انا طهقت سيتى 2009 بتتزحلق وتطير

**maraaawan** · 09-07-2010 02:20 AM

لا انكر ان السيتى الجديدة تحفة فى كل شيئ لكن العربية فيها مصيبة تجنن العفريت العربية على طريق مفتوح زى طريق شرم الشيخ مثلا ويعبرة رياح شديدة من الجانبين تحس ان الهواء بيزقها من الجنب وبتتزحلق بالجنب من قوة الهوا والاسبوع اللى فات وانا راجع من اسكندرةي على الصحراوى كنت ماشى على 140 وعديت جنب اوتوبيس سياحى لقيت العربية كان حد حط ايدة تحتها من الجنب وشالها وحركها بالجنب فاهمين قصدى ؟؟؟ اتحركت بالجنب مش عامت لا اتحركت كلها دفعة واحدة بالجنب انا كان هايجيلى القلب ساعتها وربنا ستر
رحت التوكيل وبابتسامة زى كل مرة مافيش مشكلة يا فندم واضح انها ضبط زوايا ظبطوا الزوايا العربية بقت بتحدف شمال وبتعوم دة غير ان التقرير اللى ادهولى مكتوب فية سيتى 2002 ولما سالت المهندس قالى لا دة البرنامج بس اسمة كدة على الجهاز لكنة بتاع 2009 ؟؟؟؟
العربية خفيفة موت بعد ال 120 اى شوية هوا جامدين بيزحلقوها يمين وشمال مافيش اسبويلر بجد مش منظر يظبطها لانى سالت ومافيش كلة منظر وبس اغير الجنوط مش هاتفرق كتير زى ما سمعت اوطى العربية هى طبيعى مع شوية شنط واتنين ركاب فى الخلف بتحك فى المطبات اعمل اية ؟؟ ما لازم نلاقى حل وبعدين يا جماعه لو فى حد حس بنفس المشكلة بدل ما بيسكتوا كل واحد فينا ويحسسوة فى التوكيل انها مشكلة فى عربيتة او وهم عندة نتجمع كلنا ونكبس عليهم كبسة رجل واحد فى يوم واحد بعربيتنا كلنا لو كل الى معاهم سيتى حاسين بنفس المشكلة
ارجو الافادة من الىل معاهم ستيى الجديدة هل حسوا بنفس المشكلة ؟؟؟وهل ليها علاقة بالزوايا واظبط الزوايا فين اذا كان التوكيل بيبوظها مش بيظبطها

**SAMEH_FOUAD** · 09-07-2010 12:42 PM

طيب ماتروح توطيها شوية بأن تركبلها سوست ومساعدين كونى النوع النورمال عشان تحس بتعليق هادى وفى نفس الوقت هتبقى اوطى من العادية, وهتديك ثبات اعلى

**janjon1978** · 09-07-2010 07:34 PM

اولا: اى ريح جامدة شوية لازم هتحس باللى انت حسيتة حتى لو سيفيك و ماشى بسرعة عالية يعنى 160 او 170

ثانيا: السيتى من اسمها عربية معمولة للسواقة داخل المدن اساسا و علشان كدة هتبقى فى الهاى واى خفيفة و مع الهواء الجامد قوى هيحصل اكتر من كدة
احساسى انى عربيتك سليمة مفيش مشكلة بس هى كدة

عايز تضبطها يبقى جنوط وكاوتش عريض و مساعدين وسوست كونى هتحس بفرق بس على حساب نشوفية العفشة

**bob12345** · 09-07-2010 07:59 PM

طبيعي جدا الموضع ده و ملاهاش علاقة بالكوري و الياباني
الموضوع طبيعي في الفئة دي

**Ralliart** · 09-07-2010 08:02 PM

غريب الموضوع ده واول مره اسمع عنه في السيتي
هي كانت عند واحد صاحبي نفس المشكله في هيونداي الانترا وحلها بتغيير الجنوط والكاوتش العريض
ممكن تجرب جنط وكاوتش عريض واعتقد ان دا كفايه لحل المشكله لان مساحة الكاوتش المحتك بالارض هتزيد فهيمنع ان العربيه تتزحلق
ولو محتاج ثبات اكتر غير المساعدين والسوست لحاجه سبورت

**bob12345** · 09-07-2010 10:52 PM

المشاركة الأصلية كتبت بواسطة ralliart

غريب الموضوع ده واول مره اسمع عنه في السيتي
هي كانت عند واحد صاحبي نفس المشكله في هيونداي الانترا وحلها بتغيير الجنوط والكاوتش العريض
ممكن تجرب جنط وكاوتش عريض واعتقد ان دا كفايه لحل المشكله لان مساحة الكاوتش المحتك بالارض هتزيد فهيمنع ان العربيه تتزحلق
ولو محتاج ثبات اكتر غير المساعدين والسوست لحاجه سبورت

انا اعتقد ان الجنوط والكاوتش هيحسن ولكن مش هيحل الموضع
و الموضوع دا موجود في كل العربيات من الفئة دي و الاكبر منها
يارس ستي اكسنت لانسر سيراتو الانترا كورولا سيفيك كلهم فيهم الموضوع ده بدرجات طبعا

**spiderbaz** · 10-07-2010 06:09 PM

انا معايا السيتي الحمدلله بقالي سنة و محستش ابدا بالمشكلة دي
و ببقي علي 150 و 160 ولحمد لله محستش ب ده
حاول تتاكد من المشكلة برة التوكيل
و ان شاء الله يكون خير

**Rsarabia** · 10-07-2010 08:29 PM

السيتى زى اليارس الاتنين بيقل ثباتهم مع السرعات العالية بالذات فى حالة لو فى ريح ضدك او على جانب السيارة
عكس سيارات تانية ثابنة جدااااااا زى لانسر سيفيك ميجان كورولا الجديدة

عربيتك عالية من ورا عشان كدا مش هتبقى ثابتة بس دا بيديلك ميزة انك هتلف جوة البلد بنعومة اكتر
عاوز ثبات وطى العربية
عاوز نعومة سيبها زى ما هى و امشى بالراحة