الموضوع: ايه رأيك في سواقه السيدات في مصر ؟؟؟

طب انا عندى فكرة تانية:

ايه رأيكم نعمل استطلاع رأى عن سواقة الصلع؟ هل هى كويسة وللا لأ

واستطلاع رأى تانى عن سواقة السمر

واستطلاع رأى تالت عن سواقة الجماعة الشول (مستعملى اليد اليسرى)

انا مش فاهم بصراحة ايه اللى يخلى سواقة الستات حاجة مميزة بذاتها علشان خاطر نعمل استطلاع رأى بشأنها، هو واضح ان بقى فيه نغمة كدة ماشية فى البلد عايزنا نرجع مليون سنة لورا ونمنع نص المجمتع من التمتع بالحقوق التى يتمتع بها النص التانى ونبقى زى بعض الدول المجاورة التى تجاهد حاليا للتخلص من تخلفها الحضارى وتصديره لنا

الستات زيهم زى الرجالة ، فيهم اللى بتسوق كويس جدا وفيهم اللى بتسوق وحش جدا، فيهم الهجومية وفيهم الدفاعية، فيهم اللى عارفة حدود عربيتها وفيهم اللى مش عارفها، والحال هو هو بالنسبة للرجالة، كل الفارق ان كل محترفى القيادة اللى فى الشارع (محترف بمعنى بياكل عيش من وراها مش بمعنى متمكن) مثل سائقى الشركات والسياحة والتاكسى والميكروباص والنقل رجالة، فى حين ان قيادة السيدات للسيارة تقتصر على الملاكى بس وتقريبا نسبه 99.99999999999999999% من الستات اللى فى الشارع سايقين ملاكى، وانا متاكد ان لو الشارع اقتصر على الملاكى بس هتلاقى نسبة الرجالة اللى بتلوش زى نسبة الستات اللى بتلوش، خصوصا لو جنبنا عامل ان ستات كتير جدا بيسوقوا سواقة دفاعية بسبب سفالة كثير من الرجال اللى بيتصرفوا تصرفات غير محترمة لما يشوفوا عربية سايقاها ست

لو الرجالة بطلوا سفالة هنلاقى سواقة الستات زى سواقة الرجالة بتوع الملاكى بالظبط ، لكن احنا بنتصرف تصرفات غير محترمة فى حق اخواتنا من الفتيات والسيدات ليس فى القيادة فحسب ولكن فى كل مناحى الحياه وبعدين نرجع نتهمهم بانهم دفاعيين وردود افعالهم غير مناسبة، طب ما من الأول نتعلم احنا نكون اكثر تحضرا