شباب
عاجبني قوي الموضوع و كالعاده بيتحفنا سبعاوي بكل ما لذ و طاب من عصاره مخه و قريحه افكاره
بس انا بعيب علي الفريق المائل الي المكوث في مصر
ليه؟
لأن التعصب لفريق كره او ممثل او مغني او حتي بلد اه لو حتي بلد ده مبدء مرفوض
شوفو كده في الاذاعه و التلفزيون فتره نهايه التمانينات و بدايه التسعينات
كانو بيتشدقو بحضاره ال7000 سنه و كله كلام عن الفراعنه و اغاني زي المصريين اهما و بس
كانو بيزرعو جوانا شعارات لا تمت لارض الواقع بصله ولا حتي ببصله!!!
و طبعا بعد الانفتاح الثقافي و بزوغ عصر المعلومات الحره و تعدد الفضائيات و سبل الحصول علي المعرفه من اماكن مختلفه عن القناه الاولي و التانيه و التالته
فقدو جزء كبير من الحجاب اللي كانو باسطينه علي عيوننا
و ان الاوان لناس زي الناس اللي مشاركه في الموضوع انها تبص و تفكر و تقارن بين حياتها هنا و هناك و مستقبلها
منجيش بقي نقول بلدك اللي شربتك, لأنها ميه ملوثه و غير صحيه
منجيش نقول علمتك ببلاش(اخر مره حد قاللي الجمله دي كان صول و انا في الجيش و كان نفسي البسه البياده في بقه) لأن ابويا الله يرحمه هو اللي صرف عليا دم قلبه دروس و كتب لاء و ايه متابعه و مجهود خرافي ورايا لغايه ما اتعلمت و بقيت بني ادم لا تعليم مجاني ولا زفت بلا كلام فاضي و اهبل
و منجيش نقول علي حاجات اكتر زي الاكل (ولا نسيتو يوسف بك والي-ولا المطاعم اللي بتجيب لحوم غير صالحه للاستهلاك الادمي و تتقفش-لما غالبا المعلوم مبيطلعش- و الادهي انهم يدارو اسمها في الجرايد-مع انه قتل عمد للمئات-و ميجيبوش اسامي غير صغار المتهمين و دول بقي بينكلو بيهم و بأسرهم مش بس اساميهم)
يا جماعه لو كان المفروض يكون عندك ولاء يبقي لله و رسوله انما بقي موضوع البلدان دي محدش يقول اصل دي بلدي لأنها بالأساس بلد البهوات اللي اغتصبوها مننا كشعب بالقوه و مازالو مسيطرين عليها بنفس السلاح سلاح القوه و البطش و الارهاب
ده كفايه كلمه انا مبتكلمش في السياسه اللي بتتطلع علينا ليل نهار في الاذاعات المرئيه و المسموعه, و ده لعمل غسيل مخ للشعب ان السياسه كخ و البعد عنها دح
دي السياسه لازم تكون من اولويات المواطن الشريف لأن بيها بيتحدد مصيره في حرب او سلم و ضرائبه و التطوير اللي هيوصله من تعليم و صحه و اسكان
يبقي ازاي يخزفو الناس من السياسه و هي دي قنه اتصال الناس بالدوله
هما مش عايزين مننا غير اننا نروح الشغل نقعد هناك شويه و نرجع بيوتنا منفكرش غير في رغيف العيش اللي هيتحط في بطننا لكن نفكر في حالنا او النهارده او بكره نبقي ساعتها بنحفر قبرنا
حد سئل نفسه ليه مفيش مبدعين او علماء في البلد؟
يمكن علشان اول ما الواحد بيروح بيدخل ينام من عذاب الزحام-سواء راكب عربيه ام لا كلنا واقفين في نفس الاشاره- يمكن كمان الواحد بينام ساعه ولا اتنين علشان يلحق يقوم يروح الشغلانه نمره اتنين و كل ده مش علشان يجيب مرسيدس موديل السنه بالعكش كل ده علشان يقضي مصاريف البيت لحد اخر الشهر
حد شاف اعلانات الضرايب فلوسك اولا؟؟؟
منين جاله وش اللي حط الاعلان ده انه يقولك فلوسك بنبني بيها كباري و طرق؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟
لو في احترام لعقولنا كانو حطو الميزانيه قدامنا في الجرنان و قالو خدو كام و صرفو كام و في ايه!!!!
