الموضوع: فلذات الأكباد........ وتنشيف الدماغ

المشاركة الأصلية كتبت بواسطة msobhy

طيب بما انكم فتحتم الموضوع فعلا انا طالب مساعدتكم
الحمد لله انا عندى طفلين مروان وحسام
مروان سنتين وسبع شهور - وحسام سنه وسبع شهور

والله العظيم وبدون مبالغة مروان بقى هو المسيطر الاول والاخير على البيت بالكامل
الاكل وقت ما هو عايز - اللعب وقت ماهو عايز - كل حاجة بيقول عليها بتاعتى وفعليا بتتحول تبقى بتاعته
الامر وصل ان اخوه الصغير بقى مقتنع تماما ان مروان هو القوه المسيطره على البيت ومبقاش بيخاف منى او من أمه - بيخاف من مروان بس

الاول كنت بقول كل الاطفال كده وده عادى لغاية لما طلعت رحله مع اصحابى وكنت انا ومروان بس من غير اخوه وامه
الناس كلها اجمعت انه بفضل الله نشيط جدا لكن فى نفس الوقت مزعج جدا - عدوانى جدا - بيتخانق لأتفه الاسباب (ركزوا فى كلمة بيتخانق ديه)

العقاب
حدث ولا حرج
مروان اتعاقب بكل الوان العقاب
حرمان من التليفزيون يجرى على الكمبيوتر (اللى تحول لحصاله) - نقفل الكمبيوتر يجرى على اللعب بتاعته - نزعق له يزعق لنا - نضربه وهو فى قمة الألم يضربنا - نحبسه فى اى غرفة ينام فى اى حته ولا كأن حاجه حصلت

ياكل الاكل اللى عاجبة ولو اجبرناه على اكل يقلب الاكل كله

تحول لوسيلة عقاب بشعة لأخوه الصغير - لدرجة ان حسام (اخوة الصغير ) بيترعب منه وبيديلوه كل اللى هو عايزة بدون حتى ما يزين - اكتشفنا الموضوع ده مع ريموت التليفزيون حسام كان عايزة وكل لما ناخده منه يعيط لغاية لما تدخل الكبير فى الموضوع (مروان باشا) بمنتهى البساطة اخد الريموت من ايده واعطاه لينا - الغريبة ان حسام مفتحش بقة حتى - والاغرب ان حسام صعب عليه جدا

النوم : الباشا بينام يوميا الساعة 7 صباحا ويصحى على الساعة 2 الظهر وبعد كدة ينام تانى على الساعة 3 ويصحى على 5 أو 6

اصحابه
تخيل لما ابنك يكون مثل أعلى لضرب العيال ومفيش اى تقدير لفارق السن - يعنى من الاخر بيضرب الكبير والصغير مش فارقة معاه (بالمناسبة الموضوع ده محرج جداااااااااااااااااااااا)

الحضانة
فى الاول تأقلم عليها بسرعة غريبة وكان مبسوط بيها جدااااااااااااااااااا
بعد كده بقى يكرهها بشكل مفزع لدرجة انه بقى بيحولها لمناحه وعيااااااط وضرب للميس لغاية لما يضطروا يكلمونا علشان نروح ناخده

عصبيه مفزعه فى التعامل مع اللعب (اقصى لعبه ممكن تعيش معاه سليمه من ساعتين الى 4 ساعات)

والله فى حاجات تانى كتيييييييييييييييييييير بس اقربها ان انا ومراتى امبارح باليل بعد ما الباشا حرق دم كل اللى فى البيت قعدنا نتكلم شوية واحنا الاثنين اعترفنا اننا فشلنا فى تربية مروان بشكل مفزع والمصيبة ان اخوه بدأ يتعلم منه

