الموضوع: شارك برأيك في اصلاح البلد...بدل ما نشتم فيها

ايه يا جماعه الردود اللي معظمها مافيش فيها اي نوع من الحلول..
كاتبين 3 صفح و مافيش غير كام واحد قال شويه سلبيات و محتاجه تعديل و الباقي مش عارف بقي ايه لزمه ردوده...
معلش كلامي حاد شويه

بس انا موضح جدا انا ليه قلت حلول من جهه الحكومه و ليس الافراد

شكلي كنت غلطان اني كتبت الموضوع من اساسه ..
خلينا في مين عايز يغير الجنسيه و يبدلها بمروحه
و لو لم تكن ماصريا لودت تكون ايه...

انا فاهم كويس اوي الحمد لله ايه المفروض يتعمل من اصلاح
مش مستني كل شويه حد يقول غير من نفسك الاول انت و الناس و بعدين هنتصلح حالنا...
الناس خلاص مش لاقيه امل او فايده انها تصلح نفسها لأنها بتحس انها عايشه في وادي و بقيت الشعب في وادي تاني...
فكره بقي اني بقول البدايه حاليا لازم من الحكومه..
علشان ذي ما بيقولوا ادي الشعب حاجه مفيده علشان يبدء يغير من نفسه
خليه يحس ان فيه امل

و ادي ذقني اهي لو البلد اتغيرت من شعبها..الا بثوره و هلاك لحد ما ربنا يعدلها او احتلال و نبدء نتكاتف تاني من الاول

و صباح البتنجان

شكرا لصاحب الموضوع على الموضوع الايجابي الاكثر من رائع

المشاركة الأصلية كتبت بواسطة momo_sunny

انا شايف وجهة نظر تانية خالص
اولا
الغذاء
احنا ناسيين ان اكلنا بقى كلة مايتكلش ( استغفر الله العظيم) كله ومبيدات مسرطنة وقرف وتلوث والواحد بياكل وهوة مش مطمن
غير كدة يا جماعة والله العظيم ناس كتيير اوى مش لاقية تاكل وبتمشى نفسها بالعافية وماتعرفش اللحمة الا فى العيد الكبير علشان الاضحيات اللى بتتوزع من اهل الخير
تقدرو تقولولى ازاى شعب هاينتج ويتقدم وهوة اصلا مش لاقى ياكل للاسف ناس كتير مننا قاعد ورا الكيبورد مش حاسس غير بحاجات صغيرة اوى ( الزحمة- الموصلات - الحر وفى ناس اصلا ماعندهاش مراوح-وغيرو كتييير ....................)
مصر بقى فيها ناس كتير اوى تحت خط الفقر
ودة بسبب ان الناس بصراحة مابقتش تزكى والحكومة مابتديش الناس الغلابة دى حقها
ثانيا
الصحة
الصحة بقت فى الحضيض والامراض انتشرت بطريقة فظيعة وامراض والعياذ بالله مذمنة وعمرنا ماكنا بنسمع عنها قبل كدة
القطاع الصحى كلة عايز النسف
تتخيلو ان اللى عامل النظام التامينى الصحى فى امريكا مصرى
واوباما لسة مكرمة وعاملة جايزة
واحنا هنا بنلاقى الدوا والدكاترة بالعافية والمستشفيات بقت مزبلة وحاجة مش ادمية خالص
الواحد دخل مستشفيات عاملة كتير اوى بجد حاجة تجيب القهر والله
العيان احسن له انو يموت ولا يتبهدل البهدلة دى انا مش عارف احكى ايه ولا ايه الواحد لو فتح مش هايسكت منهم لله اللى عملو فينا كدة

ثالثا
المسكن
كل يوم بنسمع عن بيت بيقع على سكانة علشان السكان مش راضيين يسيبو البيت لانهم ماعندهمش مكان تانى يسكنوا قيه
دا غير اصلا ان الفقر بقى منتشر والناس بتدور على العشش علشان تسكن فيها
دا غير اسعار التمليك والايجار اللى بقت حاجات عباطة
فى ناس كل حلمها انها تسكن تحت سقف والميه ماتنزلش عليهم فى الشتا
يبقى فيه نظام سكن محترم ادمى يليق بكل الناس وباسعار رخيصة
وتسهيلات محترمة علشان كلة يقدر يسكن فى مكان محترم
رابعا
التعليم
طبعا التعليم انتو عارفين ان التعليم بقى روووووووووووووووووووبة
انا بقالى سنة مخلص
حاسس انى ماتعلمتش حاجة واى حد يسالنى انتا كان عليك مواد ايه فى الكليه سعات بنسى
المفروض يبقى التعليم للتعليم مش شهادة الواحد بياخدها وخلاص
علشان يلاقى شغل انامش عارف اقول ايه
يبقى فى نظام تعليمى محترم
احنا خرجنا من ترتيب الجامعات العالمى بقالنا فترة والشهادات بتاعتنا بقت مش معتمدة ولا حتى فى كفر البطيخ
ليه مايجيش مثلا اى حد من علماءنا الكرام يجي يمسك وزارة التربية و التعليم زىاحمد زويل مثلا
ليه مصرييين اللى يمسك التعليم دكتور ومستشار وضابط
عمر ماحال التعليم هايتصلح الا لما يمسكة واحد مسك الطباشيرة وشرح على السبورة
لما الحاجات الاساسية دى تبقى تمام ومية مية
ساعتها نتكلم على البنا والانشاء والمدن الجديدة
والمصانع والتطوير وكل دة
لان عمر ماالشعب هايتقدم خطوة واحدة طول ماالحاجات دى ناقصاه
واسف للاطالة
وتقبلوا تحياتى

الله ينور عليك
في حاجات اسمها الاحتياجات الاساسيه لحياه الانسان
لو اي حاجه منها اتفقدت هتلاقيه (الانسان) بيدور عليها الاول
وهي :
1- الحاجات الفسيولوجية (الطعام... الغرائز.. الدواء.... إلخ).
2- الحاجة إلى الأمن.(تشمل السكن والاحساس بالامن بشكل عام)
3- الحاجة إلى الانتماء.(الى كيان او جماعه)
4- الحاجة إلى التقدير والاحترام.
5- الحاجة إلى المعلومات.
6- الحاجة إلى الفهم.
7- الحاجة إلى الجمال.
8- الحاجة إلى تحقيق الذات
ودا بالترتيب كل لما يتحقق حاجه تلاقي البني آدم (اي بني ادم) بيدور على اللي بعديها

المشاركة الأصلية كتبت بواسطة ahmed anwer

أيه لازمة رأيي مادام مش هيتسمع ؟؟؟؟

لازم تقولوا حتى لو مش هيتسمع .. لان تظل الحياه بلا اطلاق(مفيش 0% او 100%)
ممكن يتسمع ويأثر بشكل مباشر او ممكن يتأثر بيه حد غيرك يمكن مش في ايده القرار
وممكن لو تكرر منك ومن غيرك يبقى رأي عام
((أي كوب يظهر منه جزء ممتلىء (وإن قل) و جزء فارغ (وإن كثُر)))

لو فقدنا الامل فقدنا اللي باقي لينا ف الحياه