الموضوع: ألماس دهب صفيح .. معدنك ايه؟

المشاركة الأصلية كتبت بواسطة sherifmt

عن نفسي معدني دهب والحمد لله مش غرور وواثق من كدة علشان باتقي الله في كل شيء بداية من لساني مع كل الناس والرضا الداخلي اللي ربنا انعم عليا بيه ورحمة ربنا اللي بالمسها في كل شيء
بشتغل من وانا عندي 9 سنين علشان اصرف علي نفسي بالرغم من وجود والدي ووالدتي بس كانو منفصلين وجدتي هي اللي بتربيني علشان تكسب ثواب ربنا وبفضل اللة كنت باعمل طيارات ورق وابيعها في الصيف وساعات صبي ميكانيكي وعامل في مكتبة لغاية الاعدادية كان مجموعي صغير في اعدادي 140 درجة فقط مع العلم كنت شاطر وكنت متاكد ان التصحيح غلط وبرضة كنت حابب اكمل الحاجة الوحيدة اللي قبلتني كانت مركز تدريب مهني في امبابة كملت برضة وانا بشتغل والحمد لله خلصت الاول علي المركز والتاني علي ترتيب محافظة الجيزة(:
ايامها مكنش في جامعة مفتوحة وبدل كدة اخدت كورسات في جامعة القاهرة بفلوس رمزية اسمها مركز خدمة المجتمع انجليزي وكمبيوتر وبقيت لما انجح في مستوي علي طول ادخل اللي بعدة وكل دة وانا شغال ساعات في محل فطير واحيانا كاشير في محل واحيانا عامل في مطبعة وشيال في فندق j وبعد 3 سنين كورسات سافرت الخليج و اتعلمت ازاي اتعامل مع الاخر 40 جنسية ديانات والوان ولغات.
انا عمري في حياتي ما هنسي الفرحة اللي من القلب لما بشوف واحد كنت اعرفة من سنين في الخليج وعلي وشة ابتسامة من القلب انة شافني تاني بعد 8 سنين برغم اختلاف الدين واللغة والسن ومكنش طايقني ايامها علشان عربي مسلم قوي (: وهو يهودي ومديري لكن الشركة الام في كندا كانت بعتاني هناك يعني مش بمزاجة وضغطني ضغط رهيب اول اسبوعين لغاية ما زهق مني وبالحسني اشتغلنا مع بعض 11 شهر متواصلين ولما جة وقت مغادرته كنت حريص اني اكون في وداعه بهدية (: اول ماشفني تاني كان تاني سؤال لية بعد انت فين؟ كان انا عايزك تشتغل معايا تاني في مشروع جديد !!!
فعلا مش كلام الرضا لمن يرضا ودايما اشكر ربنا علي كل شيء.
ربنا كرمني ووضعي اتحسن كتير جبت عربية وبعدين شقة وبعدين كرمني بانسانة فوق الممتازة اتجوزنا بعد ما عرفتها ب 85 يوم (: ايوة يوم وكان عندي 25 سنة يعني من 13 سنة ور بنا رضاني بطفل وطفلة هما وامهم اجمل ما في حياتي كلها بعد امي وابويا.
انا بكتبلكم دلوقتي من شنغهاي الشركة العالمية بعتاني شهر علشان تدريب فريق الشركة الصيني استعدادا لافتتاح مشروع جديد في الصين والحمد للة المسلم المصري العربي الافريقي الوحيد في المجموعة كلها بكل فخر.
حد عايز حاجة من الصين (:

:

مش عاوز انت شوية حسد؟!

أختى الفاضلة :
الناس معادن ونفائس بعضهم نادر و نفيس كالماس و البلاتين.. وكثير منهم (فالصو) كالصفيح فيهم الغالي وفيهم الرخيص ومنهم من له بريق الماس وصلابة الحديد
وفيهم من يبهرك بلمعانه لكن من اول لمسه له تكتشف زيف هذا اللمعان ويظهر اللون الاصلي الباهت الرخيص، ومعادن الناس تختلف حسب عاداتهم وتربيتهم فكلما حسنت التربية زادت قيمة معدنهم وارتفع قدرهم لدى الجميع قال النووي :( المعادن الأصول وإذا كانت الأصول شريفة كانت الفروع كذلك غالبا) ًفنفاسة معادن الناس بحسن الخلق ومعاملة الناس هناك من تجده كالماس غالي ونفيس باخلاقه ومدى اخلاصه وتبدأ بالنزول حتى تصل الى ارخصها واقلها نفعا وقيمه ولا ينفع حتى نفسه
اذن نحن من يحدد قيمه انفسنا من داخلنا والذى يحدد معدننا المحيطون بنا .....!!
قال لقمان الحكيم لأبنه :
(يا بنى الناس معادن تصقلها الشدائد فأمسك بأسنانك على من يؤازرك فى شدتك ولا تحزن عمن فقدته ولم تجده فى محنتك. (
وشاعر يقول :
الناس معادن ومن اغلى المعادن تلاقى ناس
فيه ناس قلوبهم حجر وناس قلوبهم ماس
وناس قلوبهم حديد وناس قلوبهم لهيب
وناس قلوبهم ياعينى سايعة كل الناس
وكل دولا بشر والفرق فى الاحساس .. وعجبى

بس مش انا اللى اقدر اذكر حقيقة معدنى ....
واعتقد ماينفعش يكون معدني على حسب معدن اللي قدامي
يعنى مينفعش اكون صفيح مع واحد وذهب مع أخر دايما اقول إن الانسان لا يتجزأ يا يكون كويس أو يكون وحش مفيش بين البينين ...
وكل عام أنتم بخير ........