النهارده روحت صيانه 5000 فى مركز صيانه العبور انا كنت رايح ومشبع بالسمعه اللى مش كويسه بتاعه مركز صيانه المقطم والشكاوى اللى اثيرت حوله اخيرا يعنى من الاخر رايح اتخانق ميعاد الصيانه 8.30 انا وصلت على الساعه 8 السكه سهله وماتتوهش انا اول مره اروح بس وصلت علاطول هما اساسا مغرقين العبور لوحات ارشاديه لسهوله الوصول , وصلت تقريبا 8 ماحدش كان هناك غير بتاع الامن , انا رايح ومعايا لسته مكتوبه للشكاوى اللى عندى
1- عضه المارشدير
2- نور الصالون اللى بينور لوحده
3- نتشه التكييف
4- صهد عند الدواسات

كل الاعراض التقليديه لكل العربيات اللوجان ورايح وتقريبا متاكد انهم مش هيعملوا حاجه منها غير نور الصالون.

وصل المهندسين استقبلنى مهندس بشوش مبتسم اسمه خالد واخد بيانات العربيه وقلتله على المشاكل وانا تعمدت انى اقول المشاكل من الاهم للاقل اهميه بالنسبه لى علشان ماتخانقش لقيته كل ما اقول على حاجه يقول حاضر المرشدير فى قطعه بتركب فى الضمان بس العربيه هتقعد لغايه 2.30 , الصهد قالى مافيش مشاكل هنركبلك عزل
نتشه التكييف هنظبط الفريون , نور الصالون هنظبطه .

من غير اى تحوير ولا تنطيط وبكل ادب واحترام وابتسامه تكسر اى خناقات كنت متوقع انها تحصل .

لما قالى على موضوع 2.30 قالى فى عربيه بتنزل الساعه 10.30 لو احب انزل معاها فى اى مكان بس انا لقيت كده كده اليوم اضرب فمرحتش فى حته وقعدت مستنى .

الاستراحه نضيفه شاى, قهوه, نسكافيه, وكانز وباسعار ارخص من اى مكان , احلى حاجه عجبتنى واحترمتهم قوى عليها انهم حاطين مصاحف فى الاستراحه .

قضيت الوقت مابين القراءه والنت (wi fi) وبعض المشروبات بصيت على الداستر والسكالا والفلونس .

الساعه 12.30 ندهلى المهندس / خالد وقالى ان العربيه خلصت وكل حاجه زى الفل واخدت ايصال ومدفعتش ولا مليم واستنيت لما العربيه اتغسلت والراجل جابهالى بنفسه لغايه الباب حقيقى مهندس محترم جدا ربنا يكتر من امثاله واضح ان كل مهندسين الصيانه اللى اسمهم خالد محترمين جدا .

ملحوظه مهمه قوى معرفش صحتها ايه انا طلبت ان الموتور يتغسل قالى مابنغسلش الموتور ولا حتى كيميائى علشان الحساسات ماتبوظش وسألته انضفه ازاى قالى بضغط الهواء فقط مش عارف مدى صحه المعلومه دى ما العربيات الجديده كلها حساسات وكمبيوتر وبتتغسل عادى اشمعنا اللوجان يعنى .

فى النهايه اقدر اقول شكرا توكيل صيانه رينو فى العبور وشكرا المهندس خالد وفعلا رينو اجدع ناس :b4_388: