الموضوع: محتاج ميكايكى شاطر

المشاركة الأصلية كتبت بواسطة waoola_78

المشكله ان لقيت العربية بع 4 الاف كيلو من تغيير الزيت مافيهاش ولا نقطة زيت خالص ولولا ستر ربنا كانت هاتولع
فلما روحت اغير زيت ( وللعلم انا بغير فى بنزينة الامارات طريق كارفور ) الاخ اللى هناك قالى دى عايزة تغير طقم شنابر لانها جايبة زيت من قدام لكن من تحت سليمه
رحت لميكانيكى قالى ده طبيعى ودى تعاريق زيت انت كل اللى محتاجه تغير نوع الزيت وهات موبيل
فعلا غيرت الزيت لموبيل بس بردع الزيت نقص
روحت لواحد تانى قالى ياباشا دى لازم عمره
وانا مش مقتنع لان مافيش اى دخان من الموتور
مع العلم ان فى مشكلتين تانيين :
1- سحب العربية مش عاجبنى الايام دى
2- لقيت انها بتستهلك فى ال 7.5 كيلو متر ( لتر بنزين مع انها 1600)
لدرجة ان فى واحد صاحبى بتاع اكسسوار عربيا قالى دى باين عليها ابتدت تهنج بعها واشترى غيرها
ومتشكرين قوى يا طنانى باشا على اهتمامك
وجزاكم الله خيرا

معلشى بالراحه عليا
البوجيهات طلعت عليها زيت
لو لأ
يبقى الشنابر زى الفل
و سيبك من الكلام ده
و يعنى ايه جايبه زيت من قدام
من جوان غطا التاكيهات و لا من عند جوان الكارتيره و لا منين
الزيت بينقص ممكن يكون تبخير عادى بس الموتور مش بياكل زيت
حط صباعك فى الشكمان و شوف ايدك هيجى عليها زيت و لا لأ يعنى الشكمان معرق زيت و لا هباب و بس
السحب و الأستهلاك
حاجة من اتنين
1. الرشاش تعيش انت و ده يتغير
2. حساس الكولنت هيس و ده هيبان لو فيه دخنه سودا
و فى الحالتين هتلاقى البوجيهات مهببه اسود فحم
الأحتمال التانى
السطوانه ودعت او بمعنى اصح طقم الدبرياج ده يكتف العربية و يخللى استهلاك البنزين اعلى
و ده ممكن تعرفه لو فيه رجة فى الطلعه
او الموتور صوته ببيعلى بس مش نفس العزم و القوه اللى كان عليها
انت معندكش ار بى ام فالموضوع احساس
الحاجة اللى ممكن تجرب بيها الأسطوانه و الدسك
عشق رابع
دوس فرامل و شيل رجلك من على الدبرياج العربية مبطلتش يبقى البقية فى حياتك و كده الدبرياج ميت اكلينكياًُ و مستنى رصاصة الرحمة