يا جماعة عايز اعرف اية هى اخر موديلات التمبرا لانه على حد علمى انه سنة 2000 ولكن واحد جايب لى عربية تمبرا للبيع وبيقول انها موديل سنة 2002وانا كنت بدور على عربية تمبرا للشراء وتكون بحالة ممتازة وكمان عايز اعرف تكون فى حدود كام ارجوكم افدونى
عرض للطباعة
يا جماعة عايز اعرف اية هى اخر موديلات التمبرا لانه على حد علمى انه سنة 2000 ولكن واحد جايب لى عربية تمبرا للبيع وبيقول انها موديل سنة 2002وانا كنت بدور على عربية تمبرا للشراء وتكون بحالة ممتازة وكمان عايز اعرف تكون فى حدود كام ارجوكم افدونى
2002 صعبة دى على حد علمى اخر سيارات التمبرا التجميع المصرى فى شركة النصر للسيارات كان سنة 2000 لو غايز الخلاصة بسيطة اكتب رقم الشاسية و الموتور و ستجد رد لك شافى ووافى و الرد سيكون من 2 من الاخوة اصحاب التمبرا الاستاذ جاليليو او الدكتور ضياء يسف باسم caysersosaih و دى الخلاصة من واقع ال eper
شكرا جدا على الرد بس ازى اجيب رقم المتور والشاسية وانا لسه مشترتش العربية انا لسه هاروح اتفرج عليها بس عاوز المصداقية الاول فى موضوع 2002 وعلى فكرة هو بيقول ان عداداتها ديجيتال
لو مكتوبه فى الرخصه تبقى تأكد وممكن تكون اخر سنه 2001
انا واحد اعرفه معاه تمبرا فى الرخصه 2001
بس ازاى متعرفش ممكن كان فايض عندهم عربيات ولا ايه متعرفش
والعداد الديجيتال ده 40 % التمبرا فى مصر كده
باشا اغلب الظن ان العربية دى استيراد و كانت داخلة مصر عن طريق هيئة الاستثمار فى بورسعيد على اساس انها معاقين شفاهم اللة و عافاهم و دة ميزة مش عيب و رقم الشاسية حتلافية على الحديدة السوداء الى فى صدر العربية زى الصورة دى كدة http://img514.imageshack.us/img514/7021/10062010544.jpghttp://img441.imageshack.us/img441/2199/10062010543.jpg
الاخ الفاضل تامر
كيف حالك , انا عندما كنت أبحث عن سيارتي التمبرا من سنة أتفرجت على واحدة فعلا موديل 2002 و كان صاحبها مدير سابق بشركة النصر للسيارات و كان ساكن في مساكن شركة النصر للسيارت بحلوان و من الرعيل الاول للشركة و أطلعت على رخصة العربية و بطاقته .
التمبرا آخرها سنة 2000 في شركة النصر لكن سنة 2002 تم عمل طلبية لبعض المديرين بشركة النصر للسيارات بطلبية مخصوص من ايطاليا و تم تجميع عدد 25 عربية فقط للمديرين تمبرا موديل 2002 و هذه المعلومة بحسب كلامه و رأيي أنه ثقة .
كل العربيات التمبرا من 1997 اللي جمعتها شركة النصر عدادات عادة مش ديجيتال و نفس الشئ لل 25 عربية موديل 2002
المهم كان طالب فيها 43 الف على اساس أنها عمولة و أول يد و لكن السعر لم يناسبني خاصة أنها كانت رشة برة و سقف كمان وعاملة 100 الف كيلو .
أنا في رأيي أن موديل 2002 و عدادات ديجيتال ده كلام اشتغالات و العربية دي ممكن تكون استيراد معاقين وورقها مضروب و الدليل على كلامي أن و أنا بأتفرج على عربيات تمبرا من سنة كان في أحد الاخوة المعاقين شفاهم الله كان عارض تمبرا
1400 سي سي فاضية بدون أي كماليات و زجاج أمامي عادي مش كهرباء و حتى مافيهاش سنتر لوك و عدادات ديجيتال و كانت رخصتها مكتوب فيها أنها موديل 1999 ايطالي !!!!!!!!!!!!!!!