بجد ربنا يستر

باللي حضرتك بتقولوا دا يبقى فعلا ربنا يستر
بس لازم حضرتك مش تسيب الوضع كدا

ههههههههههههههه
مش قادر اقولك بجد انا كنت مخنوق اوى اوى اوى ودلوقتى ضحكت وفكيت
بس مش شماته فيكم
لا بجد بقيت بتمنى اجيب بنات اكتر واكتر
انا مش متجوز وليا امنية واحدة فى الدنيا لما اتجوز اى اخلف بنوتة عسولة وزى القمر واحبها تكون شقيه اوى اوى
انا بعشق البنات وهما اطفال ويكونه اشقياء مش بحب البنوتة تبقى هاديه او بحبها هادية بس بحب الشقية اكتر
وفكرتونى بنفسى وانا صغير
ههههههههههههههههههههههههه ه
يالهوى على الى كنا بنعمله انا واخويا التوئم فى امى وابويا دول كانه بيفكره يهربه من البيت
افتكر وانا صغير المرة الوحيدة الى ابويا ضربنى فيها عشان تقريبا اتفصلت فى اعدادى
كنا واحنا صغيرين نطلع على سور البلكونة ونتمشى ( للعلم احنا الدور التالت ::d )
واحنا العمارة بتاعتنا متقفله بباب حديد وعليه حراسة عشان الشقة الى جمبينا استراحه ظباط فمرة مسكنا انا واخويا التين الشوكى ونشلنا على العكسرى والشاويش ايام زمان بقى وهوب على دماخهم ساعتها انا واخويا هربنا من الاوضة للسفره واستخبينا من ابويا وكان حالف ليقتلنا :d
ويالهوى على اخويا بقى لو كان نرفزنى وانا صغير
مرة مسكت المكوة وهيا سخنته وحطيتها على رجلة سلخته
ومرة كنا فى اسيوط عند جدتى وخالى وواقفين بنلعب فى البلكونة اتخنقت من اخويا مسكته رميته من البلكونة ولله العظيم زى ما بقولك بس الشقة الدور الاول بس تعتبر تانى لان كان فى سلم لتحت ومحل تحت يعنى تعتبر تانى بس الى نجده انه مسك فى سور البلكونة وفضل يقولى طلعنى وانا اقوله لا وفضل يصوت وكنا يا عينى بليل ومافيش حد فى الشارع لحد ما ماما سمعته وجات جرى طلعته
ههههههههههههههههههههههههه هههههههههههههه
ومرة كنا راجعين من اسيوط وكنا بنشوف الناس بتنزل من القطر وتطلع وهو ماشى فقلنا انا واخويا ننزل فى ملوى ولما القطر يجى يطلع ننط فيه زى الناس ( شايفين الفكر الرزين والعقل المتين ) المهم نزلنا القطر جه بيمشى خفنا وكنا فى ملوى
نعمل اية نعمل اية فضلنا نعيط ومش عايز اقولك على ال حصل فى اليوم دة دة محتاج موضوع لوحدة عشان كبير جدا

المشاركة الأصلية كتبت بواسطة abo_hosni

انت فكرتني بنفسي، بعد ما كنت هاتوه منهم كذا مرة بقوا يربطوني بحبل في رجلي لما نخرج. في مرة كانوا بيصلوا في الحرم سبتهم و قعدوا يدوروا عليا نص ساعة لحد ما فقدوا الأمل و الآخر لقيوني بعيد بالعب بأكواب مياه زمزم (أملاها و أدلقها و هكذا)
موضوع الفيديو ده عادي كنت عامله حصالة تلاقي جواه فلوس و معالق و شوك إلخ...
ساعات أصحى الصبح أفتح باب الثلاجة و أكسر البيض كله على الأرض
و طلع عليا كذا اسم أشهرهم "فساد البر و البحر" و "صاروخ" و ده مش من فراغ
صدقت كده لما شفت نفسي في صور و فيديو في أفراح قديمة بتاعة قرايبنا تلاقي حاجة بتجري كده في وسط الفرح ما تعرفش ده بيعمل إيه و رايح فين
كنت لما أنهمك في مشروع فساد و حد ينادي عليا من بعيد "يا أحماااااد" يكون الرد مني " لأ " يعرفوا أني باعمل/عملت مصيبة

و أفتكر أني كنت باتعرض للضغط النفسي كأسلوب عقاب و ساعات باتضرب عادي جداً

الغريب أني لما أشوف طفل بيعمل عشر اللي كنت باعمله من شقاوة و عند ماباعرفش أستحمل و أعرف قد إيه أهلي تعبوا في تربيتي و مش عارف هاربي أطفال ازاي لما أتجوز

عندك حق والله على كدا اهالينا استحملونا ازاي