الموضوع: إلى كل من ينوي الشراء قريباً ... احترسو من سمير ريان !!!

هحاول مطولش على حضراتكو ... بس الموضوع كبير وأنا عايز الناس تركز في التفاصيل
امبارح كنت بستلم أنا وزميلي وصديق عمري العضو محمود عربية أختو السيراتو سعودي من سمير ريان إلي بقدرة قادر غليت 500 جنيه في 24 ساعة ... ما علينا
وصلنا هناك الساعة 5 بعد مكالمة من موظف المبيعات بيأكد إن العربية جاهزة على الإستلام ،،،طبعاً ماشاء الله زحمة بين ناس بتشتري وناس بتحجز وناس بتتفرج ... فين العربية ؟؟
العربية في المخزن وطبعاً المخزن بيتراح بعربية علشان بعيد شوية ومفيش عربية ولا سواقين ... حفاظاً على الوقت أخدنا الموظف وطلعنا على المخزن ومحدش يفهمني غلط في حكاية المخزن دي ... حتة أرض فضاء واسعة لها بوابة وغفير والعربيات واقفة فيها ،منها لكل العوامل الجيولوجية من تعرية وتجوية.. واللي ناوي يقول إن دة عادي وهما يعني هيعملو إيه ؟؟؟ تابع معايا
وصلنا المعرض وأخدنا دور علشان المحاسب يعد الفلوس عالبال ما العمال يكونو لغمطو العربية إلي هي أصلاً قذرة برة وجوة ... وبعد كدة جينا باءة للمعاينة والإستلام ... ركزززززز
كل النواكل إلي بره العربية من مقابض وشبكة أمامية وحلية على الشنطة مصدية أو مطوسة أو مئكسدة .. سمها كيف شئت ... المهم د مش منظر عربية زيرو ... وطبعاً سوء التخزين سبب رئيسي في الكلام دة (التعرية والتجوية إلي قلنا عليهم) ... بدأ الموظف يحول يطلع الحاجات دي بالبولش ويدعك باءة .. لا يأس مع الحياه ، ولا حياه لمن تنادي ... مش بيطلع ،وكنا كلنا شايفين الكلام دة بس خلاص كنا بدأنا أصلاً نزهق فتغاضينا عن القصة دي وبدأنا نقلب في كل حاجة تانية ونتأكد إن كل حاجة تانية تمام كل صغيرة وكبيرة ... وكانت الكارثة (الموسيقى تخش على المشهد) ... شغلت التكييف وإستنيت شوية إنو يطلع أي سنة هوى بارد ... انسى .... إتأكدت من كل الزراير ... مفيش ... بطلت ودورت تاني ... ولا حاجة ... ناديت محمود صاحبي يمكن أنا حران ... مش ممكن .... كأنك مشغل سشوار ... أخيراً باءة ناديت الموظف تعالى ياعم شوف ... يجرب ويعمل كل حاجة .. بردو مفيش ... نادى إلي أعلى منو (رجل أسمر كدة مش فكر اسمو ) بدأ طبعاً يحسسني اني مليش غير في ركوب البهايم .. ..يقولنا إيه: بص حضرتك أول حاجة تدوس على الزرار دة (a/c) ( جاب التايهة من ذيلها)..وبدأ يجرب هو بطريقتو ... وفي الأخر بطل العربية وطلع منها وقفل الباب وقال : التكييف مش شغال.
وبعد مداولات سرية بين الرجل الأسمر دة والموظف جلنا الرجل دة بإقتراح بيقول إيه : هنشحنها فريون وتيجو بكره تستلموها !!! أي واحد من السادة القراء يحط نفسه مكاني .. احنا وقعنا مع ناس ماعندهمش أي ذمة أو ضمير ... فعلاً المثل إلي بيقول السيط ولا الغنى ... طبعاً مستحيل إن احنا نستلم العربية دي ... المشكلة الحقيقية اني كمان مضمنش العربية إلي هيجبهلي تكون هي كمان مشحونة قبل كدة أو فيها أي عطل تاني مداري أو متلصم أو متصلح لحد ما يجي واحد إبن حلال يلبسها ... بس إنشاء الله مش هيكون من نايل موتورز لأني أخدت نمرة شاسيه وموتور العربية.... شاسيه رقم 85182899 موتور رقم 234211 وتاريخ خروجها من المصنع 12-2009 .... إحذر هذه السيارة .
طبعاً الحل التاني ودة كان من شخص أقل ما يوصف به إنو مستهتر ولا يحترم العميل إن احناً نروح نستلم عربية تانية من المخزن على ضمانتنا يعني لو ظهر فيها حاجة بعد كدة ملهمش دعوة ونجي ناخد ورقها يوم السبت ... الشخص دة اكتشفنا بعد كدة إنو مدير المبيعات ... تخيلو يقلنا دا إنت عميل من وسط 50 عميل.. للدرجه دي العميل دة مبقلوش إعتبار ؟؟؟!!!! ملاحظة : عربية منغير ورق = مفيش عربية .... ملاحظة كمان : الساعة كانت بقت 8 ...ملاحظة كمان : اوعى تستلم عربية بالليل.
وبعد ما أخت محمود إتشأمت من سمير ريان ومن السيراتو ومن الزيرو كلو قررت تسترد فلوسها بالكامل وتأجل القصة كلها لأجل غير مسمى.
عذراً على الإطالة ... وربنا يبعد عنكم الشر ... وكل عام وأنتم بخير.