الموضوع: ما هى مقترحاتك لتحسين الأداء المروري في مصر؟؟

انا برضه مقتنع تماما برفع السن القانوني لاخراج الرخصه لسن 21 سنه بس ممكن يبقا في حاجه اسمها تحت التدريب للي يكون 18 سنه: يعني ليه شوارع معينه واوقات معينه يمشي فيها وطبعا يمنع من السفر او الطرق السريعه لغايه لما يكون في السن القانوني لاخراج رخصه خاصه هيكون اكيد خد خبره كبيره وبقا بيسوق كويس

تاني حاجه يبقا في ظبط في موضوع اخراج الرخصه يعني ببقا فيه رقابه شديده علي موضوع الوسايط والفلوس واللي بيحصل ده لان ده بيخلي ناس مش عارف اقول ايه عليهم بيسوقو بكل حريه


طبعا عشان انا من اسكندريه هقول الشوارع تتظبط شويه لان بجد العربيات عفشتها راحت في داهيه حتي العربيات الجديده موديل 2007!!!!!!


ويااااااااااااااااااااااا ااااريت منع موضوع انه كل واحد في الشوارع الداخليه يعمل مطب قدام بيته
وحتي لو خايف علي الناس يعمل مطب معقول مش مطب شكل المثلت اللي لو عملت ايه هيحك في العربيه كده كده..... وطبعا بجد نفسي فعلا المطبات القانونيه اللي في الطريق تتعلم بالعلامات الصفرا دي او العواكس اللي بتتحط زي مرسي مطروح كده. عشان معظمها مبيبنش خالص ولازم تكون حافظ الطريق عشان تعرف انه في مطب صناعي


وطبعا الاهتمام شويه بعساكر المرور من ناحيه مرتباتهم ومظهرهم العام لان كده حرام وفي عساكر كتير بيسيبو الاشاره بتاعتهم بدري عشان يشوفو شغل يزودو بيه الدخل عشان يقدرو يعيشو
وطبعا طبعا الغااااااااء موضوع حافز التحصيل علي المخافات ده الاحسن رفع المرتب شويه والرقابه عليه بصوره دوريه مفاجاه كده هيكون احسن كتير

انا حاسس اني كتبت كتير اوي مع ان لسه في حاجات تانيه بس لو الحاجات دي اتحققت بتهيالي انا عن نفسي هكون راضي عن المرور في اسكندريه تحديدا

المشاركة الأصلية كتبت بواسطة gemino

to emadkamel حبيبى ده مش كلامى انا بس ده كلام الحكومة و لو كنت قرات اللينك كنت حاتعرف كده و طبعا كل واحد بيتحيز لشغله و عموما كل الحلول اللى انت قلتها دى موجودة فعلا فى مصر بس الفساد و الرشاوى عندنا اهم من حياة الناس و طبعا كل واحد ليه وجهة نظر و ياخسارة بدل المؤتمر و التمثيل للناس اللى بتحضر المؤتمر من مصر

لو راجعت كلامى مش هاتلاقى اى تحيز لشغلى لانه ببساطه مالوش علاقه بيا انا .. دى صناعه "استراتيجيه" عامة انا هارد على حضرتك بالتفصيل على الخاص احتراما لوقت الزملاء ولصاحب الموضوع

المشاركة الأصلية كتبت بواسطة emadkamel

!

بعدين ليه نلغى المقطوره اصلاً .. دى حاجه ماحصلتش فى اى حته فى الدنيا !!

