لدى رينو كليو موديل 2002 الشكل الجديد زز كنت جايبها من الزيرو و لسة معايا الى الان
بس بفكر ابيعها و اجيب اوبترا مع انى متحفظ على النقطة دى بس عاوز اغير مش اكتر ..
المهم :
تجربتى الشخصية مع السيارة منذ اكثر من خمس سنوات ...الخلاصة السيارة اكثر اكثر من ممتازة
العربية عاملة معاية لغايت دلوقتى 110 الف كيلو و معملتش فيها حاجة غير انى بعملها الصيانة بتعتها وفى وقتها الظبوط (العربيات الفرنساوى كلها بتبقى محتاجة صيانة دورة ومظبوطة لو عملت كدة العربية هتحبك و مش هتغير فيها حاجة خالص )

انطباعى عن السيارة :

السيارة عالية عن الارض بالرغم انها عالية فثباتها ممتاااز ممتااز و مناورتها داخل المدن حلوة جدا و هتشدك للجرى
الباور بتاعها ناشف شوية مش ناعم زى الكورولا مثلا بس الميزة انة بيدلك تحكم حلو فى المناورة
وكمان قطر لف دوران الدريكسيون واسع بيخليك تناور و تركن كويس اوى بمعنى
ان ممكن فى شواريع الداخلية بتاعت مصر الحلوة دة تلف حولين نفسك من غير ماترجع و لا تطلع بظهرك و دى ميزة بحبها جدا جدا جدا جدا فى الكليو مع ملاحظة انى عندى سيارة اخر اوبل فكترا موديل 98 .. وبسوق الاتنين كتيير
اللى اقولة انى بحب اركب الكليو اكتر من الاوبل ..مش عارف بحس كدة انها سلسلة و حلوة فى المناورة واريح من الاوبل دة غير انها بتبقى نفس ثبات الاوبل و يكم احسن لغايت سرعة 130 كيلو بعد ال130 كيلو الاوبل تكسب ..بس الكليو لغايت 130 ثباتها ممتع واقوى من اى فئة اخرى

التوكيل ....
ناس كويسين ومحترمين و هيقوللوك كل حاجة بصدق و مبيبخلوش على العربية بحاجة
و كمان اقولكم على سر .. انا بتعامل مع التوكيل بتاع طريق مصر اسماعيلية ..ميزة انى اعرف كل الناس اللى فى و كمان بتبقى واقف جنب العربية و بتشوف بيحصل فيها اية و كمان ممكن ترخص من المصنعية .. من الاخر كأنك واقف مع ميكانيكى ..بس ميكانيكى نظيف و فاهم فى العربية
اسعار قطع الغيار تعتبر معقولة .. مش عارف لية الناس بتقول انها غالية ..وهديكم مثال لبعض الاسعار و مقارنة باسعار اخرى لموديلات اخرى
عندك تيل الفرامل الامامى 260 جنية وتزود علية 30 جنية تركيب فى التوكيل اللى هو حبيبنا
فلتر هوا 60 جنية
فلتر بنزين 70 جبنبة
طنابير 650 جنية و ممكن تزود 100 كمان وبيدوك خصم 150 على التيل كمان :)
الفوانيس فى منها تركى امامى بى 450 جنية و فرنساوى بقلاب ب 1100 جنبة
و دة يعتبر رخيص على فانوس قوى ومبيتكسرش بسهولها و كمان فى قلاب يعنى بتتحكم فى ارتفاع النور
الاكصدام الفيبر تركى 400 جنية فرنساوى 900 جنية

مقارنة بعربية زى اللانسر هتلاقى اللانسر اغلى ب 30 % و الكليو هتديك نفسك الكفاءة
مقارنة بالالنترا موديل 2004 - 2005 اللانترا اغلى 10 % و الكليو بدوا تديك كفاءة احسن من الهيونداى و عمر افتراضى اكتر

مقارنة بالاوبل الاوبل فكترا اغلى 50 % بس الاوبل ليها مميزات تانبة فى ان الثبات بيبقى اقوى على سعات بعد 130 بعكس الكليو

تجربتى مع التهور :

السيارة ممتعة فى الجرى و خصوصا هتحس بالمتعة لما تيجى تسافر و خصوصا على طريق العين السخنة
بالرغم ان السيارة 1200 بس سحبها حلو اوى لانها عربية خفيفة بس العجيب انك عمرك متحس انها خفيفة هتحس العكس انها مكلبشة فى الارض فى المناورة و الحركة
السيارة لحد 130 فى السفر حلوة اوى وثابتة جدا انما بعد ال140 ابتدى خد بالك و امسك الدريكسيون بأيدك الاتنين بس بردو ثابتة بس بتحس انها ابتدت تخف
على ال 150 هتخف معاالك و هتبدى تخاف شوية
160 نفس احساس ال 150 حاسيس انها خفيفة بس بردو مطمن
170 هتحس انها خفت اوى بس بردوو بدام ماسك الدريكسون كويس فأطمن
معدتش السرعة دى بيها بس العربية فى كل النواحى عفشتة ثابتة على الارض

العفشة :
العربية عاملة معاية 110 الف كيلو و من ساعت مجبتها التوكيل حتى مفكرش يربطهالى
لانها مش محتاجة ..عفشة خدمة شاقة وهادية على المطبات

المأخذ :
ديقة من ورة يعنى لو انت شاب و بتحب تفخد وترجع الكرسى لورة محدش هيعرف يعد وراك
مستحيل تعمل الميكانية بتاعتها برة عشان محدش بيفهم فيها وبيخافو يتعملو معاها
بس دى ميزة انا شايفها ان ( محدش يفتى غير اللى عندو خبرة و كل عربية وليها توكيلها و ليها ناسها )
الدريكسون مبيطلعش و مبينزلش يعنى متعرفش تظبط ارتفاعو
غير كدة مافيش مأخذ تانية

البنزين :
حطيط بنزين ب 20 جنية --- يعنى 14 لتر روحت بيها اسكندرية و لفيت هنالك
ورحت المعمورة و بعدين حطيت تانى
هسبكم تحسبوها
يعنى عملت معايا بتاع حوالى 280 كيلو ال 14 لتر
يعنى الاستهلاك اللة واكبر تحفة

انا شايف انها احسن سيارة فة فئتها اورخص سعر شراء و احسن تمن واكتر سيارة معمرة
لو حد عاوز يسألنى انا موجود .