لما راجعت الشركة لقيت أن موديلات التمبرا ال 1400 سي سي الفاضية كلها يا أما 1990 يا أما 1991 و الراجل ده بيقولي
أصل أنا لي قريب عضو في الاتحاد الاوروبي و العربية اتعملت لي عمولة مخصوص و أنها أول يد من الزيرو و طبعا مافيش حد معاق بيجيب زيرو لان 99% منهم بيجيب استعمال الخارج علشان يأخذ عربية رخيصة و استعمال خفيف .
حتى العداد بتاعها كان عامل 70 الف كيلو و طبعا لو كانت مو 1990 يبقى لا يمكن تكون عاملة أقل من 100 الف ده لو كان استعمالها خفيف بمعدل 5 آلاف كيلو سنويا و طبعا من ضمن الكلام أنها فابريكة برة و جوه رغم أن صاجها كان فيه تعريجة المعجون لما تبص عليها من الجنب .
أنا حسيت على الفور ان العربية دي ورقها و عدادها الاثنان مضروبين و كان صاحبها طالب فيها 40 الف جنيه .
صدقني اللعب في الورق بتاع السيرات الاستيراد سهل جدا و خلي بالك كويس
معالى الباشا , اسف للتدخل بس الكلام ده مش منطقى
التمبرا وقفت فى ايطاليا و تركيا 95-96 , و فى البرازيل 98
تفتكر حضرتك الشركة حتيجى بعد 7-8 سنين و تجمع 25 عربية من اللى موقوف انتاجهم عشان خاطر شركة النصر للسيارات
الاخ صاحب الموضوع , ممكن تتصل بمالك العربية و تستأذنه فى رقم الشاسيه و قوله ان فى ناس شككتنى فى موديل العربية و عايز رقم الشاسيه عشان اتأكد من التوكيل
و بالنسبة للورق المضروب بتاع عربيات المعاقين , كان بيتضرب لتقليل سنة الموديل عشان يدفعوا جمرك اقل
و ما سمعتش قبل كده عن عربية رفعوا سنة الموديل بتاعها لانه بالتالى حيدفع جمرك اعلى بكتير
شكرا ياباشا على الرد
واحب اعرفك انى شوفت العربية وعاينتها وهى مغيرة لون خارجى وفبريكة من الداخل وعدادات ديجيتال وتكييف عاوز بلية زى ما بيقول صاحبها وهو هيعملة قبل مايبيع ورخصتها فعلا 2002 وصاحبها طالب 37000 جنية مينزلوش مليم وانا قولتة 33000 مارضيش
وكمان عايز اخد رايك فى عربية تمبرا تانية شفتها
موديل 1998 فابريكة بارة وجوة فيها خبطات بسيطة تترد على البارد تكييف عاوز يتشحن بس على حسب كلام صاحبها ماتور 80% بعد ما رفعتها عند العفشاجى قالى انها فعلا فابريكة برة وجوه وكل اللى عاوزاه قنطرة من تحت وعلبة دريكسون لانه شاف نقط زيت من ناحية علبة الدركسيون من تحت العربية وصاحبها اخر كلام معه 33500ومش راضى يقلل عن كدة رغم اكتشاف علبة الدريكسون اللى كانت بتنقط ياريت تفدنى فى سعرها لانى مش عارف اسعار السوق وقطع الغيار وشايف ان العربية ممكن تكون كويسة وشكرا مرة تانية على كل الردود والاهتمام
انا هقولك حاجه يا باشا التمبرا النضيفه و الفبريكه بره وجوه مش اقل من 36 الف جنيه يا اما هتلاقى تحت كده الحاله وحشه جدا هتقولى سعر السوق ومش سعر السوق اشترى بسعر السوق هتلبس لبسه محصلتش العربيات من 28 الى 32 ديه بتكون خرابه ياعنى عربيه 131 حالتها معقوله هتكون احسن منها التمبرا يا تجبها نضيفه وكويسه يا تجيب الاكسيل بقى بالسعر ده جميل اوى و التمبرا بيوصل سعرها ل 45 الف جنيه حسب الحاله
واحد صاحبى معاه تمبرا 1993 فبريكه بره و جوه و جميع الكماليات و عداد ديجيتال وحاله كويسه جدا ولونها فضى وعربيه صح طالب 38 الف جنيه ومش بينزل مليم لو طلعت ايه فى التمبرا برده مش هينزلك مليم
وهو ده حال التمبرا والى مش عاجبوا يروح يشترى اكسيل حلوه عليه
ولو مش معاك يا باشا فوق 35 مش عتلاقى عربيه نضيفه وانا دورت كتير فى السوق و المواقع ومش هتلاقى صدقنى
لو العربية فابريكة جوة و برة و سليمة حلو بس موضوع التكيف مفيش حاجة اسمها عاوز بلية لا يضمن حالتة عموما الكومبريسور استيراد ب 300 جنية و التلاجة برضو ب 300 جنية يعنى ممكن 1000 جنية بشحن الفريون و سعرها معقول و دى التمبرا المصرى حاول فى السعر بس اعتقد معقول جدا لو العربية سليمة حسب ما انت كشفت على حالتها كدة
أهلا بالاخ الفاضل جاليليو
كيف حالك الحقيقة بحب اولا اشكرك على مجهودك في المنتدى انت و الاخ هشام و باقي الاخوة خاصة موضوع التصوير
لانه فعلا بيفيد جدا .
