مبدأياً انا بعمل 97 كيلو يومياً على الاقل من البيت للشغل رايح جاى (متوسط الكيلو مترات للأيام 147 كيلو متر لليوم)
يعنى انا مشيت كتير فى وقت قليل ورأيى عنها عموماً انها مقبوله فأقل وده لوجود المشاكل دى:
1/ الفتيس (اتحلت) رحت التوكيل فرع العبور فى صيانة ال5000 وكان صوت عضة المرش هو التعليق الوحيد اللى على العربيه ومهندس الصيانه رد عليا ان المرش محتاج تدوس دبرياش و3 ثوانى وتجيب المرش كلام غير مقنع بالمره
قبل صيانة ال10000 اتصلت وقلت للموظف احجز فرع المقطم فرد عليا ليه ما حضرتك عملت صيانة ال5000 فى العبور فحكيت له اللى حصل وقلتلو لو ده الحل يبقى رينو شركه زباله الموظف عمل امر شغل مخصوص للفتيس وشكوى ولما رحت كان اهتممهم الاول الفتيس واتحلت العضه بس فى مشكله بسيطه ان ساعات تيجى تجيب المرش اللمبه تنور وتحس انك مدى الغيار والعربيه مترجعش كأنك ممور واشتكيت من دى بس كل مره اروح التوكيل يجرب المارش يشتغل معاه
2/ التكييف حدث ولا حرج خلال فترة الحر الشديد اللى كانت اخر مايو واول يونيو (درجة الحراره 42) كان بيجبلى هواء سخن كأنه مش شغال لدرجة انى كنت طافيه لان فتح الزجاج ارحم المهم حجزت ميعاد غير الصيانه (كان فاضل اقل من500 كيلو على ال15000 ) ورحت ومعرفش عملو ايه وبقى فى الحر الشديد بيدخل هواء بارد لكن مش زى تكيفات الانوس او الافيو
3/ الكاوتش اللى تحت الزجاج الامامى فكت (كانو مستخسرين بمليم سليكون فيها ولما رحت التوكيل عملوها بس بعد ما انا طلبت (دخلت مرتين قبل كده التوكيل مفكوكه وعلشان انا معلقتش عليها معملوهاش ) بس السليكون اللى هما حطينه باين ومنظرها مقرف
4/ لمبة الابواب كانت بتنور لوحدها يعنى تكون ماشى فى امان الله وتلقيها منوره ورحت التوكيل وقالولى تمام ولقيت فى الملفات اللمبه بتنور فى صيانة ال15000 رحت وقلتلهم واتعملت وبقى مفيش مشاكل لدرجة انى افتكرت انهم فصلوها علشان يريحوا دمغهم
5/ أهم مشكله ولسه ما اتحلتش حتى الان(الفرامل) مبدئياً انا مبعرضش نفسى لفرامل مفاجئه بسيب مسافه بينى وبين العربيه اللى قدامى فوق 10 متر بس حصل موقف فدست فرامل جامد فالعربيه أخدت راحتها جامد جداً علشان تقف (الحمد لله ربنا سطرها) وبدأ صوت صفاره فى الفرامل يظهر وكان بوضوح فى الفرده الشمال قدام فحجزت معاد ورحت وحكيت الموقف اللى حصل معايا وطلبت أنهم يراجعو الفرامل ودخلت العربيه وخرجت كلو تمام وجربتها مع مهندس الصيانه وزى الفل وبعد اقل من 100 كيلو رجع الموضوع زى ما هوا ولا كان حاجه حصلت فى صيانة ال15000 رحت واشتكيت من الفرامل وقلت للمهندس اطلع جربها قبل ما تدخل الورشه الا انه رفض وقالى نجربها بعد الصيانه وفعلاً العربيه اتحسنت بس فى مشكله دلوقتى الصوت رجع تانى بتاع الصفاره ولما تدوس على بدال الفرامل في مرحلف بيقطعها البدال من غير ما تفرمل العربيه وبعد كده تبدأ تفرمل العربيه (معرفش ده طبيعى ولا ؟؟؟؟؟؟؟؟

مشاكل ظهرت لاول مره :
صوت عند التنك فى المطبات صوت رجة مياه (أو البنزين)
العربيه حكت كذا مره فى المطبات بس دى كانت وانا راجع من الزقازيق وكان معايا 2 فى العربيه وحوالى 20 كيلو فى الشنطه

اخيرا فتحت التكيف كنت مركب فيها فواحه وجيت اشيلها لقيت الغطاء بتاع الفتحه(الهوايات) خرجيت معايا صحيح انا ركبتها تانى بس اتحرق دمى علشات سوء التقفيل