انا بجد بقيت استغرب جدا لما بقرا تقييمات الناس هنا بخصوص اللوجان من ناحية العفشة واستهلاك البنزين وكذا حاجة تانية
يعني استهلاك البنزين مش بيقل عندي عن 8 مفيش رقم ظهر عندي اسمه 5 او 6 ده خالص
كمان العفشة ناشفة بسمع اقل طوبة تحتي وانا ماشي
والببان من كتر الرزع مكنة الازاز بقت تعمل صوت ماشاء الله
سواء بابي الشمال او اليمين والباب اللي ورا يمين من كتر يأسي منه بقي اللي يجيي يقفله اقوله ارزع الباب عشان يتقفل لاني بالراحة ولا بيتقفل ولا زفت


استهلاك البنزين انا شايفه عادي جدا
نيجي بقي لاكتر حاجة حارقة دمي هي السحب بتاع العربية عبارة عن بطة بلدي بتقوم
خصوصا لما تكون ماشي مثلا علي الرابع وتيجي تاكل غرزة وتتزنق انا كنت في التويوتا كنت بروح جايب التالت وقارس عليه واحدف العربية لحد ماخرج من الغرزة وارجع اديها الرابع تاني
في اللوجان مرة واحدة في صلاح سالم جربت اعملها من بطء السحب كنت هاعمل كارثة ربنا سترها عليا

كنت متوقع اول مانقل غيار اقل اللي هو التالت هاتدي العربية دفعة انقذ بيها نفسي بس لقيت صوت الموتور عالي جدا نتيجة اني نازل من غيار اعلي لغيار اقل لكن السحب زي الزفت


نيجي بقي لحاجة اهم هي التوكيل اللي شعاره ثبت الزبون ويقنعك اني كل حاجة في العربية زي الفل واني كل شكاواتي عبارة عن تهيؤات في تهيؤات واني اي حاجة بقولها في العربية يكون الرد بتاعها ده طبيعي وعادي وفي كل العربيات كده هما 3 جمل رد علي اي حاجة

جديا بفكر مش اشتكي في التوكيل تاني في اي حاجة هاطلع مني علي جهاز حماية المستهلك علي طول وهما يتصرفوا اني مش هاخد العربية غير لما تبقي زي مالناس هنا بتكتب تقييماتها كده بالظبط
لكن اني اروح التوكيل واشتكي ويقابلني واحد مش ضايق نفسه ويثبت فيا لا