كلام معقول و لكن عزيزي ال 128 انتاجها توقف في أوروبا من منتصف السبعينيات و تم تحديثها بريتمو و مع هذا ظلت شركة النصر تجمعها بالاتفاق مع فيات حتى سنة 2009 .
شركة النصر كانت على حسب معلوماتي بتجمع ال 128 في السبعينيات بعد كده جمعت ال 128 gls اليوغوسلافي بعد هذا كانت الشركة الوحيدة اللي بتجمع ال 128 و بتنزلها زيرو موديل 2009 .
النقطة الثانية ان آخر موديل تمبرا تم تجميعه في النصر للسيارت كان سنة 2000 و ممكن يكون ال 25 عربية بتوع المديرين
حسب كلام الاستاذ الموظف السابق بشركة النصر عبارة عن عربيات تم تجميعها في 2000 أو 2001 و لم يتم بيعهم و لهذا تم بيعهم للمديرين بتسهيلات في السداد في عام 2002
حسب معلوماتي أن سيارات المعاقين أصلا معفاة من الجمارك و لهذا لا يوجد من داعي لزيادة عمر العربية , و السبب في اللعب في ورق العربية لاظهارها أنها موديل حديث هو سهولة بيعها بعد هذا بسعر عالي على اساس انها عربية شبه جديدة .
أنت عارف الاخ المعاق اللي كان عايز يبيعها كان بيقولي كلام كله متضارب , يقول ان العربية مو 1999 ايطالي وآخرالايطالي 1996 !!!!!!!!!!!!!!!!!!
كان بيقول أنها مو 1999 و هي 1400 سي سي فاضية بدون أي كماليات !!!!!!!!!!!!!!!!!!!1
كان بيقول أنه هو اول يد و شاريها زيرو من الخارج رغم اني لما شفت الرخصة كانت مكتوب عليها ( حظر بيع ) و قال ان فك الحظر ينتهي في 2009 و مدة الحظر 5 سنوات يعني شاريها سنة 2004 , طب ازاي هو اول يد و شاريها زيرو من سنة 1999 و فك الحظر سنة 2009!!!!!!!!!!!!!!!!!!!!!!!
كان بيقول انها فابريكة برة و جوة و لما تبص بالجنب بتلاقي تعريجات المعجون ظاهرة و بعدين بعد كل هذا العداد عامل 70 الف كيلو فقط !!!!!!!!!!!!!!!!!1
اذا كان المتكلم مجنون فالمستمع عاقل , أذا كان كل كلام هذا الرجل غريب و غير منطقي ايه اللي يخليه ما يكدبش في سنة الموديل و العداد الكيلومتري ؟؟؟؟؟؟؟؟؟؟؟؟؟؟؟؟؟؟؟
طبعا ممكن تكون وجهة نظره ان عربية حديثة موديل 1999 و ايطالي و معمولة عمولة و مش عاملة كيلوات كثيرة يقدر يطلب فيها 40 الف و هو مرتاح و كان بيقول : آخر كلام عندي 39 الف ما ينزلوش مليم .
ممكن يكون ده السبب في تعلية سنة الموديل .
أهلا بالاخ الفاضل تامر
أنا لا أعرف ما المقصود ببلية التكييف و لكن لو عايز رأيي في ورشة كويسة جدا في الهرم ارشدني لها الاخ تامر زلباني عمل عندهم طقم اصلاح للكمبرسور و أنا كمان عملت عندهم نفس الطقم للكمبرسور و شغال زي الفل نشكر ربنا بقاله 6 شهور
هم في شارع كمال الهوديدي المتفرع من خاتم المرسلين الطالبية هرم و اسمهم am .
