الموضوع: أنا والتيجو والمصيف

يا جماعة الموضوع ده فكرني بموضوع كل لما افتكروا افطس علي نفسي من الضحك

انا في العادي بسافر كتير عشان الشغل ومن اكتر الحتت اللي بسافرها زامبيا

وهناك ايه يا ريس لما الدنيا بتمطر كأن القيامة قامت لدرجة ان كان في مرة واحد صاحبي بيكلمني في التليفون من مصر والدنيا كانت رعد وبرق ومصر من صوت الرعد كان فاكر ان في قنابل بتوقع جانبي

المهم انا ليا كام واحد صاحبي مصريين هناك بروح اقعد معاهم

في يوم واحنا قاعدين لقينا واحد صاحبنا بيكلمنا نلحقه عشان العربية غرزت في الطين (باجيرو) روحنا نلحقه بعربية مرسيدس m35 وهوب غرزنا احنا كمان

كلمنا الشركة بعتلولنا عربية نص نقل شاسية طويل وهوب اغرز يا معلم والساعة بقت واحدة بالليل واللي بيسافر افريقيا عارف يعني ايه الساعة واحدة بالليل في حتة مفيهاش صريخ ابن يومين

المهم بنبص لقينا عربية نقل فيها بتاع 10 من الزامبوين وكل واحد ماسك في ايديه سافورية او سنجة

لقيت صاحبي قال بس كله يقلع ويسلم نفسه :)

المهم ربنا يومها ستر وا ماطلهوش حرمية ورحوا علي الشجر وهات يا تقطيع وحط الخشب تحت العجل وشد بالعربية النقل وخدوا اللي فيه النصيب

كان يوم اسود من قرن الخروب

المشاركة الأصلية كتبت بواسطة evram

دي اتوماتيك مافيهاش دفع رباعي ولا فتيس غرز

ياباشا عادي ان عربيات الدفع الرباعي تبقى اوتوماتيك و فيها برضة فتيس غرز و كل الياباني كدة (لاند كروزر و باجيرو و النيسان الباترول و غيرها و غيرها العربيات دي مواتيرها سي سي عالي و بتبقى اوتوماتيك و فتيس غرز

المشاركة الأصلية كتبت بواسطة mohamedhfz

يا باشا معلش متزعلش مني . الجماعه العرباويه اللي كانوا معاك دول مش فاهمين حاجه و انا مستغرب من كده بصراحه

ايوة ماهما يا مش فاهمين يا اما كعادتهم مكارين و بيستعبطوا و عاملين مش فاهمين دول خبثاء جدا و ممكن كانوا قاصدين علشان تلوصوا في العربية وفي الاخر يجيبوا عربية و يطلعوها و ياخدوا اللي فية القسمة الطاق اتنين

لأن اول ما تغرس العربيه المفروض متعافرش معاها و تنزل تهوي ال 4 فرد كاوتش لحد ما تلاقيهوم بدأوا يفرشوا علي الرمله و بعد كده العربيه هتتطلع معاك بسهوله

+1
تمام فعلا لزم تهوي الكاوتش للنص تقريباً و مش لما تغرز لأ من الاول طالما نويت تخش الرملة كان مفروض من الاول تنزل تهوي الكاوتش و تدخل الرمل و لما تطلع تزودة (علشان كدة بتلاقي كل اللي راكب 4*4 شايل منفاخ هواء في الشنطة )

المشاركة الأصلية كتبت بواسطة max_ziro

اولا..
الاند كروزر و النيسان باترول دول احسن عربيتين فى الصحرا بلامنازع ف متحاولش انك تقلد اى حد معاة العربيتين دول ابلا ولا بقا شيروكى ولا اى حاجة

+100000000 و حط معاهم الباجيرو و الايسوزو كمان

ثانيا..
الرمل لية سواقة معينة و لازم تكون متدرب عليها و لو حضرتك راكب هامر هتغرز بيها بردو لو حضرتك مش مدرب على السواقة فى الرملة هتلاقى الاخ العرباوى ابو لاند كروزر مخلاش العجل يقف خالص لازم يكون كل العجل فى حالة دوران تام و مستمر
بحيث ان حضرتك تبقى عايم على الرملة مش ماشى فيها لا ماشى فوقيها

+1

السواقة عالرملة فن زي الزحلقة (الانزلاق على الماء) بالضبط

ماتلفش الدركسيون مرة واحدة و لا تكبس بنزين مرة واحدة و لا تفرمل مرة واحدة و ماتسيبش العربية تهدى منك تسايس البدال بحيث تحافظ عالعجل بيلف بسرعتة لا تزيد و لا تنقص جامد فجائي


و الدفع الرباعى مهم جدا فى حاجة الدخول فى الرملة و لا غنى عنة و للاسف التيجو تفتقر النقطة دى و حتى الاخوة بتوع الشيروكى دول للاسف فاشلين فى التصرف على الرملة
و حتى فتيس العرز بيكون فية غيارات و لكل غيار استخدام..

