نقدر نجمع من تجارب الاعضاء التى سبق ذكرها بعض النصائح المهمة جدا جدا والتى كانت العامل المشترك فى اغلب التجارب السابقة
اولا : الأطارات (الكاوتش وهو اهم اجزاء السيارة )
1- يجب تغيير الكاوتش بانتظام كل 60 الف كيلو ( فرق 700 جنيه كل سنة مش خسارة فى حياتك
2-ضبط ضغط الأطارات بأنتظام كل يومان على الاقل ( جنيه ) مش هايفرق كل يومين

ثانيا : حزام الامان
1- ارتداء الحزام تصرف حضارى اثناء السفر
2- بلاش تحط الحزام فى الاماكن المزدحمة علشان ماتتضايقش
3- ارتداء الحزام فى لجان المرور فقط هو قمة التخلف الحضارى ودليل على خوفك من مخالفة اكبر من خوفك على حياتك وسلامتك

ثالثا : السرعة الزائدة ( اخطر اسباب الحوادث )
1- اختار سرعة مناسبة لكل طريق وبأختلاف الاوقات بمعنى
مش هاقولكم امشوا 80 ولا امشوا 150 لو طريق انت مش عارفة ومش مظبوط امشى 60 او 70 مش عيب
وكمان السرعة بالليل لازم تكون اقل من بالنهار بكتيير علشان مستوى الرؤية ( علشان بتبقى فيه عربيات راكنة من غير اضواء انتظار ولا عواكس )
ولو طريق كويس وانت حافظة تمام امشى السرعة المناسبة لمشوارك يعنى بلاش سواقتك تبقى كلها نمط واحد
2- تجنب السرعة اثناء المطالع والمنازل واثناء الملفات ............ الخ
3- لو مستعجل وممكن لاقدر الله تتفصل من الشغل برضة على مهلك ليه بقى
لانك ممكن مع السرعة تعمل حدثة وتبقى عاجز وبرضة تتفصل من الشغل
ويوم تأخير احسن من سنين وحيد على كرسى
4- التفكير فى حزن الأهل وتخيل وصول خبر مؤسف لهم عند كل مرة تزيد السرعة فيها لتنبه نفسك وتعود للسرعة المناسبة

رابعا : اخلاق القيادة
1- احترامك لمن امامك وخلفك من سيارات بمعنى ( الاشارات ) مش عيب
2- عدم التعدى على حقوق الاخرين فى الطريق بمعنى لو انت شايف عربية بتعدى من عربية واعطاك اشارة متحاولش تربكة بأنك تلزق فى اكصدامة وترعشله نور علشان ينجز وتعدى انت سيبه يطلع وبعدين انت

وللحديث بقية بعد تفاعل اكثر من الاعضاء فى سرد تجاربهم لنا
واعتذر من نسيان اى شئ