أنا برأيي تكشف على التكييف عندهم و هم يقدروا يقولوا لك بالضبط ايه المطلوب و لو عايز رأيي السعر ممتاز لو كانت فعلا بحالة جيدة لكن بمنتهى الامانة موضوع 2002 و عددات ديجيتال و مستوردة ده كلام ما يطمنش لانه كلام غير صحيح بالمرة زي ما قلت لك و كما أوضح الاخ جاليليو , الايطالي آخره 1996 و من بعد كده كل المصري حتى 2000 أو 2002 عدادات عادة مش ديجيتال .
و أنا عندي قاعدة : طالما صاحب العربية كذب في حاجة معينة او لعب في ورق العربية يبقى غير أهل للثقة و ممكن يكون بيكذب في حاجات ثانية لهذا ( ابعد عن الشر و غني له ) .
و هذه سعرها أيضا ممتاز جدا لو كانت فابريكة برة و جوه و لكن الكشف على الدهان الخارجي بيكون بحساس معين أنا عملته
على العربية بتاعتي قبل ما اشتريها في موبيل اللي في أول عباس العقاد و النظر لوحده لا يكفي .
بالنسبة لعلبة الدركسيون زي ما قال لك الاخ هشام موجودة جديدة عند الكيلاني ب 3995 جنيه و الاستيراد ب 300 أو 350 جنيه لكن طبعا عمرها الافتراض أقل من الجديدة و ممكن بعد فترة تتعطل مرة اخرى و القرار في الاخر ليك و ربنا الموفق .
اهلا بيك معالى الباشا
ال 128 كانت بتنتج فى يوغوسلافيا حتى 2000-2001 و لما وقفوها بعتوا ستوك القطع لمصر , و فى الفترة من وقوف العربية فى ايطاليا مصر كانت بتجيب كل القطع من يوغوسلافيا
و فعلا سيارات المعاقين معفاة من الضرائب بتاعة المرور بس مش معفاة من الجمارك و بيدفعوا ضريبة مبيعات على ثمن العربية عند استيرادها , بيتم خصم مبلغ 12000جم من مبلغ الجمرك حاعفاء , و افتكر انهم رفعوها ل 20000جم و المعاق بيدفع الفرق بين الجمرك و حد الاعفاء المذكور
الاستاذ الفاضل عبد المسيح و الاستاذ جاليليو أزيكم يا باشوات عاوز أقول حاجة بخصوص السيارات الى واخدة اعفاء جمركى كلام جاليليو صح فى النقطة دى بالمناسبة لى نسيب شغال فى جمارك السيارات و طبعا انا عملت دراسة جدوى قبل الشراء لانى فكرت أشترى من بورسعيد من هيئة الاستثمار على ما أتذكر لفك الحظر لو العربية 1600 سى سى كان تقريبا 9900 جنية بالظبط او 12000 جنية و العملية دى أنتهت دلوقت خلاص استاذ عبد المسيح سيارتى انا كانت داخلة أستيراد معاقين شافاهم الله و عافاهم بس كان مدفوع الملغ المستحق و تم فك حظر البيع انا شاريها خالصة مخلصة و على فكرة كان فية دفتر بأسماء ناس معاقين بيتم الاتفاق مع مكتب هناك العربية تتعمل بأسمة و كانو باخدو من 5000 الى 7000 جنية حسب الاتفاق دة موضوع طويل و انا متأكد مليار فى المية ان جاليلو حافظة مش معنى كلامى انى بقول ان حضرتك بتقول معلومة مش مظبوطة بس انا شخصيا مريت بالتجربة مع الناس دول و دى ليها ميت طريقة و طريقة و ربنا يبعدنا عن شر لعب الورق دة
السلام عليكم
انا امامى سيارة تمبرا 1990 1400 سى سى فابريكة من جوة وبرة إيطالى وصاحبها طالب 27000 جنية نهائى ياترى السعر دة كويس . وايه اللى ممكن يتفحص قيها عشان اتأكد انها سليمة من أهل الخبرة
وياريت حد يرد عليا فى الأتى :
هل العربية دى بتسخن
هل العربية تشيل عدد كبير من الأفراد لأن كان عندى مازدا 323 وكانت بتنزل على الأرض لما بركب 2 أو 3 وواحد أمام
