الموضوع: ابوس ايديكم مساعدة لوجه الله ضرورى جدا

السلام عليكم
الموضوع ده موجه للسادة الاعضاء كلهم وخصوصاً المهندس سمير عياد والاستاذ محمد ممدوح
اعتمادى على الله ثم عليكم
انا معى عربية اكسنت كورى اوتوماتك 98 ماشية حوالى 200 الف كيلو ، الموتور كان بيطلع دخان ابيض من حوالى 6 شهور عملت فيه كل حاجة قالها الميكانيكى غير شوية حاجات كده مش فاكرها عمل المطلوب يعنى علشان الدخان وفعلاً من ساعتها الحمد لله مفيش دخنة والموتور صوته ناعم وزى الفل وسحب العربية تمام ولله الحمد ، ده اللى خاص بالموتور ،،، الفتيس غيرت الزيت والفلتر بزيت موبيل وجبت فلتر جديد والحمد لله سحب العربية كويس والفتيس تمام ومفيش فيه اى مشاكل ، مغير فلتر الهواء والبنزين ، من حوالى 4 شهور ، وفلتر الهوا بنضفه كل اسبوعين بالكتير ، حطيت جميع انوع البنزين من 95 ،92 ،90 ،80 ، :)
روحت بنزينة شيل اللى فى الهرم شوفت حرق البنزين وطلعت النتيجة على الجهاز ان الحرق تمام ، روحت لمحمد عبده وبالصدفة الاستاذ محمد ممدوح كان عنده وابو صلاح كمان ، وشاف العربية وقالى زى الفل و مفيش تسريب ، روحت لمحمد السيد فى الدقى كشف على العربية وقالى تمام وزى الفل ، لفيت بيها على كل المكيانيكة وكلهم اجمعوا ان العربية كويسه ، عارف ان فيه ناس هتقول طيب مستنى مننا ايه ، مستنى من حضرتكم تقولولى انا اللى صح ولا هما ؟؟؟
فولت العربية مليون مرة وفى كل مرة بصفر عداد الرحلات ( وعلى فكرة مصلحه عند واحد ولهف 100 جنيه علشان يغير ترس فيه علشان كان بيعد بالميل ) يعنى العداد مظبوط ومفهوش مشاكل الحمد لله 0
المشكلة اللى هتجننى بجد ان العربية استهلاك البنزين فيها غبى جدااااااااااااا ، امبارح فولت العربية العداد كان عامل 230 كم اخدت 41 لتر بنزين 0
لو حضرتكم شايفين ان كده طبيعى هسكت ومش هفكر ولا هدور على حل تانى ، لو شيفين ان فيه مشكلة ياريت وابوس ايديكم واترجاكم تقولوى الحل مهم كان 0