h2 يعني الدفع لى عجلتين بس و بالسرعه العادية (زيها زي اي عربية عادية) يعني انت كدة فاصل فتيس الغزر عن الكرونة التانية

h4 كدة الفتيس واصل عالكرونة التانية و الدفع عالأربع عجلات و عالسرعه العالية برضة

l4 كدة برضة الالدفع عالاربع عجلات بس على الحمل (يعني نصف السرعه ضعف العزم) و دة يستخدم في منزل جامد عالغرود علشان العربية تكلبش ماتجريش او يستخدم في حالة غرز جامد جدا ليك او لعربية بتقطرها لو يعني عربية غارزة و انت بتشدها تطلعها

و الغيار دة قوي جداً بس سرعتة بطيئة جداً, حضرتك اول ما تعشقة بتلاقي العربية بتنط لقدام و الفرامل بالعافية بتحكمها, كأنك حطيت موتور قوتة ضعف قوة الموتور في العربية بالضبط (ضعف العزم) و تلاقي الغيار مشوارة للنص يعني تلاقي الاول 20 و التاني 40 و التالت 60 بدل ماكان الاول تقرص لل 40 و التاني لل 80 مثلا

اقولك مثال مرة كان فية قدام الشغل عندي عربية ميتسوبيشي جالنت سبور قديمة قوي مركونة من سنين و عجلها نايم و تحتها كوم زبالة و رمل و كنا عايزين نزقها بعيد شوية عن مدخل الشركة و السعاة ماعرفوش يحركوها سنتي

انا جيت لقيت كدة وقفت وراها و بالراحه حطيت اكصدامي في اكصدامها و عشقت غيارالحمل l4 ومجرد ا سيبت فرامل (من غير مادوس بنزين خالص) العربية اتزقت زي الحلاوة لغاية كمان ما ريحت في اللانسر اللي كانت راكنة قدامها و زقتها معاها سنة

المشاركة الأصلية كتبت بواسطة hegazio

الموضوع محتاج خبرة رمل اكتر من العربية

+10000

المشاركة الأصلية كتبت بواسطة speed demon666

An SUV stands for (Sport Utility Vehicle) and its used for many Purposes Like Offroading,Good traction in Snow Or Rain and it also is Very Powerful.

many thanks for you help man.

المشاركة الأصلية كتبت بواسطة medo_2060

هههههههههههههههههههه
بجد موقف جامد وتحس انه مغامره كدا
بس لو حضرتك سمحتلى اسألك ايه الشغل الى فى افريقيا وزامبيا دا؟

مغامرة ايه يا باشا

الحمدلله ان الواحد طلع بالسلامة

انا شغال في منظمة دولية

أسمح لى أعلق كام تعليق

أولا موضوع الصرصار ده تعليق تدخل بيه مسابقه أنا كل ما أفتكره فى أى وقت بضحك

ثانيا العرباوى اللى سعادتك شوفته دخل لغاية ما قرب من البحر من مدخل غير اللى أنت دخلت منه
يعنى المدخل للبحر لازم تكون رملته جامه زى المدق
و بعد ما بيقرب من البحر بتكون الأمور كلها تمام و تحت السيطره لأن الرمله جامده و ما بتغرزش
و كمان لازم تكون فاهم طبيعة الرملة اللى أنت ماشى عليها اذا بعدت عن البحر
يعنى مستحيل هيدخل فى المنطقة اللى أنت غرزت فيها إلا لما يكون دايس بنزين على الأخر
و مستحيل يقف فى الرملة دى و لو للحظه واحده لكن ممكن يقف عند البحر أو فى رملة طبيعتها مختلفة
لأنك مستحيل تغرز غير لسببين الأول أنك تخف رجلك من على البنزين أو أنك تلف الدركسيون على سرعة بطيئة
لأنك لما بتلف الدركسيون على سرعة بطيئة كأنك دوست فرامل بالظبط
فى حال أنك غرزت لا قدر الله فى أى وقت تانى أسهل طريقة للخروج أتباع الأتى عن تجربة
1- ماتحاولش تخرج لأنك هتغرز أكتر
2- أخرج من العربية و أحفر تحت العجل على قد ما تقدر
3- حط دواسات جلد تحت العجل فى الأتجاه اللى أنت عاوز توصل له يعنى ممكن ترجع لورا مش شرط أنك تخرج لقدام
4- أدخل العربية و أفترى فى دواسة البنزين و أطلع
5- أوعى تفكر تشيل رجلك من على دواسة البنزين إلا لما توصل للأسفلت
6- أرجع خد الدواسات بتاعاتك علشان ماتنسهاش و حمدالله على سلامتك

* الطريقة السابقة مجربه أكتر من مرة بنجاح 100%

نسيت اهم حاجة

انة يخفف ضغط الكاوتش

اقولك تجربة تعملها

هات كورة (اي كورة قدم باسكت او حتى فولي او يد) و امسكها بايدك و اضغطها جامد في الرمل حاتلاقيها اتدفنت لنصفها في الرمل بسهولة

فسي الكورة

كرر التجربة السابقة

مش حاتعرف تخليها تنزل 2 سم في الرمل لانك كا ماتضغطها حاتلاقيها بتفلطح لكن مش حاتنزل في الرمل