هل المساعدين بتاعتها قوية وتتحمل عفشتها وهل هى أفضل فى القوة ولا الشاهين
انا جبت مؤخرا سيارة فولكس بيتلز وبحبها لأنها ثابته جدا على الطريق وقويه وسحبها عالى وخايف أفرط فيها هل التمبرا ممكن تكون نفس الأداء
هل السعر دة مناسب بالمفارن لإنخفاض الأسعار بالسوق
الموتور 1400 سى سى هل تتحمل يركب عليها تكييف ولا تبرجل العربية
معلش انا طلباتى كترت بس انا النهاردة عاوز الحق اقرر اشتريها ولا لأ
بإنتظار سرعة رد السادة الأخوة الأعضاء
وشكرا
سمير
ربنا يوفقك لما فية الخير الاول لو عرفت تجيب تمرا 1600 سى سى أفضل علشان تجيب واحدة 1400 سى سى و تركب تكيف ممكن بس وش شوية التمبرا ال 1600 ممكن من 30 الف و انت طالع بس أحسن كتير من ال 1400 سى سى باقى الاسئلة حا أرد بكلمة واحدة اشترى التمبرا و انت مغمض عربية حديد لا تقارن ب البتلز او ال مازدا 323 و على فكرة انا بحب العربيتين دول جدا جدا جدا جدا و كنت حا أشترى زمان مازدا 323 بس ال 1500 سى سى الامريكانى ام أكصدام حديد و بيتلز و عارف طبعا ان المازدا لو ركب 4 أفراد بتحك فى المطبات الصناعية بس موتور فوق الممتاز بس التمبرا تعدى منها بسهولة
وهل ممكن لو حد يبعتلى تليفونه من عشاق التمبرا للإستفسار
أكون شاكر
samir_said_75@hotmail.com
أولا شكرا على سرعة الرد ودة مش غريب على أعضاء النايل موتورز
هى الفكرة انى الشخص اللى هاشتريها منه معرفة وعارف ان العربية ماتهانتش خالص لأنها كانت بتاعت والدة وتوفى وفضلت فترة طويلة مش بتتهلك وعدادها عامل 104 ألف فهل فرق السى سى مع فرق السعر هل دة مناسب
وهل 27000 جنية مناسب ولا كتير لانى ممكن اجيب 1600 سى سى وتكون حالتها تعبانه
بالنسبة للأسئلة الثبات فوق الممتاز لغاية 150 كيلو انت فى يد أمينة تركب 5 أفراد بشنطهم و تسافر الموتور مش حا يشحر و العربية تبقى تقيلة و مش فادرة تمشى لآ عادى برضو المقارنة بالشاهين مع أحترامى الكامل للشاهين و هية عربية كفاءة بس مينفعش تقارن حا نظلم الشاهين كدة لان التمبرا فئة أعلى من جميع النواحى لو حا تقارن بسحب البيتلز كأنك شادد فرامل اليد و بتسحب مع عربية تانية الكلام دة من خبرتى مع التمبرا ال 1600 سى سى المساحة الكلية للسيارة صالون بحر بالمقارنة بالمازدا او البيتلز استنى حا انزل لك صور اتفضل كدة http://img25.imageshack.us/img25/942...6838652ae8.jpghttp://img188.imageshack.us/img188/6...n255886380.jpghttp://img815.imageshack.us/img815/4561/tempra28qb8.jpghttp://img530.imageshack.us/img530/4972/tempraa17.jpghttp://img514.imageshack.us/img514/8...6848370ace.jpg
هو حسب ما بسمع يقولك ان العربية المستوردة كفائتها اعلى شوية من المحلى هل دة ماييخليش التكييف مريح العربية 1400 وهل كل كمبرسورات التكيفات عبء على مواتير السيارة ولا فية انواع تكيفات ممكن تكون خفيفة على الموتور
هو التكييف ممكن يتعب العربية 1400 جامد وغالبا انة هايكون موسمى
سؤال تانى قطع الغيار متوفر منها الأصلى والا الصينى والمضروب واسعارها اية مثلا :-
طقم دبرياج
مساعدين
وغيرة ..............