أستاذ عماد
المقطورة غير مسموح بها في أوروبا و لا أمريكيا و تم الغائها منذ سنوات عدة عندما أكتشفوا مخاطرها
و معلش هي حياة الناس أهم و لا صناعة المقطورة ؟؟؟؟؟؟؟؟؟؟؟؟

رأيي لتحسين حالة المرور في مصر
أولا : سحب الرخص المصدرة إلى اﻵن تدريجيا و التقدم لإمتحانات جديدة يتم تعليم السائقين فيها كيفية القيادة مش كيفية تحريك العربية و تعليمه قواعد المرور
ثانيا : تغليظ العقوبات مثل سحب رخصة نهائي للمشي العكسي مع غرامة لا تقل عن 5000 جنيه مصري
ثالثا : وقف تراخيص السيارات التي تم إنتاجها قبل عام 1980 مع إعطاء أصحابها تراخيص لسيارات حديثة
رابعا : وقف البناء في القاهرة تماما
خامسا : ميكنة الحكومة
يعني مش لازم أروح الإدارة الحكومية علشان أخلص مصلحة و لكن كما تفعل دول أوروبا مثلا ..... يمكنك إرسال الأوراق و المستندات المطلوبة و بهذه الطريقة يتم تشغيل هيئة البريد و إغداق الارباح عليها ........ تخفيف الضغط على المرور و الشوارع ..... توفير كمية الوقود الرهيبة التي يتم إستهلاكها
سادسا : إلغاء الميكروباصات تماما في القاهرة الكبرى مع تشغيل شركات كبيرة في النقل العام بإستخدام حافلات ( أوتوبيسات ) صديقة للبيئة و جميلة الشكل و تكون غير مدعمة علشان تبقى الخدمة فيها كويسة مع الإحتفاظ بالأتوبيسات المدعمة للفقراء و متوسطي الدخل
سابعا : إعادة تخطيط الطرق بلا إستثناء
ثامنا : إجبار المواطنين على عبور الطرق من أماكن عبور المشاة مع وضع إشارات مرور لتوقيف السيارات و تغريم المشاه الذين يعبرون من أماكن غير أماكن العبور
تاسعا : حبس من يسير بكاوتش ممسوح و ليس له معالم مع تغريمه 5000 جنيه مصري
عاشرا : إلغاء المقطورات تماما كما يفعلون في أوروبا و امريكا الشمالية
الحادي عشر : منع التوك توك من السير في أي شارع عام مع احتجاز هذا التوك توك إلى الأبد و بيعه في مزاد عام و حبس قائده
أثنى عشر : يجب وقف إستيراد التوك توك تماما

هذه كانت عينة من الأفكار بتاعتي

بصوا يا شباب .. انا كنت حابب اقفل الموضوع ده لان زى ما قلت صاحب لموضوع الاصلى والزملاء مالهمش ذنب انهم يفتحوا موضوع عن مقترحات تحسين الطرق يلاقوا مناقشه عن جدوى صناعه النقل التقيل .... انما لما لقيت ان كلامى اتفهم ان "تكلفه النقل اهم من سلامه المواطن" ووجود تساؤل يشكك فى رأيى اذا كان " حياة الناس اهم ولا صناعه المقطوره" قلت الحق بسرعه اوضح وجهة نظرى قبل ما اتهم بالكفر :) :) هاحاول اكون محدد ومختصر واتمنى انى لا اضطر انى اكتب تانى فى الموضوع ده

1- كلنا متفقين ان حياه الانسان اهم من اى حاجه فى الدنيا، لم آخذ تساؤلاتكم عن رأيى بهذا الصدد على محمل الجد وافهم انها تساؤلات استنكاريه، واعتقد برضه انكوا اكيد عارفين ان رأيى هايكون ان الانسان وسلامته اهم.

2- لما نيجى ندرس حلول لمشاكل اى صناعه، بنحاول نتجه للحل من خلال منطلق واحد هو حتميه وجود تلك الصناعه، يعنى ايه ... كلنا بنسمع عن مخاطر الموبايل وتأثير اشعاعاته والكلام ده ... هل حد ممكن يقول اننا نلغى وجود الموبايل خالص؟؟؟ ولا الافضل نوعى بخطورته وبالاسلوب او الوقت الامثل لاستخدامه ونعمل لوائح لتنظيم الترددات ونزود فى البحث العلمى لغايه ما نوصل لموبايل آمن؟؟

