الموضوع: برجاء الافادة فليشيا 95

السلام عليكم
انا كنت محتار اكتب الموضوع في الورشة ولا هنا بس قلت التخصص مطلوب و القسمين في منتدة واحد :)
حكايتي ببساطة مع فليشيا 95 العربية مش بتعاتي بس هي معايا من 3 سنين المشكلة ان مكنش فيه اي نوع من انواع الصيانة و بالتالي ليا معاها قصص كتييييير.
بدون اطالة المشكلة الحقيقية بدأت من حوالي شهر ونص غيرت زيت و فلتر و زي ما يكون العربية ركبها عفريت المهم ودتها للميكانيكي غيرنا بوجيهات و فلتر هوا و فلتر بنزين و روحت استلمها منه - هو مش ميكانيكي قوي هو مركز خدمة في مدينة نصر - المهم كانت الحالة بتاعت العربية انها كدة محتاجة عمرة و طقم شنبر و ممكن يكون فيها شغل في وش السلندر و كلام كتير و سألته لو يشتغل فيها هو قالي مفيش مشاكل و انا اثق في الشغل اللي هايطلعه رغم انه ممكن يكون غالي بس حسيت ان العربية مش على مزاجه او انها قديمة و راح عليها الزمن ويعني هايوافق مجاملة مثلا و طبعا قالي هاتاخد منه من 3 اسابيع لشهر ده شغل ميكانيكا فقط و التكلفة في حدود ال 3000 .
خدتها و كان سحبها مش قوي و الموتور عالي عشان متبطلش و حاجة مش مريحة خالص تحس ان العربية بتطلع في الروح و سخونة جامة جدا لمجرد اني واقف في اشارة .
اسف على الاطالة بس السؤال انا عايز مركز تجديد شامل سواء ميكانيكا و سمكرة و دوكو يعني اروح يكشف على العربية و يقولي على التكلفة و الوقت اللي هايخده في الشغل وتكون حاجة ثقة و شغل محترفين مش اي ميكانيكي -رغم ان فيه منهم اساتذة و التعامل بتاعهم جميل- بس انا قصدي اي مكيانيكي و يقولي اسبوع و الاسبوع يجر لشهر و ميحسسنيش انه هايشتغل في العربية صدقة لا ده شغله انه يقوم العربية على رجلها تاني .
يا ريت لو حد عنده معلومات او تجربة زي كدة او نصيحة يفيدني ......

انا متشكر جدا لاهتمامك و انا هحاول اروح في اقرب فرصة و ابلغك بالجديد . الف شكر