وهل صيانتها بالتوكيل عشان أضمن ولا أى ميكانيكى ممكن يشتغل فيها ولو ليه عيوب إية أكثر عيوبها شيوعا
معلش حضرتك ماردتش برضة 27000 مناسب ولا كتير ولا قليل انت اكيد ادرى بأسعار السوق بكتيير منى
واكشف عليها فين وايه المناطق اللى ممكن تتفحص فيها عشان تأكيد سلامتها لان ممكن اخد ميكانيكى ويطلع كفته لكن اللى معاة السيارة ايد اتعامل مع مشاكلها أكتر سوا استريح معاها او العكس
الايطالى أحسن شوية من المصرى بس المصرى مش عربية تعبانة لا طبعا دى اتجمعت بس جوة شركى النصر للسيارات و المكونات من برة بس الهان كان فى مصر على ما أظن قطع الغيار مشفتش منها حاجات صينى الموجود ايطالى و تركى و ارجنتينى و ألمانى و قطع الغيار مش غالية لو انت راكب بيتلز فى نفس سعر قطع الغيار تقريبا و قطع الغيار الاستيراد ما فيش أكتر منها بالكومة يعنى طقم الدبرياج الالمانى ب 450 جنية المساعدين الامامى ب 430 جنية المونرو ب 600 جنية أدخل على رابطة التمبرا و أقرأ بس ربنا معاك المواضيع كثيرة جدا و حا أبعت لك رقم موبيلى على الخاص دلوقت معلش ما كنتش شوفت المشاركة دى
استاد سمير ازيك طبعا انت عارف لما كلمنتى كنت مع رجالة التمبرا فى العزبة و افاد بأن التكلفة الكلية لتركيب التكيف حوالى 2500 جنية
أهلا بك مرة تانية يا اخ جاليليو كيف حالك
شكرا للمعلومات المفيدة أنا كنت في فترة بأدور على سيارة استيراد معاقين برضه لانها بتكون استعمال خارج و بحالة نظيفة , طبعا مش قاعدة لكن أغلبهم بيبقى كويس لكن هذا المالك لم ارتاح له فعلا لان مش ممكن يكون في عربية تمبرا ايطالي موديل 1999 .
و حتى لو كان في فأكيد هتنزل بالقليلة بزجاج كهرباء أمامي يعني هل التجميع المصري في تلك الفترة أعلى من الايطالي المتصنع في بلاده ؟؟؟؟؟؟؟؟؟؟؟؟؟؟؟؟؟ طبعا كلامه مش منطقي و بالتالي كما أقول دائما : الكذاب و المخادع في حاجة ممكن يكون كاذب و مخادع في غيره و لهذا ابعد عن الشر و غني له .
لهذا في رأيي أن كلام المالك اللي بيتكلم عنه الاخ تامر على أنها مو 2002 و عدادات ديجيتال كلام برضه ميطمنش .
يا باشا اهلا و سهلا بيك و حضرتك منورنا
حقولك على حاجة يمكن تكون جديدة على بعض الناس ,
التمبرا كلها بلا استثناء نزلت ب ( 2 زجاج كهربائى امامى , سنتر لوك ) و ده كان التجهيز الاساسى و كل الكماليات التانية كانت اضافية او اختيارية او بتنزل فى بعض الموديلات
و بالنسبة للتجميع المصرى , هو كان مساوى للفئة المتوسطة من التمبرا فى اوروبا
من الكماليات العادية فى التمبرا الاوروبى الفوج لايتس و العدادات الديجيتال و دول المصرى ميعرفش عنهم حاجة
شكرا ليكم جميعا .....على فكرة انا صرفت نظر عن العربية 2002 لان صاحب العربية من بعد ماقلتلة السعر وهو ماردش عليا وان بخلص دلوقتى فى العربية التانية ولكن بعد ما يتم تصليح التكييف
وانا هاستلم العربية قريبا ان شاء الله لاننا خلاص اتفقنا على السعر
المهم دلوقتى انا عايز اعرف اية اللى المفروض يتغير لما استلم العربية من سيور وفلاتر واغيرهم فين وبكام علشان محدش يضحك علياوبالنسبة لعلبة الدركسون عاوز اعرف واحد كويس يكشف عليها ويقولى اية المطلوب بالظبط علشان اروح اشترية من المكان اللى هتقولى علية معلش انا تقلت عليكم بس انتو خبرة وبتحبو تفيدوا الناس جزاكم الله خيرا
ياريت تليفونتكم علشان لو فى اى حاجة وانا باستلم اسئلكم عليها لو مفيهاش غتاتة