و اهم نقطه صرفو كام و في ايه دي
لأن فلوسنا اللي بندفعها و اللي بتتاخد منا زي كهرباء السد العاي( مصدر طبيعي اهوه و يتبعلنا و بيتباع لنا!!!) ولا قناه السويس ولا غيره و غيره من سبل الدخل القومي كل الفلوس دي اظن تفرش طريق القاهره اسوان
يبقي الاخ الغير كريم اللي يقولك في الاعلان الكوبري ده تمنه معرفش ايه كام مليون!!!! هو انت قلتلي الاسفلت بكام و العمال بكام و خلافه انت جيت حطيت مبلغ و مطلوب مني اني اصقه و انا عارف انك كداب في اصل وشك
يا جماعه البلد حالها بقي مقرف
كفايه موضوع السياح و السياحه, حد فاكر رئيس فرنسا لما جه زياره و كانت صاحبته معاه و الهوجه اللي طلعت علي الموضوع ده؟!!!
و جري ايه بعدها؟ لازالت الفحشاء بيحميها القانون مادامت الاجساد اجنبيه لكن لو شاب و فتاه مصريين باسو بعض بس في الشارع يتقفشو و يتشدو علي القسم و تبقي فضيحه بجلاجل( قدام عيني و انا مره في القسم اتنين اتمسكو لسبب ده) طب منين بقي دول كخ و عيب و حرام و الفنادق بقت بتنجس الهواء ذات نفسه
تناقض و ازدواجيه في الحكم و كيل بمكيالين
ناس تموت في عرض البحر غرقا علشان باشا قبطان مش عايز يتراجع و يقر بالاهمال و الحريق
ناس تموت مفعوصه تحت صخور الاهمال و العشوائيه و قصر اليد و الحيله
فلوس بالملايين بتروح هدرا في تحديثات وهميه و بعدين المباني تولع بعد التحديثات و الترميم(مجلس شوري-المسرح)
شوارع و خدمات قاصره
غلاء فاحش ولا يمت للواقع و المرتبات بصله, في وزاره الصحه و اسمي دكتور و بشيل زكيبه فلوس علي ضهري كل اخر شهر( اللي هو مرتبي) ميكملش 400 جنيه بالحوافز و كافه المسميات بتاعتهم, طب بالذمه ييجي البيك الوزير وزير الصحه و ياخد مرتبي و يعيشني و يجوزني بيهم و مش عايز باقي منه!!!
انهه عقل واعي و سليم يفترض انك ممكن تعيش بالمرتب ده و بيدهولك و حاسس انه بيتفضل عليك و مطلوب انك تروح 6 ايام ده غير المسائي و تشتغل كشف و علاج لحوالي 20 30 مواطن كل يوم
ممكن المتب يكفي لو جرام الدهب بقي ب قرش صاغ فقط
لكن بالوضع الحالي يبقو مستنين ايه من الموظفين و العساكر و الامناء و كافه الموظفين الحكوميين الا السرقه و النهب و الرشوه و الفساد
واحد بيديلك جنيه باليمين و يقولك 10 جنيه مواصلات في اليوم يبقي بيقولك اتصرف انت بقي و ماليش دعوه ولا لاء؟؟؟؟؟؟
شباب
البلد دي علي رأي المثل (و ياريت الاداره تسيبه علي حاله لأنه بيعبر عن الواقع و من تعديلي الشخصي كمان!):
البلد دي اوسخ من غيرها
اي مكان بيحترمك كبني ادم و بيتيحلك فرصه عمل و حياه لائقه يبقي احسن من هنا
و الي الاخوه المغتربين اللي بيتكلمو عن اهوال الغربه لما ترجعو اجازه تبقو اعملو زياره لأي مستشفي عام او اي وسيله مواصلات او اي مكان عام و اتفرجو الناس عامله ازاي(و مش هقول مصلحه حكوميه علشان متنصعقوش) و بعد ده تبقو وازنز اهوال الغربه بالحاله هنا
و اللي اتكلمو انك تبقي قريب لاهلك في جنازه او فرح ارد و اقول ماهو ممكن حد من قرايبك في حاله صحيه تتطلب دخول المستشفي و تنزل انت و هو(لو حظه حلو و مش محتاج اسعاف) و تقعد انت و هو لغايه ما حالته تتدهور او يتوفاه الله لأن البيك معرفش مين معدي ولا موكب مين هيتعمل و الطريق مغلق!!!
اهوه موقف من حياتنا اليوميه دمر الحجه دي, ده انت ساعتها ممكن تولع في البلد او تمشي تكلم نفسك من هول الموقف
الحياه بره في الخليج او البلاد الاجنبيه مهما ان كانت صعبه الا انها كريمه و كرامتك بتبقي محفوظه و ده يساوي كتير
اكتر من شعار اللي شرب من نيلها و الكلام الاجوف ده
ده حتي اغنيه مشربتش من نيلها طلعت من واحده كانت بتسعي لنيل الجنسيه الامريكيه لبنتها, طب ليه بقي يا ست هانم و انتي بتتشدقي بغرام البلد و ترابها اهو عندك سفيه بقي
شباب ياريت المقارنات تبقي عمليه و صحيحه