3- عدد العربيات الملاكى اللى بتعمل حوادث "مسجله" فى الاقسام اضخم بكتير جداً من التريللات غير الحوادث الغير مسجله ... حتى لو عملنا نسبه وتناسب بين عدد الملاكى وحوادثها وعدد التريللات وحوادثها هانلاقى الملاكى أكتر .. فالأفضل فى رأيكوا نلغى الملاكى ... ولا نشدد القوانين بتاعة الترخيص والسير وخلافه مما ذكره باقى الاعضاء الافاضل فى هذا الموضوع؟ نفس الموضوع ينطبق على الميكروباصات والأتوبيس الاخضر وخلافه

4- هاتقولوا ماحنا بنقول نلغى التريللا فقط مش الصناعه كلها وهنا اوضح الجزء الاقتصادى لأن زى برضوا ماحضراتكوا عارفين البلد كلها بتصرخ من الغلاء فلو احنا مثلا قلنا ان الـ 10 طن طماطم بتتنقل على تريللتين فى مره واحده بـ 1000 جنيه هانلاقى انهم هايتنقلوا على تريللتين فى مرتين بـ 1700 جنيه (على الاقل) لان حضراتكوا عارفين ان فيه تكاليف ثابته وخلافه وطبعا حضراتكوا عارفين ان كل حاجه بتتباع وتشترى داخل فى تمنها سعر النقل وده اللى مخوفنا مثلا من زياده سعر السولار... فمن رأيكوا واحنا بصدد حل مشكله ما، هل الأفضل نبص على التبعيات الاقتصاديه للحل واللى هاتأثر على المجتمع ونحاول نوصل لحل يغطى طرفى المعادله وللا الأفضل نجرى ورا حل يعمللى مصيبه على الشعب بعد كده؟ ابقى قفلت باب وفتحت باب ..

5- ده طبعا غير الاثر الاقتصادى على المصانع والعاملين بها وعلى قطاع النقل والعاملين به.

6- بالنسبه لمنع التريللات فى كل دول العالم ماعدا مصر وسوريا واللى مكتوب فى مقاله الأخبار فأنا بصراحه اول مره اسمع حاجه زى كده ... انما اقدر اقول بضمير مرتاح ان التريللات موجوده فى مصر وسوريا والسعوديه والامارات والجزائر واوغندا والسودان وانجلترا وكوبا وجنوب افريقيا ... دى الدول اللى يإما اعرف شركات فيها او لينا فيها مصانع او اشتغلت فيها بنفسى وبالنسبه لباقى العالم ممكن بسهوله نتفرج على اى فيلم امريكى (وكتير اوى من افلام الاكشن بتبقى فى الموانى) واحنا نلاقى التريللات بتزغرط فى الشاشه وممكن كمان احط اللينك دى http://www.hankstruckpictures.com/morton1.htm ودى http://www.swstruckbodiesandtrailers.com/ فيهم بعض الموديلات وواضح من الصور انها فى امريكا واوروبا وكندا وده بعد بحث بسيط على الجوجل

7- وعلى ذكر الاعلام ومن خلال خبره شخصيه .. كتير قوى من الصحفيين غير متخصصين فى مجالات كتاباتهم ولا يدققوا فى صحه المعلومه ... يعنى فى نفس المقال مكتوب ان العربيه ذات الحموله 20 طن تقوم شركات النقل بتحميلها 60 طن !!!! وهنا اعمال العقل واجب ... حد يشرحلى اى شركه لتصنيع التريللات صممت عربيه حموله 20 طن وهى مش عارفه انها بتشيل 60 ... انهى شاسيه ده اللى هايكون مصمم لـ 20 وهايستحمل 60 طن ... ده انا عندى العربيات حمولتها 70 طن باحمل 65 وساعات 60 علشان وعوره الطرق وعلشان شاسيه مايتكسرش وهو صناعه المانى ومن سبيكه مرنه !!!!

8- فى الآخر مافيش مانع من Disclaimer صغير حيث ارجو أن أكون قد وفقت فى توضيح وجهة نظرى وأؤكد انى اسعى لتوضيحها فقط وليس لإقناعكم بها حتى تكون ردودكم مبنيه على اساس فهم واضح لكلامى واحترم وجهة نظركم وماشربش الشاى اشرب قازوزه :) :)