الموضوع: إيه هو كله شكاوى شكاوى ما فيش حاجة عدلة فى العربية أو التوكيل؟......... (دعوة للنقاش)

أنا بكتب الموضوع ده بالذات عشان بقى لى فترة طويلة بدخل المنتدى ألاقيه شكاوى فقط و كأنه اتحول لقسم المقترحات و الشكاوى الخاص ببروتون و توكيل عز العرب بشكل خاص و حتى المقترحات كمان كاتبها مجاملة.
أكيد ما حدش مننا ما بتقابلوش مشاكل و من حقك تشرك كل الناس معاك فيها عشان تحلها أولا و يبقى فيه أكتر من واحد بيفكر معاك و ثانيا عشان لما تتحل تبقى مرجع للباقى عشان لو حصلت لحد تانى يقدر يحلها مباشرة من غير تكرار عرض المشكلة مرة تانية.
بس هو ده الهدف من وجودنا فى المنتدى الشكوى .......الشكوى ........الشكوى............ و لا حاجة غير الشكوى.
ليه لما اللى بيشتكى مشكلته بتخلص ما بيتعبش نفسه و يعمل موضوع يقول فيه إن مشكلته خلصت و ليه لما بنشوف حاجة إيجابية أو موقف كويس مع العربية أو التوكيل ما بنتكلمش عليه و لا بنجيب سيرته و كأن العادى إنك تاخد خدمة فوق الممتازة فى كل حاجة و تدفع أرخص الأسعار و تتحل كل مشاكلك (in no time) زى ما بيقولوا و الحالة الشاذة اللى ممكن تحصل إن عنصر من اللى فاته دول يحصل فيه أى نوع من الخلل و ساعتها العربية زبالة و التوكيل سىء و أنا ندمان و أنا بعيط و كان عندهم حق اللى حذرونى من العربية ...... إلى آخره من كلام الندب اللى لا يودى و لا يجيب.

و بالعكس بقى نادرا لما نلاقى حد بيشكر فى حاجة إيجابية أو بيعلق على موقف انبسط منه أو حد عملله حاجة مش متوقعة فشاركنا المعلومة و شكر الشخص اللى عمل كده زى ما بيقطع فيه لما يقصر فى حاجة طبعا أنا بقول نادرا و الموضوع يكاد يكون منعدم و خاصة فى الفترة الأخيرة و فى النقطة دى بالذات بشكر العضو call Sherif اللى بجد إنسان محترم بمعنى الكلمة على قد ما غلط فى الناس و فى العربية و التوكيل بكل ما فيه ساعة مشكلته اللى كانت بحق مشكلة مش زى الهيافات اللى بنقراها دلوقتى إنما أفتكر برده لما اتحلت مشكلته و لأنها اتحلت بشكل استثنائى و غير مسبوق برده كتب عن الموضوع و إزاى اتحلت و اعتذر للناس اللى غلط فيهم على انفعاله و شكرهم على جهدهم فى حل الموضوع و ما اعتبرش نفسه مجرد واحد اتردله اعتباره و رجعله حقه الضايع و إن ده هو الطبيعى.

يا ريت يا جماعة يبقى ده طبعنا زى ما بنشتكى و نغلط فى الناس برده نديهم حقهم لما يعملوا حاجة كويسة و مانبقاش أنانيين نتعب و نسهر و نكتب مواضيع لما نشتكى بس و نعمل عمى و طرش لما نلاقى حاجة إيجابية أو مشاكلنا اتحلت.
أنا آسف و بعتذر لكل الأعضاء إذا كنت منفعل شوية فى الأسلوب اللى اتكلمت بيه بس أكيد أغلب الأعضاء و خصوصا الأعضاء القدامى مش راضياهم حالة المنتدى و اللى وصلله دلوقتى

المشاركة الأصلية كتبت بواسطة Osama.shihata

والله كلام الى فى بال الواحد يا هيثم فعلا


انا عندى فكرة تخلى كل الاعضاء القدامى يرجعه يشاركه بايجابية اكثر وكمان الاعضاء الجدد ينبهروا بجمال وامكانيات العربية ويتردلهم على استفسارتهم ويبعد عنهم رهبة مشاكل او عيوب التقفيل البسيطة


هتقولى ازاى

بص احنا نعمل تجمع وليكن يوم الجمعة لمدة ساعتين فقط فى كل اسبوع لمدة شهر واحد قدام اى محطة بنزين كبيرة وقدامها مكان او مدخل اى مدينة كبيرة مميزة زى الرحاب مدينتى الشروق التجمع الثالث او الاول الخامس المعادى .....

وندعو كل الناس لمشاهدة عربيتنا على الطبيعة (((مشاهدة مش تجربة))) علشان محدش يقلق على عربيته
طبعا شكل العربيات سعتها يفرح اى حد ويبعث الشعور بالثقة والاتجاه الايجابى ناحية العربية وبكدة الناس الجدد هتسال واحنا هنجوبهم على الطبيعة وبكدة يزيد الاقبال على السيارة ويشعر الجميع بالفائدة ونعرف كل الى يجى يسال ان فى منتدى ونجهز اسم المنتدى على حتى ورق كروت بسيط علشان الناس لما تروح تشترك معانا

وده مجهود بسيط جدا اعتقد ممكن نقدر نقوم بيه ان شاء الله

هى فكرة كويسة أكيد يا أسامة بس برده مش هتغير من Attitude الناس و هى دى المشكلة احنا مش محتاجين نسوق للعربيةهى ماشاء الله فعلا بايعة نفسها بس المشكلة فى تضخيم المشاكل و الشكوى الدايمة و العكس ما بيحصلش يعنى أكتر ناس بيسوئوا سمعة العربية أصحابها و خصوصا الجدد

المشاركة الأصلية كتبت بواسطة ahmedfathy77

السلام عليكم ورحمة الله وبركاته

ازيك يا هيثوم واحشنا جدا والله.

