الموضوع: حشتري بولو وخايف يتنصب عليا

المشاركة الأصلية كتبت بواسطة FrozenFire

السلام عليكم يا رجالة
باختصار عشان ما أطولشي عليكم بقالي مدة بدور على عربية جميلة وشيك ومحترمة أبدأ بيها حياتي وفي نفس الوقت مريحة واقتصادية فلقيت مافيش أحسن من البولو.
المهم إن قدامي بولو 2001 1400 سي سي أوتوماتيك عاملة حوالي 100 ألف كيلو وواضح إن حالتها حلوة ومطلوب فيها 50 ألف، ولكن أنا قريت كتير في المنتديات على كمية النصب اللي بتحصل على الناس عشان كده عايز منكم شوية إستفسارات،
أحب أقولك ان مفيش بولو 2001 فابريكه موتور 1400 وأتوماتيك الموتور دا متسقط ومش بعيد يكون العداد كمان متغير لأن فى بعض المواتير بيبقى كود الحمايه على العداد ونظرا لحاله السوق عندنا اللى بيعتبر تسقيط المواتير عيب فدا يقلل من ثمن العربيه ومتسويش 50 كبيرها 44 الف ودا عشان موضوع التسقيط اللى مش مضمون يكون معمول بنضافه
1 المكان اللي أروح أعمل فيه فحص شامل على العربية ويدوني تفاصيل بكل صغيرة وكبيرة في العربية وياريت لو كان التوكيل؟عايز تفحص العربيه كويس روح لمحمد سمير او هانى سمير فى ش الأربعين جسر السويس بس حاول تعرف الأول من صاحب العربيه مسقط عند مين
2 إيه هي الحاجات اللي من وجهة نظركم أول ما أشوفها في العربية أبعد عن العربية وما أشتريهاش؟\
لو العربيه رشه دواخل أو لو الضفيره بتاعت الكهرباء بتاعت الموتور شكلها مش ولابد دا معناه أنها متسقطه أى كلام
3 السعر ده العربية تستاهله ولا لأ؟
لأ من وجه نظر السوق المصرى العقيم اللى بيعتبر اللعربيه المسقطه موتور معيوبه

4 والأهم، أنا قريت هنا كتير قوي عن العربية دي ومعظمهم 1000 سي سي ومانيوال وبعدين بيسقطوا لها موتور وفيتيس أوتوماتيك وبصراحة أنا خايف من اللعب ده، إزاي بقى أعرف إن دي جاية زيرو كده أو إن صاحبها لعب فيها؟ وياترى لوكان فعلا هو مسقط موتور أتكل على الله وما أخافشي ولا بلاش؟
مفيش فى مصر بولو 2001 فابريكه 1400 كلو مسقط وأنا أولهم هههههههههههههههه
بصراحة أنا عاجبني فيكم التعاون بينكم ومساعدتكم لبعض فياريت تساعدوني عشان ربنا يسهل وأبقى من العيلة :)تحت أمرك فى أى وقت وربنا يوفقك أن شاء الله ولو أنت قريب من منطقه الهرم أنا مستعد أكشفلك عليها
والسلام ختام

المشاركة الأصلية كتبت بواسطة frozenfire

أستاذ m. Mostafa شاكر جدا إهتمامك وعلى فكرة أنا قرأت لك مشاركات تانية كتييييير على المنتدى وعارف إنك أستاذ ورئيس قسم في تخصص البولو :)
بس برضه ما قولتيليش هل تسقيط الموتور والفيتيس الأوتوماتيك مافيش خوف منه ولا أخليني في ال1000 سي سي وخلاص وياترى كل يومين بقى حروح بقى للصيانة والمكيانيكية ولا حتبقى عادي زيها زي الفبريكة تتعمل لها الصيانة بتاعتها في مواعيدها
ياريت الإفادة.
والسلام ختام

لو متسقطه نضيف مش هيبقى فى منها اى مشاكل وهتمشى زيك زى اى عربيه وأحسن كمان لأنها بموتور أقوى لكن لو شغل عك يبقى هتلففك السبع لفات وياريت تعرف هى 1400 16 صباب ولا 8 صباب لأن دا يفرق كتير فى فرق 10 حصان على الأقل فى الموضوع
وزى ما قلتلك لو قريب من الهرم أنا ممكن أبصلك عليها وأقولك على الخلاصه
وأحب أقولك السعر ده لازم ينزل شويه ولازم صاحب العربيه يبقى عارف انك فاهم كويس انها متسقطلها موتور

طيب قولو انا عايز رقم الشاسيه حروف وأرقام من على صدر العربيه عشان أتأكد بعد أذنك وهاتو وانا هجيبلك أصل وفصل العربيه دى وعلى فكره هتلاقيه أتحمق لما تقولو هاتلى رقم الشاسيه كامل وبأكد عليك مره تانيه هاتو حروف وأرقام وياريت تقولى هى العربيه دى لونها أيه من فضلك وأدينى مواصفات عنها أكتر