الموضوع: Brilliance Frv Vs. Renault Megane

المشاركة الأصلية كتبت بواسطة yasser100

اخى العزيز ان اشتريت البريليانس FSV لمراتي و اسمع رايى :
انا شخصيا راكب اوبترا زيرو 2009 قبل ما خد قرار الشراء لمراتى لفيت كتير انا و مراتي و اتفرجت علي كل السيارات خصوصا اني هادفع كاش يعني مش مضطر لعربيه معينه , انا كنت واضع سعر حتي 90000 جنيه و انا جربت سيارات كتير مع اصحابي , و شفت اراء كتير علي النت لمدة شهر لاني زي ما قولتلك لمراتي و هي ما تعرفش اوي في السيارات غير المديلات فقط زي اي ست علشان كده مسئولية الاختيار كانت عليا مش عايز اسمع في يوم ان ده اختيارك .
في الحقيقه انا كنت ناوي علي النيسان صني اوتوماتيك ب 90000 و رحت اتفرجت عليها و الصراحه حرام حرام يندفع في التقفيل ده المبلغ ده و لا في الصالون اللي متقفل في موبيكا ولا في العفشه , المهم سيبك من نغمة الصيني و الكوري و الاوروبي احنا هنا في مصر بنركب الدرجه الثانيه و الثالثه باغلي الاسعار , و الكل هنا بيشتكوا من كل الموديلات و انت حظك حتي الميجان اللي بتتكلم عليها شركات التامين مابترضاش تامن علي حجات كتير فيها خصوصا الكروت الالكترونيه فيها و روح اسال و مش بعقدك في الميجان ولا حاجه بس باقولك كله فيه مشاكل و الله و الله جاري عنده jetta 2009 زيرو مرميه تحت البيت اكتر من شهر علشان كارت اليكترونى اتحرق و مش موجود في التوكيل و الراجل قاعد محسور بال 190000 جنيه اللي دفعهم و ما يحصلش الكلام ده في اسوء عربيه صيني او حتي فيتنامي ده علشان بس الجماعه اللي بيقولوا ميجااااان مع الصيني مستحييييييل .
انت فيك عينين و راس ادخل اقرا و روح اتفرج و قارن بنفسك و اسال و سيبك من عقدة اي صناعه تيوتا و هوندا و فولكس و بي ام و مرسيدس مش هبل علشان يصنعوا هناك , انا سفرت الصين و هناك ممكن يصنعولك كل حاجه بكل الاسعار و بكل الجودات و روح شوف المنتجات الصيني في اوروبا و امريكا.
بالنسببه للبريليانس FSV اولا الشركه دي شاريه 49.5% من BMW ادخل علي http://www.bmw-brilliance.cn/cn/en/car_home.html وانت تعرف .
ال FSV و FRV متصنعه في مصانع الفئه الثالثه هناك علشان كده FSV كانت نازله غاليه من 6 شهور الاوتوماتيك ب 95000 و مانيوال بالاوبشن 87000 و العاديه ب 82000
علشان كده ماتباعتش عملوا عليها تخفيض كبير علشان تنتشر و الناس تعرف امكانيتها و لفتره محدوده .
روحت و اتفرجت عليها و شفت التنقفيل المحترم و الامكانيات اللي في العربيه اللي فعلا تساوي الاسعار دي , ده بالنسبه للتقفيل , بالنسبه للموتور عرفت ان الشركه نفسها هي اللي نتصنع المواتير بالتعاقد مع تيوتا و ميتسوبيشي كاستخدام للتكنولوجيا في الشركات دى , مش زي الشركات التانيه اللي بتجيب مواتير و تحطها و خلاص و لا بتصنع و لا حاجه , ده معناه انها شركه كبيره و ليها اساس بالدليل ان بي ام عمله شراكه معاهه, زي ما قو لتلك الصين فيها كل الصناعه المحترمه و الغير محترمه , الشركه دي من سنة 1990 .
اول انطباع اللي ما صدقتوش نعومة الموتور ال RPM بيعدي 4 من غير ما احس و علي فكره انا مغير 3 سيارات زيرو , تاني حاجه العفشه , اول مره اركب عربيه عفشتها ما بتدبش في المطبات و روح اسال كده علي السيراتو او الابترا اللي انا راكبه .
الثبات علي الطرق السريعه اللي فعلا يقارن بثبات الاوبترا و لان العربيه و زنها تقيل مش خفيف 1260 كجم , الفرامل ممتازه ABS EPD .
بالنسبه لاختبارات التصادم اللي بيتكلموا عليها من غير دراسه , انا كنت في المانيا , الطرق هناك 3 سرعات 90 ,140 ,180 كم . طبعا شئ تلقائي لما تكو ن ماشي بسرعه علي الطريق و يحصل حاجه فجاه هتدوس فرامل يا هتوقف يا هتصدم بللي قدامك .
بمعني انك في المانيا لو ماشي بسرعة 180 و حصل فجاه حاجه قدامك هتدوس فرامل و الاصطدام هيكون في سرع 100 او 120 كم و طبعا دي سرعة اصطدام موت.
هنا في مصر اتخن طريق 120 كم و اللي يمشي اكتر من كده في طرق مصر بيجازف بحياته , يعني لو فرملت فجاه بالسرعه 120 هيكون التصادم عند 80 ,70 تقريبا و دي مش سرعة موت , عندك ديانا و دودي في احسن العربيات امان في العالم و ماتو , الاقدار بايد ربنا .
زي ماقولتلك روح و اتفرج و قارن و سيبك من النغمه اللي بيقلوها و ربنا يوفقك .