المشكلة يا هيثم ان الناس القديمة زى ما انت بتقول اشترت العربية حبا فيها بمحاسنها وعيوبها وكان عندهم استعداد يبلعوا الزلط مش عشان هم ناس بتضحى بفلوسها او مش تعبانه في فلوسها لا سمح الله انما عشان هم عارفين اد ايه مزايا العرية رائعة ومقابل المزايا دى. ايه يعنى لو حليت مشكلة او اتنين حصلت وبعد ما تتحل يعرضوا الموضوع ويفهمونا

دلوقتى اللى حاصل العكس الناس بتشترى العربية ومش باصين الا للعيوب فقط اللى حاسين انها مغطية على اى حاجة كويسة فيها ولو حصل مشكلة لا قدر الله تلاقى فضيحة على النت قبل حتى ما يشوف التوكيل هيعمل ايه او حتى يصبر شوية لغاية ما يشوف حل بشكل او باخر سواء فى التوكيل او بالاتصال بالمهندس امر مثلا فبالتالى اصبحت كل المواضيع شكاوى وخناقات فى التوكيل وعن عيوب العربية اللى غالبا مبتكنش حاجة عامة بس طبعا اى حد فينا لما تحصل له مشكلة بيحس ان دى اهم مشكلة فى الكون ولازم الناس كلها تحلها له مع عدم الاعتراف ان فيه صفة انسانية ربنا عطاهلنا اسمها الصبر والمحاولة اكثر من مرة لحل المشكلة ولو التوكيل استهبل ومحلش مشكلتك يبقى فعلا عندك حق تيجى تعمل موضوع وتفضحه وتشتكيه كمان لو اردت

والغريب انك لو دخلت اى موضوع من مواضيع المشاكل والشكاوى وشاركت مشاركة تنصح بيها صاحب الموضوع لوجه الله ومشتمتش فى العربية او التوكيل هتلاقى اتهامات انك عميل وبتشتغل فى التوكيل ومش حاسس بصاحب الموضوع وهتسمع ما تكره فانا لقيت ان الواحد فعلا ممكن يسمع كلام مش كويس فى المواضيع دى لو شاركت فقول لنفسى طب و ليه الطيب احسن خلينى بعيد .

وشهادة لوجه الله العربية ممتعة وتستاهل كل جنيه حتى لو فيها مشكلة ممكن كل شىء يتحل بس اهم حاجة تكون مقتنع بيها وبتحبها ولو العكس مش هتشوف غير العيوب.

طبعا يا هيثم فيه ناس كتير عملت مواضيع كتير عشان تنعش المنتدى وتعيده تانى بس للاسف محصلش حاجة نعد نتكلم ومفيش فعل فيبدوا ان المنتدى فعلا بدأ يكون عامل طارد اكتر منه جاذب للعربية وللاسف الحال من سىء الى اسوأ.

اهم حاجة انى فعلا سعيد بالتعرف على شخصيات محترمة جدا عن طريق المنتدى واعتقد ان دى اهم حاجة فعلا طلعت بيهت من هنا .

انت بالكلام ده حطيت إيدك بجد على المشكلة أنا عايز الناس تعرف إننا لما بندافع عن العربية بندافع عنها باقتناع مش هناخد نجمة لما تنتشر بالعكس ده أنا اشترتها أصلا عشان انتشارها قليل و لو بإيدى مش عايز حد تانى يركبها عشان تفضل unique بس الواحد لما بيتسأل بيرد بأمانة عشان خاطر ربنا مش أكتر و بيحاول يساعد الناس زى ما أول ما ابتدى الناس ساعدته

المشاركة الأصلية كتبت بواسطة afr80

فكرة جمده و تستحق التجربة بس يا ريت تنأو مدينة من ناحية طريق اسكندرية الصحراوي علشان انا مبعرفش فى القاهره.

و على فكره انا عضو فى اكثلر من منتدى بس ده الوحيد اللي انا بهتم بامشاركة فيه علشان هنا بس حسيت بالالفه و الجدعنة و حسيت اني اعرف الناس من زمان يا راجل ده انا كل ما اشوف عربية بروتون اروح ادور على استيكر نايل موتورز علشان نفسي اتعرف على الناس.

احنا محتجن اننا نعمل تجمع كبير زي بتاع الماليزين ونتعرف على بعض و الناس القديمة تتعرف على الناس الجديدة.

معتقدش اني هلاقى الروح اللي موجوده هنا فى منتدى تاني بس مش لازم الناس تحبط، احنا فى الصيف و احنا ممكن نعمل اي نشاطات، و رمضان اهو جاي ممكن نتجمع و نفطر مع بعض و بلاش احببببببببببباط

احنا مش محبطين من علاقاتنا و لا بنحبط حد احنا بنتجمع كتير الحمد لله و اتعرفنا على كتير من بعض و علاقتنا خرجت كمان برة المنتدى و العربيات بشكل عام بس أنا كلامى على المواضيع اللى ملت المنتدى مش علاقة الأعضاء ببعض اللى عمرها إن شاء الله ما هتتقطع و ربنا يديم المحبة بيننا عشان حقيقى الأصحاب اللى أنا طلعت بيهم من هنا أجدع من كل أصحابى اللى عرفتهم طول حياتى.