الموضوع: أنا والتيجو والمصيف

السلام عليكم إخواني التيجاوية تحديدا والمقبلين على شرائها بصفة عامة ... .

سأروي لكم قصتي التي حدثت بالتيجو في المصيف وذلك فقط للعظة والإعتبار وليس لعيب في السيارة لاسمح الله

في يوم كنت قاعد كالعادة أتطلع في جمال الطبيعة والبحر.فوجدت أخ عرباوي بسيارة لاند كروزر مو.95بالكتير ماشية زي الحلاوة على رمل البلاج كأنه أسفلت وعمال يعمل أمريكاني ويروح وييجي ويطلع وينزل...أخوكم سخن ودماغي دارت وتخيلت نفسي بالتيجو بأستعرض عضلاتي زي الأخ اللاند كروزر..لكن قلت ياواد انت كبير هتعمل عقلك بيه!!!

بعدها بيومين وفي ليلة العودة للقاهرة..وتحديدا الساعة 9مساءا..كان معايا ابني وكانت المدام قاعدة على البحر بإبني الثاني..قلت أدخلهم لحد جوة بالعربية عشان أنور لهم المكان (طبعا ده كان الكلام اللي قولته لهم..لكن جوايا منظراللاند كروزر مش سايبني)...ودخلت ياباشا يادوبك 5متر والعربية كلبشت في الأرض ... .غرزت

أنا فوقت من الحلم وعمال احاول ارجع تغرز أكتر

نزلنا وجبنا طوب وحشرناه ورا العجل...مفيش فايدة..نرجع نحفر ونحشر طوب اكتر..مفيش فايدة العربية بتاخد الطوب وتنزل أكتر

استعنت بجماعة عرب قعدوا يحفروا ويحطوا طوب ويرشوا مية ويحاولوا يشيلوا العربية لكن العربية تقيلة جدا (ودي ميزة) ومش عارفين نعمل حاجة وبتنزل اكتر..لدرجة ان العربية اصبحت محملة على الرمل من تحت الموتور والعجل بيلف على الفاضي...ياحلاوة

آخر ما غلبنا حاولنا نستعين بصديق..وجدت شباب معاهم شيروكي..وطبعا واخدهم الحماس ونعرة انها صيني وهم شيروكي (مو 97 تقريبا) ربطنا العربيتين وشد ياجدع ... .الشيروكي غرزت..انا قعدت اضحك..والعيال اتلخموا وكل همهم يطلعوا عربيتهم...لحسن الحظ كانوا قريبين من الرصيف فبعد محاولات عديدة طلعوا نفسهم وفلسعوا من جنبي...استعنت بمدير القرية اللي طلب عربية نقل كبيرة..جت بعد ساعة وربطناهم لكن لأن الجنزير اللي حيلتي قصير اتضطر ينزل في الرمل..وشد ياجدع...النقل غرزت...تصوروا!!

وانا ميت من الضحك...الساعة واحدة وبدأ الجميع يزهق..واللي يقولي سيبها للصبح..واللي يقولي النهار له عينين...طبعا مقدرتش اسيب الآنسة لوحدها في الفراغ ده..حد يعمل حاجة كدة وللا كدة..ولاد الحلال كتير .الأخوة العرباوية بتوع النقل عملوا اتصالاتهم وجابوا عربية قلاب مرسيدس كبييييرة عشان تسحب عربيتهم..جت على الساعة2الصبح وكان معاها واير صلب محترم...طبعا على طول نتعت النقل اللي كان غارز ورايا وبعدين ربطوني من الهوك اللي ركبته اول ما اشتريتها وركبت ياباشا ودورت العربية وجبت على الـN‏ كأني ممور...وعينك ماتشوف الا النور العربية طارت بيا لماشدني...ابني كان واقف بعيد بيقولي يابابا كانت (التيجو) عاملة زي الصرصار اللي مسكوه من رجله وبيشدوه............خلصنا الليلة دي الساعة 3الصبح ... .والأخوة العرباوية اخدوا في الشدة دي 100 ج..لآني عزبتهم وجابوا عربيتين علشان تطلع ست الحسن ... .

طبعا مش عاوز اقولكم نفسيتي كانت ازاي ولا غيظي من نفسي ومنالعربية ومن كل الدنيا لكن طبعا انا اللي غلطان لأنها ببساطة مش 4*4 وحتى لوكانت كدة فعلا الرمل كان كثيف جدا جدا

طبعا العربية اتملت رمل من تحت...ومن جوة من تطاير الرمل وانابحاول اخرج...كل ده نضفته ورحت للتوكيل في ابوغالي رفعوها وطمنوني ان مفيش حاجة حصلت وربنا يستر

طبعا القصة للعظة ان محدش يسخن زيي ويتعامل انها عربية من بتوع السفاري

التيجو مجرد عربية SUVجميلة وناعمة ومتزنة على الطريق وفي السرعات وعالية ... .أكتر من كدة مافيش ... .وكدة حلو والحمدلله

أخوكم (الغررييييز) / م.ياسر