريكسون جلد
- بلوتوث
- تكييف مع climate control
- كومبيوتر رحلات
- ثلاجة في التابلوه
- فوجات
- ايموبليزر
- تعتيم لمرايات تلقائي
نيجي بقى للحاجات اللي في الاوكتافيا و مش في الفلوانس:
- سينسور لضغط العجل و ده حاجة في منتهى الجمال
- MSR + ASR دول انا مش عارف هما ايه

و ده كان من على موقع ارتوك اوتو الفئة اللي هيا Fantasia Tiptronic مش عارف هيا اول فئة اوتوماتيك ولا لأ

الحاجات اللي في الفلوانس و مش في الاوكتافيا:

- فتحة سقف
- Key less entry و ده حاجة في منتهى الاهمية علشان العربية لاقدر الله ماتتسرقش (ربنا يكفينا الشر)
- زينون
- سينسور ضوء
- سينسور مطر
- تشغيل انوار السيارة عن بعد
- باركنج سينسور
- 6 ايرباج

و ده في الفلوانس الهاي لاين من البروشور بتاع رينو مصر

كدة كل حاجة قدام حضرتك تقارن و تستخير و ربنا يباركلك في اي حاجة من اللي هتجيبها ان شاء الله

و في الاخر احب اقول لحضرتك كمان ان رينو مش فافي اوي بردو =) هي عاوزة اهتمام زيها زي الاوكتافيا لأن العربيات دي كلها سينسورز و متحكم فيها الكومبيوتر فلو حاجة غلط هتبرجل العربية كلها سواء دي او دي و متسمعش كلام اي حد غير انو يكون جرب الرينو و مش هاين عربيتو لأن لو قطع الغيار غالية شوية فده بينعكس على اعتماديتها