الموضوع: بلطجة الشوارع .. لحد أمتي ؟؟

المشاركة الأصلية كتبت بواسطة mmamdouh

على فكرة انا عملت الموضوع دة من حوالى اسبوعين

اول حاجة دخلت على سايت الحكومة و كتبت شكوى عشان فى الشارع بتاعنا محل بيتجدد و اول خطوة فى التجديد كانت زراعة مواسير حديد فى الطريق لمنع العربيات من الانتظار

بعد كتابة الشكوى و توجيهها الى المرور و مديرية امن القاهرة ظهر ليا زى ticket number عشان ابقى اتابع الشكوى

مر حوالى اسبوع ولا شىء تغير... قلت بقى الموضوع فاكس و ملوش اى لزمة... لحد يوم الاحد اللى فات... الساعة 11:30 مساء اتصل بيا امين شرطة من قسم الخليفة و قالى انى عامل شكوى تفاصيلها كذا و كذا و لازم اروح القسم عشان يكتب شكوى رسمية و امضى عليها

انا كنت نايم اساسا و مش طالبة معايا نزول بس قلت طالما الناس اخدت الخطوة يبقى مينفعش انا اعمل حركة نص كم و بالفعل لبست و نزلت على القسم و قابلت امين الشرطة اللى كلمنى

الراجل قاللى انهم استقبلوا الشكوى متاخر لان الشكوى راحت الاول قسم الدرب الاحمر و احنا مش تابعين له اساسا فا الشكوى اتردت من القسم للمديرية تانى ثم اتوجهت الى قسم الخليفة و دة اخد شوية وقت (يعنى مدة الاسبوع مكانتش مدة عادية و كان ممكن يتاخد اجرء اسرع لولا اللخبطة دى)

المهم الامين اخدنى الى مامور القسم (هو عميد بس مش فاكر اسمة ايه للاسف) و سالنى ايه الموضوع و شرحتلة القصة و قاللى ان الامين حياخد اقوالى فى شكوى رسمية و حيبعت تانى يوم حد من المباحث يعمل معاية للتاكد من وجود الاشغالات المذكورة و بعدها حيتم ارسال الكلام دة للحى عشان يبعتوا بتوع المرافق للناس دى لاتخاذ الاجراء اللازم و اجبارهم على ازالة المخالفات من خلال تغريمهم غرامة عن كل يوم الاشغالات دى بتفضل موجودة... حسب ما فهمت الغرامة ممكن توصل فى اخر الشهر لحد 1000 جنية تقريبا

المهم رحت مكتب الامين و اخد اقوالى فى السريع و مضيت عليها و الراجل قاللى احنا حنتخذ اللازم و متقلش... فضل الحال على ما هو عليةمن يوم الاحد لحد يوم الخميس... طبعا خلال الفترة دى انا قلت برضة ان القصة حتنام تانى... المهم الخميس بليل و انا مروح لقيت ناس بتدغدغ فى الصبات الاسمنت اللى مثبتة المواسير و بيشيلوا كل الاشغالات اللى فى الشارع

انا بجد ساعتها فرحت اوى... انا فرحت ان فعلا الواحد ممكن يبقى له صوت و تاثير و يعمل حاجة صح اكتر من فرحى لان الشارع بقى فيه اماكن انتظار اكتر و كدة

امين الشرطة كلمنى امبارح الساعة 11:30 برضة و قالى... "ايه الاخبار يا استاذ محمد؟"... قولتلة "تمام يا زعيم و كل حاجة اتشالت و بجد شاكر جدا على المجهود ربنا يخليكم"... رد عليا و قاللى "طيب احنا عايزينك عشان نقفل الشكوى و تمضى ان المخالفات تمت ازالتها"

برضة قلت الناس عملت اللى وعدت بيه و نفذت طلبى و مقصرتش بالتالى مينفعش انا اعمل حركة نص كم برضة... يمكن الواحد يحتاجهم فى شكوى تانية ولا حاجة و لازم الواحد يعمل حساب المستقبل

طلعت للامين مرة تانية و عمل مذكرة صغيرة ملخصها ان التعديات و المخالفات تمت ازالتها و ان مفيش اى شكوى تانية ليا بخصوص الموضوع دة و مضيت عليها و شكرا

انا لما بدات القصة دى مرضتش اكتب تفاصيل تطوراتها عشان كنت متوقع انى ممكن اتحرج لو محصلش اى حاجة فى القصة... بس الحمد لله واضح ان الحاجات دى متتاخدش باستخفاف و بيتم بحث الموضوع بجد و بيتم اتخاذ اجراءات رادعة... صحيح ممكن تتاخر شوية بس طبعا تتاخر شوية و تتعمل احسن من انها متتعملش خالص

و فعلا انا بشكر رجال الامن على المجهود اللى عملوة و الاهتمام بالشكوى... و اللى فهمتة منهم انهم فعلا بيقدروا الشكاوى دى لانهم مش حيقدروا يمشوا واحد عسكرى او من المباحث او من المرافق فى كل شارع فى كل حى و بالتالى بيبقى نسبة كبيرة من شغلهم معتمد على بلاغات المواطنين و زى ما شوفنا انهم بياخدوا فعلا اجراءات حازمة و الموضوع مش هزار... بالتالى يا جماعة انا بدعو كل واحد فيكم شايف مخالفة او تعدى انه يبقى ايجابى و ياخد خطوة لوضع الامور فى نصابها الصحيح

كلنا قاعدين على النت ليل نهار و سايت الحكومة موجود و متاح لينا و تقديم الشكوى اسهل من السهولة... و الناس عندها الاستعداد و عندها السلطة انها تزيل اى تعدى او مخالفة... مش فاضل غير اننا يبقى عندنا شوية حمية و منسيبش كل واحد يبرطع فى الشوارع بمزاجة... المثل بيقول: قالوا لفرعون ايه فرعنك؟ قال ملقيتش حد يلمنى

ياريت يا جماعة منسكتش و ندى فرصة لظهور الاف الفراعنة بدون داعى و احنا عندنا الوسيلة لردع الناس دى

mmamdouh

عملت ذيك و عملت محضر وصور ومحدش شال العواميد وذى ماسمعت فى الشارع الراجل صاحب العواميد راضا الامين بفلوس حلوة و الحال كما هو علية

حسبى الله ونعم الوكيل