الموضوع: كفاية بقي أستهتار بأرواحنا يا عالم

المشاركة الأصلية كتبت بواسطة se_coralsea

الاخوة الكرام أعضاء منتدي نايل موتورز الموقر ..

أسعد الله مسائكم بكل الخير ...

- بالامس طالعتنا الاخبار الغير سارة بالطبع بحادث الدائري الجديد و كان السبب الرئيسي به سيارة نقل بمقطورة تتفادي سيارة أو مركبة أخري تسير في الاتجاه العكسي حسب ماذكر أحد شهود العيان
- و اليوم صباحا (حوالي الساعة التاسعة) شاهدت حادث أخر مروع في منتصف طريق السويس الصحراوي ابطاله سيارة نقل (قلاب) و سيارة ألنترا و طبعا معالم الالنترا مختفية و يبدوا أن النقل تعرضت للأنقلاب و جاءت الالنترا تحتها

- و أثناء رحلة العودة مساء شاهدت عدد أخر من سيارات النقل علي مسافات متفرقة مقلوبة علي جانب الطريق

-طيب لحد أمتي هذا النزيف الدامي ؟؟
- أليس من المفترض أن القانون الجديد ألغي المقطورة و لأسباب سياسية أو أقتصادية أو أخري لايعلمها أحد تم مد العمل بهذه الالات القاتلة سنتين أخريين لتحصد المزيد من الارواح ؟
- ألم يفرض القانون الجديد عقوبة الحبس علي كل من يمشي مخالفا بالسير عكس الاتجاه و مع ذلك تكررت الحوادث الناتجة عن هذه المخالفات ؟

- لحد امتي ستظل الحكومة و رجال المرور مغمضين عيونهم عن مثل تلك المخالفات ؟
- الي متي سيظل الاهمال مسيطر علي كافة الطرق المصرية ليتسبب سوء تصميم و تخطيط الطرق في المزيد من الحوادث كل يوم
- الي متي سنعاني من الاستهتار و الاهمال و تصبح رحلاتنا اليومية الي العمل و العودة أشبه بمهمة مستحيلة أو أنتحارية ؟؟

أسئلة في حاجة الي أجابة سريعة
و ياليتنا نستطجيع أن نوجهها الي المسؤلين لنعرف الاجابة هذا أن كان هناك اجابة

مع خالص تحياتي
م/ سمير الشهاوي

المشكلة عندنا ان القوانين بتتحط لجباية الفلوس .. يعنى مش علشان الدنيا تتنظم .. هما بيحطوا القوانين اللى تملأ الخزانة بتاعة الدولة .. يعنى علشان يزوددوا موارد الدولة .. فما تتعبش نفسك .. اولادك اولى بتفكيرك و صحتك ..

ربنا يرحمنا والله
انا امبارح كنت على الدائرى وقت الحادث
و شفت امبارح ما لا يقل عن 5 او6 حوادث مختلفه فى الدائرى فقط
انا والله اخدت عهد على نفسى انى اقود بحرص و مزودش السرعه الا لو كنت لوحدى على الطريق
ياريت كلنا نلتزم يا جماعه لانها حايتنا وممتلكاتنا وربنا هيحاسبنا ويسألنا عنها

الحل اللي انا شايفه هو عقاب رادع لسلوك السائقين ( ملاكي - اجرة - نقل ) على الطريق
حتى لو النقل ب 100 مقطورة سلوك السواق هو الاهم
و سلوك البني آدمين اللي راكبين عربيات ملاكي هو الأهم
و سلوك الكائنات اللي راكبة أجرة هو الأهم من أي تعديل في قانون أو إلغاء مقطورة
يعني لما حضرتك تمشي في الحارة المخصصة لك و متقعدش تتجاوز في اللي امامك و تكون مقفل ال 150 بدون سبب و تكون عمال تتنطط و تاخد غرز على الفاضي ( بمناسبة الغرز مرة كنت راكب سوبرجيت و واحد تيييييييييت بنوبيرا عايز ياخد غرزة بين الاتوبيس و عربية نقل امامه في منطقة متعديش العربية خالص و كان هيبقى تونة مهروسة لولا ستر ربنا) و النقل يمشي في يمينه ساعتها احنا ممكن نطمن

المشكله فى السلوكيات فعلا
مظنش اننا محتاجين قوانين اكتر من الموجوده حاليا

المشكلة ليها اكتر من جانب ,
.... بالنسبة لقائدي النقل أو الميكروباص أو الملاكي , احنا محتاجين حملة لتغيير ثقافة الناس دي كلها ,
الناس بقت فاكرة انها شطارة انها توصل بسرعة , و بالتالي :
النقل بيتخطى السرعة المحددة ليه و بيمشي في الشمال ,
الميكروباص بيمشي بسرعة مبالغة و بياخدها قياسة طول الطريق شمال فيمين في شمال , و يوقف في أي حتى و في أي مكان ,
و الملاكي : تلاقي الناس مش طايقة بعض و مفيش أي احترام لقوانين المرور و بيقلد الميكروباص في طريق المشي بتاعته ,
حتى الموتوسيكل : ماشي في اقصى الشمال أو في منتصف الطريق , مش همه حياته و فاكرها فهلوة و شطاره انه رايح جاي و يعدي الرصيف من أي مكان ,
.... بالنسبة للقوانين فهي موجودة بس المشكلة في التطبيق ,
المشكلة في الناس اللي بتستخدم السلطة في غير محلها و عايزة تستفيد بأي شكل و عايزة تلم فلوس بأي وسيلة ,
.... حتى في وحدات المرور هتلاقي التخلف و الطوابير و عدم النظام و برده الناس اللي عايزة اكراميات سواء بسبب أو من غير ...
.... بالنسبة للطريق نفسه اللي مليان حفر و نقر و فواصل بايظة و مطبات عشوائية و غير مطابقة للمواصفات و اسفلت مموج كدليل على سوء الخامات و سوء التنفيذ , و ده بيبقى سبب علشان الناس تحاول تتفادي الحاجت دي فتلاقيها عمالة تهدي فجأة علشان حفرة أو ناس تلاقيها فجأة حدفت يمين او شمال علشان الحاجات الجميلة دي ,

بص المنظومة كلها بايظة من الناس سواء اللي راكبة أو ماشية على رجليها و للحكومة اللي الفساد بقى مستشري فيها , للقوانين اللي بتتطبق على ناس و ناس أو مش بتطبق خالص ,

طب و الحل ,,,
أولاً نبدأ بأنفسنا و نحاول نلتزم بالقوانين و اعتقد إن الإلتزام بالقوانين يجب أن ينبع من التزامنا بدينا,
ثانياً الإعلام عليه دور لتغيير ثقافة مخالفة القوانين و للتأثير في الناس اللي بتعمل كل حاجة غلط طالما مفيش امين شرطة ,
ثالثاً الحكومة عليها دور لتفعيل القوانين سواء بإنشاء أجهزة لمراقبة القائمين على تنفيذ القوانين , بوضع رادارات في كل الطرق بالإضافة لكاميرات مراقبة علشان الناس لما بتلاقي حاجة زي كده حتى لو مش شغالة بتلاقيها بتلتزم , كاميرات في وحدات المرور و الهيئات الحكومية لمراقبة الموظفين أنفسهم , بمراجعة سياسات إنشاء الطرق و الكباري و صيانتها لأن بيحصل لعب كتييير في الحاجات دي ....

معلش طولت عليكم اصل الواحد معبي ......................