رجل المستحيل ( انا من احد عشاقها ) خلاص مش هتنزل تاني و برضه ملف المستقبل لأن د . نبيل خلاص بطل
عرض للطباعة
هو بصراحة اللى عمل الموضوع كان لازم يقول انه لمواليد السبعينات علشان كان يلحق يشوف اللى حصل فى التمانينات زى حالاتى انا مواليد 74 وعلشان كدة فاكرة كل ده واكتر كمان
ياه و الله كانت ايام حلوه جدا
و خصوصا ملف المستقبل كنت بحبها جدا
بس و الله نبيل فاروق ده كان عبقري
و لما يشطح قوي و الدنيا تقفل في وشه الحل جاهز
"س-18 في خدمتك سيدي " :)
انا حتي الان عندي بتاع 250 عدد من ملف المستقبل و رجل المستحيل
تسلم ايديك فكرتنا بأيام الزمن الجميل
اقتباس:
دكتور احمد انا بقرأ دايما ملف المستقبل وع فى 2 والرجل المستحيل بس معرفش هيا اتعملت سنه كام وفى سلاسل جديدة بتنزل ولا لا..حضرتك تعرف؟؟مجرد باخد 4 قصص واخلصهم وابدلهم ب 4 غيرهم وبس
السلسلة إنتهت للأسف
هههههههههه
والله رجعتيني لايام المعيلة
اقولك شوية حاجات كمان
1- البسكويت ابو عجوة اللى الاتنين منه بشلن
2- ازازة السباتس اللى كان عليها رسمة الدبانة
3- البناطيل الشارلستون والقمصان اللى بياقة واصلة لغاية الصدر والشعر اللى عامل زي العشة وكانت موضة ايام الخطيب وشطة
4- معاكسة البنات في جنينة الاورمان وجنينة الحيوانات
اه صحيح الجنينة زمان كان فيها حيوانات بيتفرج عليها البني ادمين
دلوقت فيها بني ادمين بيتفرجوا على بني ادمين بعد ما ماتت معظم الحيوانات ومجددوش فيها
5- ايام مكانش فيه اي عمارة عل ىالنيل اكتر من 5 ولا 6 ادوار
6- ايام لما كان الواحد ياخد مصروف 5 جنيه في الشهر يبقي هاين عليه يدي اصحابه على قفاهم لانه بياخد اعلى مصروف فيهم
7- ايام لما كان الشعب المصري بيركب كله اتوبيسات النقل العام اللى بشلن والمريش شوية يركب 28 ويا سلام بقة لو معاه حتة بيجو 79 يبقي برنس
8- ايام لما كان مش بيدخل المدارس الخاصة غير العيال الفاشلة والشطجار كلهم بيدخلوا مدارس الحكومة
9- لما كان حلم كل طالب جيزاوي يدخل مدرسة السعيدية علشان اشهرمدرسة فيكي يا مصر هي والخديوية واوائل الثانوية العامة منهم
دلوقت ربنا يرحم الطلبة اللى فيها
10- ايام لما كان الواحد لو عدا السكة الحديد الفاصلة بين ما يسمي لان فيصل والهرم لميدان الجيزة يبقي كانه كريستوفر كلولومبس بيكتشف العالم الجديد
11- ايام لما كان الترماي ابو سنجة اخره عند شركة موتسيان بتاعة السجاير والعيال الغتتة تشد الحبل وتوقع السنجة
12- لما كان عماد عبد الحليم هو مطرب الشباب وعمر فتحي هو النجم فكرينه بتاع اغنية على ايدك اتعلمنا على ايدك والله سهرنا الله يرحمه
13- لما كان اللى بيجيب 75% في الثانوية العامة يحط رجل على رجل ويدخل الكلية اللى تعجبه
اه والفضيحة بتاعة اعلان النتيجة في الراديو والكل يتسمر جنب الراديو مستني رقمه او مستني رقم جاره علشان يطمن انه جاب اكتر منه
14- ايام لما كان التلفزيون الاساسي هو الابيض والاسود والتلاجة الايديال ال8 قدم بالحجز بالسنة والسنتين واللى يدفع بالعملة الصعبة ياخدها بعد شهرين تلاتة
يووووووووووه
اقول ايه ولا ايه بس
كانت ايام
ياه يا كايرو شايل فى قلبك كل ده وساكت
المهم تكون استلمت التلاجة اوعى تقول لسة انا استلمتها الاسبوع اللى فات
طيب بجملة الذكريات بقى فاكرين منى عبد الغنى وهى بتتنفض زى الكليم فى اغنيتها المعجزة يللا يا اصحاب
كان معاها علاء عبد الخالق والبنت المسلوعة ايام فريق الاصدقاء
بس كانت بالنسبة لنا ايامها ولا شاكيرا اليومين دول