طلب مساعدة من اللي اتجوزوا خلاااااااص

**ainshouka** · 18-09-2010 01:48 AM

مش عارف هي مواضيع الجواز ملت الأجتماعي أوي كده ليه :)

فأنا كنت عاوز نصيحة الناس اللي اتجوزت في موضوع محيرني

دلوقتي في واحدة قدامي اهلي وأنا شايفين أنها كويسة وهما عاوزني أمشي في الموضوع

بس المشكلة هي إني داخل علي مصاريف كتير منها مصاريف دراسات وجزء من مصاريف شقة

فطبعا لقيت إنه بالعقل كده العملية مش نافعة

لكن هما شايفين إنها كويسة وخسارة إني ممشيش في الموضوع والفلوس يبقي ربنا يدبرها

زي ماالحديث بيقول ثلاثة حق علي الله عونهم

أنا الواحد كان لاغي الجواز من دماغي لغاية مقدر أقف علي رجلي شوية

إنتوا إيه رأيكم

أخليني ماشي بدماغي ولا امشي في الموضوع

وشكرا ليكم علي مساعدتكم

**m_car** · 18-09-2010 01:52 AM

والله يا باشا تسمع كلامى ممكن يبقى صح او غلط

متدخل موضوع الجواز الا وانت شايف نفسك مؤهل اولا مديا ثانيا معنويا

وللاسف فى الزمن ده مديا اكتر لان الحب والمعانى بقت اشياء ثانوية ومهمة بردة بس متتجوزش الا لما تقف على رجلك

وصلى صلاة استخارة

**AlGazar2** · 18-09-2010 01:55 AM

صلى استخارة و امشى فى الموضوع و لو فيه خير هاتلاقى الفلوس بتيجى لوحدها و الموضوع بيخلص بسرعة لو مافيش مش هايتم الموضوع و هاتلاقى عقبات كتير فى طريقك

**kangaro** · 18-09-2010 01:59 AM

اعمل استخارة وتوكل على الله .. الغني بيتجوز والفقير بيتجوز
(انت عندك كام سنة ؟)

**pro_samir** · 18-09-2010 03:53 AM

استخير وشوفها لو ارتاحتلها وعجبتك قولهم انك قدامك شوية وقت علي ما تجهز

**alaasaid** · 18-09-2010 11:11 AM

السلام عليكم ,

أنا متجوز من سنتين و مكنش معايا لا فلوس و لا عندى شقة بس لما نويت و بدأت فى الموضوع بفضل الله الامور كلها مشيت و ربنا سبحانه و تعالى سهل الامور لدرجة انى مش عارف انا اتجوزت ازاى لحد دلوقتى .

من الاخر طالما انت ناوى على خير ربنا هيسهلك كل الامور من حيث لا تحتسب و هيرزقك و يوسع عليك ان شاء الله

**makka** · 18-09-2010 11:25 AM

بص زى الناس ما بيقولولك كده انا دخلت بيت اخطب منه وانا مديون فى 5000 جنيه طلبوا منى شبكة 20 الف وانا اصلا مديون ؟! المهم فى قراية الفاتحة جبت دهب بـ5000 جنيه محبس وخاتم وتوينز وقلتلهم الشبكه مع كتب الكتاب وفعلا كتبت الكتاب بعد شهرين وجبت شبكه بـ15000 كملت للعشرين وشطبت شقتى وجبت الاثاث واتجوزت بعد كتب الكتاب بـ 6 شهور وبعد الجواز بشهر ببص لقيت معايا 6000 جنيه تقولى ازاى منين الله اعلم وعلى فكرة انا اتجوزت انسانة الحمد لله مفيش احسن من كده.
نصيحتى ليك طالما ان الانسانة دى كويسة ربنا هييسهلك امورك اولا لانك شاب وبالجواز هتبنى اسرة فهتعف نفسك عن نظرة كده ولا كده وكمان هتكون السبب فى ان فلانه اتجوزتك انت "على اساس انك شخص محترم" متجوزتش حد تانى ممكن يبهدلها او يهينها فربنا هيكرمك اوى.

**ashraf_msd** · 18-09-2010 11:31 AM

انا اتجوزت من سنتين في ايجار جديد وما كنش عندي شقه وكل اللي عليا جبته قسط

والحمد لله عندي ابن دلوقتي واشتريت شقه وسديت ديوني بفضل الله

ربنا بيعين الساعي للزواج بجد

بس في حاجه.......

انا كنت عارف ان خلال سنتين هقدر انجز التزماتي ... و تعبت قوي بعد الجواز عشان اعرف اجيب الشقه الصراحة

الألتزمات دي سواء جبتها قبل الجواز او بعده هتفضل عليك عليك

انما لو مافيش خطه في دماغك ... وشايف انه من الصعب عليك تحقيق عوامل الاستقرار المادي كجواز ... فما ينفعش تربط بنت الناس معاك ... واصبر شويه لحد ما توصل لنقطه تعرف فيها انك هتقدر تقوم بالألتزمات الماديه تجاه جوازك و بيتك

**kamalsalem** · 18-09-2010 11:48 AM

بص انا زي الناس دي كلها رحت اخطب وانا مديون ب 15000 جنيه وعاااادي اتجوزت ف شقة ملك وغيرت عربيتي

استخير ولو الموضوع فيه خير ربنا هيمشيها من عنده.. بس انا بصراحة بلوم عليك حاجة.. انك عارف الحديث الشريف وعارف انه رزقك على الله و بتسألنا احنا.. يعني كلام ربنا مش اتقل وزناً من كلامنا كلنا على بعض؟ انا بقول الكلام ده بابتسامة كبيرة على وشي وارجو انك تقبله بابتسامة برضه

-

الموضوع: طلب مساعدة من اللي اتجوزوا خلاااااااص

LinkBack

أدوات الموضوع

عرض

طلب مساعدة من اللي اتجوزوا خلاااااااص - انشر الموضوع فى :

-

-

-

-

-

المواضيع المتشابهه

اعمل ايه مع البنزين انا قرفت خلاااااااص !!!!

انا تعبت خلاااااااص

ياجماعة انا تعبت خلاااااااص جيبت اخري العربية اتشوهت وهي وقفة

محتاج مساعدة من الاخوة اللي في قطر

يوميات اتنين اتجوزوا من ع النت

الكلمات الدلالية لهذا الموضوع

المفضلات

المفضلات

ضوابط المشاركة