هتوحشني :'(

**Eng.Geo** · 21-07-2010 06:37 PM

انا مخنوق ومش قادر أخد نفسي من كتر الخنقة

حاسس اني في نهايتي

بقالي 3 أيام مش بتكلم نهائيا وبخطرف بالليل

ومش قادر أعمل حاجة من كتر الحزن

وقلت أكتب وأشاركوا يمكن أخرج من المود ده

انا من 3 أيام كنت عامل موضوع هنا في الأجتماعي وكان مودي عالي جدا وكان اليوم جميل

وكنت نازل أكتوبر بالليل عند قرايبي عشان عندي تدريب في مصنع تاني يوم الصبح

لقيت واحد صاحبي جدااا بيكلمني ويقولي مش ناوي تخرج قولتله فين

قالي نازل أكتوبر

قلتله مانا كمان نازل بالليل شوية

قالي مش هينفع أتأخر أكتر من كدة

قلتله ثواني ونازل بس لازم أخد عربيتي معايا

قالي طاب بسرعة

جهزت نفسي ونزلت لقيته بعربيته ( كريستالة ) مستنيني تحت

( طريقة سواقتي مع صحابي : كنت ببقي محفظهم كذا حاجة كدة بعرف منها بنبقي عايزين ايه من بعض ... يعني مثلا نبقي مشايين ورا بعض و انا قدام أخد غرزة و وابطأ اللي ورايا و أدي أشارة لصاحبي يقوم معدي قدامي وهكذا كل واحد بيوسع للتاني وبالأشارات بنعرف نوايا بعض )

بعد مالقيته مستني رحت راكب عربيتي ومشينا مع بعض وانا كان معايا واحد كمان صاحبنا في عربيتي

طلعنا الدائري وكان وقتها زحمة وكنا بناكل الطريق عشان مانتأخرش وجينا عند حته معينه

كنا علي كوبري من بتوع الدائري ( اللي بيبقي فيه سور حديد ورصيف )

وانا ورا نقل في الحارة التانية من اليمين وهوعلي شمال

أداني واحد يمين عشان أعرف يميني عامل أيه بصيت لقيته كويس و أدينه تقليبة نور ووسعتله سنه عشان هشد وراه

هو دخل يمين ولكن فجأة راحت حادفة منه دخل في الرصيف وطلت أول عجلة وطبعا ضربت وتاني عجله طالعه لسة راح جايب شمال جامد نزل من الرصيف راحت مقلوبة

قبل ما تتقلب علي طول كنت انا وراه وجالي تفكير اني أخبطه من ورا جامد عشان ما يتقلبش

ولكن كان فات الأوان :(

انا والله لو لحقت كنت هنقذه بس أعمل أيه :((((((((

ضربت فرامل جامد وركنت علي جمب أشوفه

العربيه مش باين ملامح خالص

ببص جوة لقيت دم كتييييييير وهو باصصلي وبيقولي هتوحشني

سمعتها من هنا ومبقتش عارف أتلم علي نفسي

صاحبي اللي معايا كلم الأسعاف وعربية تنقل العربية

الأسعاف خد حوالي 10 دقايق

والنقل جه بعديه علي طول

دخل الأسعاف وهو تقريبا خلصان وركب صاحبي معاه

انا أستنيت مع النقل عشان ينقلها لبيته

وانا في الطريق كلمني صاحبي بيقولي البقية في حياتك

انا أنهرت أكتر وركنت والنقل ركن يشوفني بس انا كنت خلاص بيغمي عليا

والده طبعا و أهله كانوا عرفوا

وودينا العربية لبيته

وهو كمان باباه أستلمه

بس أنا مقدرتش أروح معاهم المدافن

ومن ساعتها وانا مش قادر أرد علي حد

وحالتي وحشة جدا

وحاسس هحصله ان شاء الله قريب

ربنا يرحمك يا أحمد :’(

انا هبطل سواقة

ومش عايز أركب عربيات تاني

وكرهت كل حاجة

ربنا يصبر أهله ويرحمه

سلام يا أحمد :’((

**NoRmAl** · 21-07-2010 06:44 PM

معلش يا جورج ودا حال الدنيا
حاول ترفح عن نفسك وتسافر مثلا مع أسرتك
الموضوع مش سهل أنا عارف لكن إن شاء الله الوقت هيلعب دوره
ربنا يرحمه ويصبر أهله ويجعل مسواه الجنه إن شاء الله

**Ahmed A Rahman** · 21-07-2010 06:48 PM

البقاء لله يا باشمهندس جورج

ربنا يرحمه إن شاء الله

امسك اعصابك وحاول تبقى على مودة مع اسرته عشان تخفف عنهم

الموضوع هزني وده حيخليني اخد بالي على الطريق حتى لو كنت محترف

البقاء لله

دي بعض النصائح حتى لا تصاب بارهاق ما بعد الصدمة (Post traumatic stress syndrome)
1. تجنب التفكير في الحادث على اد ما تقدر
2. حاول تشغل نفسك في الشغل جامد يعني لو عندك فرصة تشتغل صبح وليل اشتغل صبح وليل
3. لا تحاول المرور من نفس مكان الحادث على قدر الامكان
4. لو امكن الخروج والتنزه في اماكن جديدة مكنتوش رحتوها مع بعض ويكون الخروج مع العائلة وليس مع الاصحاب
5. لو فيه اي مشكلة انا تحت امرك

**omar-saad** · 21-07-2010 06:58 PM

لا اله الا الله
اللهم اغفر له واحسن خاتكته واجعله من اهل الجنة
وربنا يصبرك يا باشمهندس

**N.a.j.d** · 21-07-2010 07:02 PM

لا حول ولا قوه الا بالله
ربنا يصبرك ياريس
ويكون ف عونك ويرحمنا جميعا

**adel_2346** · 21-07-2010 07:06 PM

الله كلمت هتوحشنى دى خلت عنيا تدمع رغم انى ولا شوفته ولا شوفتك
ربنا يصبر اهله ويرحمه

**abo_hosni** · 21-07-2010 07:15 PM

ربنا يصبر أهله و يصبرك

**M.Osman** · 21-07-2010 07:19 PM

ربنا يصبرك يا جورج و يصبر اهله

حاجة صعبة طبعاً ربنا معاك

**fathi_8290** · 21-07-2010 07:19 PM

الله يرحمه
ده قضاء الله وقدره
ودي ساعته وكان ممكن يموت في أي مكان تاني
قاله الله تعالي : " أَيْنَمَا تَكُونُوا يُدْرِكُكُمُ الْمَوْتُ وَلَوْ كُنْتُمْ فِي بُرُوجٍ مُشَيَّدَةٍ " صدق الله العظيم
ربنا يرحمه ويغفر له إن شاء الله
وانت شد حيلك وكل من عليها فان

العضو الفاضل الرجاء تحرى الدقة عند كتابة آيات القرآن الكريم
مشرف عام 4