الموضوع: ما هى مقترحاتك لتحسين الأداء المروري في مصر؟؟

الموضوع بدأ يأخذ شكله المنتظر والمرجو وما زال هناك العديد من الاقتراحات اللي ربما ربما ربما يؤخذ بها عند تجديد قانون المرور الحالي واصدار قانون جديد...

وشكرا للاداره على تثبيت الموضوع وهو ان دل فأنه يدل على وعى كامل ...

المشاركة الأصلية كتبت بواسطة مصراوي جدا

المقترح بأه هو ان جميع الشوارع الداخلية اللي هي هتكون اتجاه واحد يتعمل في اولها السوستة الحديد اللي بتخرم وتقطع كاوتشات اللي ماشي غلط ده طبعا مع يفط تحذيرية كتير

اعتقد حد قال ان الكلام ده موجود بالفعل في الرحاب بس انا نفسي يتطبق في كل احياء القاهرة وكل شوارعها الداخلية بلا استثناء

فيه مشكلة واحدة ومشكلة حقيقية مش هزار - ان الحديد هيتسرق

و الله يا استاذ طارق اول ما شفت مشاركتك قعدت اضحك مش لأن الكلام غلط بس لأن كلامك جه على الجرح لأن قدام الجامعه عندنا في الشروق امام الجامعه السوست اتبرت و اصبحت تالمه لأن سواقين الميكروباص اصروا انهم يعدوا عليها لحد ما بقت ملهاش لازمه ده حتى انا كل ما بشوفها بقعد اقول لأصحابي ان الحل الوحيد هو انهم يركبوا الغام ارضيه لعلها تشفع لهم
وعجبي

من وجهة نظرى الحلول كما يلى:

1- البدايه من الترخيص: كتير جداً جداً من السائقين غير مؤهلين لقيادة كارو حتى وبالتالى اقترح
- زيادة الرقابه على وحدات استخراج التراخيص لمنع الكوسه وكافه الخضروات المضره
- رفع مرتبات العاملين بتلك الوحدات لنفس السبب
- زياده عدد العاملين ... مش ممكن مهندس واحد فى مرور لسلام يتعامل مع 300 واحد كل يوم !!
- الاهتمام باختبار القياده الذى يتم فى اى دوله (حتى كوتديفوار) على الطريق نفسه ومن خلال ممتحن محترف ولا بد من الالمام ببعض اساسيات الصيانه بجانب القياده

2- الطرق: سوء الطرق سبب حوادث كثيره ولذلك لا بد من:
- الإهتمام "بالخامه" التى يتم الرصف بها
- زياده الرقابه على شركت المقاولات التى تقوم برصف غير مطابق للمواصفات "كبارى الاوتوستراد اللى بتتصلح كل اسبوعين اكبر مثال"
- الاهتمام بالخدمات على الطرق
- تحديد سرعات واقعيه على الطرق ... مش معقوله طريق مفتوح وعرضه 30 متر تكون السرعه عليه للملاكى 80 !!

3- عسكرى المرور: وهو المنوط به منع المخالفات ولذلك لا بد:
- رفع متبات عساكر المرور لحدود آدميه تكفل لعسكرى عدم الحاجه للجوء للبقشيش او العمل كسائس "من الباطن" كذلك الاهتمام بالمظهر الرث للعسكرى اللى بيبقى عامل زى عيل متختخ مدفى صدره بالحزام واساوره مقطعه وحالته كرب
- منع حافز التحصيل على المخالفات لان 90% من العساكر بيكتبوا ارقام وخلاص علشان "يحققوا التارجت"
- الاهتمام بتثقيف العسكرى بقواعد المرور اصلا ... لو سألت كتير منهم اى سؤال عن معانى اللوحات مش هايكون عارفها

دول أكتر 3 عوامل مؤثره فى حالة المرور فى رأيى ... وجنب ده ممكن بعض القرارات مثل:

1- الغاء ترخيص اى سياره موديل قبل 35 او 40 سنه (أيوه فى عربيات بقالها 40 و50 سنه كمان ماشيه فى شوارع المحروسه ربنا يحرسها) مع تسهيلات للحصول على سيارات مستعمله احدث او زيرو

2-انشاء جراجات متعدده الطوابق فى كل الاماكن الحيويه (سواء تحت الارض او فوق الارض)

3- تشديد الرقابه على الميكروباصات الغير صالحه للاستهلاك الآدمى (الترامكو ... رمسيس ... وما شابه)

4- تشديد عقوبات قانون المرور "وتفعيلها" وحط تحتها 400 خط

5- الغاء تحرك النقل التقيل الا بعد 12 مساءاً ... واعتقد ده مطبق فى بعض الاماكن

6- فى فكره العراق طبقها ايام ازمة البترول وهى السماح بالتحرك للسيارات ذات الارقام الفرديه فقط يوم والزوجية فقط اليوم التالى مع زياده توافر الباصات العامه ...بس ماعرفش ان كانت الفكره دى مجديه وللا لأ

ده كل اللى فى بالى .... بس ايه لزمة الكلام واحنا كلنا عارفينه؟؟!!! تفتكروا فى فايده؟

المشاركة الأصلية كتبت بواسطة gemino

.......
-الغاء المقطورات نهائيا

الغاء المقطورات ازاى ؟؟؟؟ ارجو توضيح قصدك

المشاركة الأصلية كتبت بواسطة gemino

يعنى الغاء المقطورة اللى ورا نهائيا و كفاية الصندوق الامامى يعنى الجرار و الصندوق بس
يارب اكون قدرت اوصل المقصود

يا باشا ازاى؟؟ انت حضرتك عارف معنى كده ايه؟ الاثر المباشر زياده اسعار اى حاجه فى الحياه 70% على الأقل لان اى حجم بضاعه كان بيتنقل علىمره بقى على مرتين .... نمره 2 انهيار صناعه النقل فى مصر لأن اى شركه نقل هاتستغنى فجأه عن نص قوتها وكتير منهم واخد قروض وعليهم فوايد ... ده طبعاً بالإضافه إلى توقف مصانع انتاج الترلات او على الاقل تخفيض انتاجها للنص وعلى فكره هاتلاقى برضه زياده فى العربيات لأن فى الآخر البضايع لازم تتنقل بس بدل ما هايكون راس وتريللا هاتبقى راسين بتريللتين !!!!

بعدين ليه نلغى المقطوره اصلاً .. دى حاجه ماحصلتش فى اى حته فى الدنيا !!