مبروك مقدما و ان شاء الله تكون حلوة و كويسةبالنسبة لما سيتم تغيرة عند أستلام العربية انا شخصيا أفضل تغير سير الكاتينة لانة كاوتش و دة لا قدر الله لو أتقطع العربية تجيب طقم صبابات يعنى من وجهت نظرى دة أهم سير و بعدين انا معلش متلخبط العربية فيها تكيف لة السير سليم مش مشكلة انت عندك 4 سيور أساسية طالما العربية مكيفة سير الكاتينية يتغير و البلية تتغير مش غالية و سير الدينامو و سير التكيف و سير الباور ما تخافش دول مجموعهم حوالى 80 او 100 جنية بالكتير و لو حابب تغير طقم البوجيهات انا شخصيا بشترى البوجيهات ngk ال 3 شمعة من التوكيل بتاعهم ب 50 جنية البوجيهات العادية ب 30 جنية و فية اقل شوية بالنسبة لعلبة الدريكسيون طالما بتلف الدريكسيون و مش تقيل معاك و مش بتزن تبقى كويسة ربنا يكفيك شرها و انا بغير زيت الباور برضو الجركن ال 2 لتر ب 20 او 25 جنية يكفى لفيار مرتين كاملين بالنسبة لمكان الشراء دة حسب التوزيع الجغرافى لمنطقة سكنك ممكن نقولك المحلات فين و اية تانى و خد الصورة دى علشان تعرف مكان السيور فين و الى شبة الرطمان الابيض فى الصورة التانية خزنة زيت الباور http://img266.imageshack.us/img266/4782/10062010516.jpghttp://img715.imageshack.us/img715/5296/10062010533.jpg
متشكر جدددددددا
طيب بالنسبه للفلاتر اغير ايه ويتكلف كام تقريبا وسير الكاتينة دة بعد مغيرة اكشف علية كل اد إية
انا ساكن في طالبية فيصل
اقرب محل ليك محل بتاع محمد يوسف بس انا معرفش فين بالظبط الاستاذ زلبانى و الاستاذ اسامة من الهرم اكيد عارفين و بيرحوة طبعا و السير يفضل تغيرة كل 30 الف كيلو تبقى فى الامان قوى على ما أظن بيتغير كل 40 ألف بس لو غيرتة كل 25 الف او 30 الف احسن هو تقريبا ب 40 جنية مثلا مش متأكد من السعر بس مش أكتر يعنى ممكن 45 جنية حاجة كدة بس تغيرة و هو حتى سليم وقائيا افيد من لا قدر الله لو حصلة حاجة
الف مبروك يا اخ تامر و ربنا يوفقك في العربية الثانية و يكفيك شرها و بالنسبة ليوسف تجده في شارع فيصل أمام شارع العريش
على الناحية اليمين و انت جاي من الجيزة و طالع على الرماية فيصل محطة الطوابق .
في واحد ثاني برضه عنده كل حاجة التمبرا و هو المواردي على فيصل العمومي محطة حسن محمد قبل شارع المطبعة برضه على نفس صف يوسف يعني يمين و انت جاي من الجيزة و رايح على الرماية .
بالنسبة للسيور زي ما الاخ هشام قال لك بتغير كله ( سير كاتينة , دينامو , تكييف ) كل 30 الف كيلو رغم ان المفروض كل 40 الف لكن غيره بدري أحسن لتفادي عيوب الصناعة .
برضه يستحسن تغير فلتر البنزين و فلتر الزيت و تغير زيت موتور و تغير زيت باور و زيت الباور هو كما بيتغير كل 30 الف كيلو بس خلي بالك لو كانت علبة الدركسيون بتنقط هتلاقيه بينقص فزوده لحد ما تصلحها بعد كده مش هتحتاج تزوده غير يمكن كل سنة مرة .
يا جماعة اخير افيدونى انا كان حلمى اركب تمبراودورت كتير مش لاقى عربية نضيفة لحد ما لاقيت عربية مع اخوانا المعاقين شفاة الله لسة هيرفع حذرها الاسبوع القادم وهى لم ترش الا الكبوت فقط وبصراحة شكلها يفتح النفس بس عيبها انها موديل 90 ومفيهاش اى اوبشن ولا حتى الزجاج الكهرباء وبصراحة مصمم على 28500 اتوكل على الله واخدها ولا كدة غالية افيدونى لكى اتمكن من الرد علية وشكرا مقدماً