الموضوع: جيل جديد من أجهزة الرادار علي الطرق المصرية

المشاركة الأصلية كتبت بواسطة pro_samir

شكرا علي الموضوع القيم مهندس سمير

* بخصوص ان الرادار بياخد بيانات النمر من الشريط الفضي وسط النمره الجديده كان واحد حكالي مرة ومش عارف الكلام ده صح ولا اشتغاله انه كان مسافر علي طريق واتصور رادار ، وهو راجع لزق شريط سوليتب علي الجزء الفضي بطول النمره وكان ماشي بسرعه عاليه والرادار معرفش ياخد بيانات النمر ... إية رأيكم في الكلام العجيب ده ؟

* بتوع الداخليه نفسهم كانو بيقولو ان الرادارات كلها هيبقي قبلها يفط تحذيريه لأن هدفهم الحد من السرعه للحفاظ علي أرواح الناس والحقيقه نيتهم الطيبه دي بتظهر بوضوح لما يحطو رادار يصور علي 60 كم في طرق سريعه وطرق لا تتخيل مطلقا ان ممكن يبقي عليها رادار أساسا ولما تنزل للظابط تلاقيه بيقولك 150 جنيه من غير ما يعرف انت ناوي تدفع ولا لأ

* الناس بقي اللي بتطلع من الرادار تجري فا ده طبيعي فعلا لأنه خلاص عارف ان مفيش رادار تاني بس دي مش قاعده خالص ومش ناسي موقف مع واحد صاحبي كان أول مره يروح الغردقه واتصور 3 مرات ورا بعض ههههههههه اول مره اتسحب رخصه القياده وتاني مره برخصه العربيه وتالت مره مش فاكر دفعوه غرامه ولا إيه اللي حصل

- حاليا خاصية التعرف علي بيانات العربية من الشريط الموجود بالنمر مش شغالة نظرا لأن فيه عربيات لسه بتستعمل اللوحات القديمة لكن لما اللوحات الجديدة هاتكتمل النظام ده هايشتغل
لكن الرادار بيتعرف زي ماقولت قبل كده من حديثي مع أحد ظباط المرور علي العربية من حجمها

- بالنسبة للوحات الارشادية قبل الرادار فهي بالفعل موجودة علي المحور و الدائري و كمان علي الطرق السريعة تجد لوحات "أحذر السرعة مراقبة بالرادار" أظن كده ماحدش له حجة

- الظابط لما وقفني في الكمين و أنا كنت متأكد من تخطي حدود السرعة سألني أذا كنت هأدفع المصالحة و لا هأسلم الرخصة يعني كان فيه تخيير مش زي كل مرة ألاقيه بيجهز الوصل علي طول بال 150 جنيه فالموضوع ده بيرجع لشخصية الظابط اللي واقف و تقديره كمان

- ياجماعة انا مش ضد الرادار و مش ضد أن يكون فيه حد أقصي للسرعة و نظام و قانون و لكن ...
1- يجب تطبيق هذا النظام علي الجميع من الوزير الي الغفير
2- أن تكون حدود السرعة معقولة ماتكونش علي طريق واسع و ممهد و مسافته كبيرة و تقولي السرعة 60 كم/ساعة
3- أن اكون مقتنع تماما بأن هدف أدارات المرور هو تحقيق القانون و الانظباط بالشارع و ليس تحصيل المال
4- أن أجد طريق جيد و به خدمات و خالي من العوائق و المفاجأت

بأختصار ... قبل أن تطبق الحكومة القانون يجب أن تلزم هي نفسها بأحترامه و توفير الامكانيات التي تتيح لنا نحن كمواطنين أمكانية الالتزام به

مع خالص تحياتي
م/ سمير الشهاوي

انا سعيد جدا بتواجد الرادارات دى , وبتمنى انها تكون فى كل شارع وطريق فى مصر

على الاقل لما امشى على السرعه القانونيه اضمن انى مش هبقى لوحدى , انا طول عمرى بكره الرادار علشان هو جبايه عليا واتفضل يا باشا على غيرى

لكن بوجود الكاميرات الكل هيتسجل , صحيح مش الكل هيدفع فى النيابه بس كفايه انى مش هشوفه جاى بيقلب نور ويفتحوله اللجنه يعدى منها واحنا واقفين

الرادارات برا مش فى كل مكان بتبقى ظاهره وقبلها يافطه ( مكنش طلع حاجه اسمها كاشف رادار ساعتها ) , ولو حتى فرضا كان الوضع كدا برا فأحنا هنا لما هنعرف هو فين هنهدى عنده ونجرى تانى ويبقى معملناش حاجه

شكرااا للمعلومات
ربنا يوفق

موضوع ومجهود اكثر من رائع الف شكر ليك

فعلا أمبارح كنت راجع من الغردقة و أول ماطلعت الدائري شوفت الرادارات شغالة و نازلة تصوير في العربيات خاصة الاتجاه الي المعادي لدرجة ان احد الرادارات ضرب فلاش اكثر من 3 مرات خلال أقل من دقيقة

الظريف بقي أن قبل مدخل التجمع الخامس كان فيه نقل بمقطورة ماشي علي يميني في الحارة الثانية و بنفس سرعتي تقريبا (80 كم / ساعة) وفجأة الكمين الثابت وقفه

فعلا الموضوع المرة دي جد و يارب يستمروا علي كده علشان الطرق تتظبط بقي

هو احنا لو حاربنا ....مش هاياخدو الرادارات دي الجبهة بدل ماهم مسلطينها علينا كده