يا باشا الف شكر على ردك الوافى ديه اول حاجة

هو يا باشا انا الحمد لله معنديش حتة انى ببص على بلد المنشأ و كده

لأن احنا لما جينا نجيب عربية تانية بردو جبنا جين 2 يعنى اللى اقصده ان بلد المنشأ مش من الاولويات اللى بفكر فيها

و لو كده انا مكونتش فكرت فى الفكرة نفسها انى اقارن بين الاثنين رغم اختلاف الفئات كمان

و البريليانس فعلا محترمة جدا و انا نزلت و شفتها فى المعرض و ركبتها فى اكثر من معرض و كنت فعلا هحجزها بس قولت اخد وقتى و افكر تانى برضه و استشير اعضاء المنتدى هنا اكيد هما اكثر خبرة منى

هى العربية كل اللى جابوها شكروا فيها و دا من خلال متابعتى لقسم بريليانس بس دلوقتى هما عندهم مشكلة فى الموتور الـ 1500 الجديد بتاع المانيوال و ناس كثير فى القسم بتقول ان فيه مشكلة كبيرة

طبعا انا مقدرش احكم لأنى مجرتهاش و الله اعلم

بس هى فعلا عربية منافسة جدا فى الفئة بتاعتها و عربية تستحق كل الاحترام و الف مبروك يا باشا عليها

السيراتو يا باشا برضو بسمع انها حلوة و كل حاجة بس انا مش بميل للعربيات المنتشرة اوى و دا طبعا رأى شخصى راجع لكل واحد

انا لسه بفكر برضو مع انى زى ما قولت ميال للميجان لانى ركبتها قبل كده اكثر من مرة و داخلة دماغى

بس طبعا لازم احسم موقفى قبل يوم 15 عشان العرض ميضيعش عليا

و الف شكر على رأيك و نقلك لتجربتك

عموما ربنا يوفقك في قرارك , بس ايه هي مشكلة الموتور 1500 يمكن ما يكنش عندي خلفيه .

المشاركة الأصلية كتبت بواسطة yasser100

عموما ربنا يوفقك في قرارك , بس ايه هي مشكلة الموتور 1500 يمكن ما يكنش عندي خلفيه .

يا رب ان شاء الله و شكرا

المشكلة اللى انا فهمته ان فيه بطىء فى استجابة الماتور بما بتيجى تغير بتحتاج انك تجيب ار بى ام عالى عشان تحس بعزم العربية .. فيه ناس بتقول ان الماتور تصميمه كده و فيه ناس بتقول ان فقيه عيب و انو بيتحسن بعد الصيانات التقليدية

عموما راجع الموضوع ده هتلاقى فيه كل حاجة

http://www.nilemotors.net/Nile/16304...00-2010-a.html