ازيكم ياجماعه
ورمضان كريم
هحكيلكم الحكايه من الاول خالص
اتصلت علي التوكيل لاول مره يوم الخميس الي فات علشان كنت عامل تقريبا 700 كيلو علشان احجز صيانه ال1000
المهم اتصلت فا قالي السيستم واقع اتصل بعد الساعه 8
نسيت خالص يوميها واتصلت يوم الجمعه وادوني معاد يوم الاربع الي هوا كان النهارده حاولت في معاد قبل كدا لاني كنت متوقع اعدي ال 1000 كيلو قالولي لا مفيش مجال
قلت خلاص اوكي مش مشكله
المهم امبارح الي هوا قبل معاد الصيانه بيوم لقيت واحده بتكلمني بتقولي انا من التوكيل والحجز بتاع حضرتك اتلغي علشان العدد اكبير ومش عارف ايه ؟؟
طبعا اتعصبت جدا وقلتلها دا مستحيل انا هاجي بكرا يعني هاجي بكرا انا العربيه عامله 1600 كيلو وبمشي كتير كل يوم راكنها بقالي يوم مستني الصيانه المهم قالتلي خلاص تشرفنا بكرا الساعه 8:30
ودا اكسبشن قلتلها خلاص اوكي
نزلت الصبح من البيت ووصلت التوكيل تقريبا علي الساعه 8:37 دقيقه وبقدره قادر لقيت 14 عربيه قبلي وانا 15
مش عارف الناس دي جت امتي
جالي المهندس وحسيت انو مثلا مش فاضيلي قالي صيانه 1000 قلتله اه وراح واخد بينانات العربيه وماشي
فا بصراحه استغربت فا نديته قلتله انا لسه عندي ملاحظات
فاقلي اتفضل
المهم كان عندي شويه ملاحظات :
1-سحب العربيه قل اوي عن الاول وصوت الماتور حسيت انو علي حاجه بسيطه
2-الكاست في الصب كنت بسمع صوت زنه
3- كان فيه صوت تزيق لما بمشي في حته مكسره في العفشه من ورا وكان اول مره اسمعه وانا رايح التوكيل
4-كنت حاسس انو الفرامل ضعيفه
المهم سجل المشاكل دي في الجوب عنده
وقالي هتستني تقريبا 3 ساعات في الاستراحه
نزلت الاستراحه وكانت ممله جدا بصراحه وزحمه وقريبا نمتلي ساعه واناقاعد في الجو الممل دا
وبعدين مفيش عدي ساعتين تقريبا ولقتيهم بينادو عليا المهم طلعت ادفع الفلوس لقيت المبلع 310
ولقيت المهندس بيقلي خلاص تقدر تاخد عربيتك وتمشي كله تمام
قلتله طيب عايز اعرف ايه الي اتعمل في العربيه(طبعا كنت حاسس انو الراجل بيسلقني خالص ومش عايز يتكلم ومش عارف ليه يعني المفروض انو كل عميل يطلع وهوا عارف ايه الي حصل لعربيته وايه الي كان فيها)
المهم جاب الجوب وقلي غيرنا زيت 10000
وعسلنا الماتور فوم
وعملنا تشك علي كهربه العربيه والبوجيهات علشان السحب وحسيت في النقطه دي انه مش عارف ايه الي اتعمل اساسا ولا كأنه شغال في التوكيل
فا قلتله النسبه للكاست والعفشه
قالي العفشه اتربطتت والكاست دا له ضمان لوحده مش تبعنا وهتلاقي العنوان في كتيب الضمان قلتله طيب خلاص اوكي
فا سألته عايز اختم الضمان
وهنا كان الرد العجيب قال ايه بقا: دي مش مهم يعني خلاص محنا مستجل عندنا كل حاجه مش مهم خد عربيتك وامشي كله تمام يافندم
فا قللتله لا انا عايز اختم الضمان قالي طيب هاته ونختمهولك
امهم جبت الضمان واتختم وكله تمام
طلعت العربيه لقيت العربيه متبهدله الكرسي الي جمب السواق الدواسه عليها شحم ومكانوش حاطين عليه ولا كيس بلاستك ول علي الدواسه الورقه الي بيحطوها
طبعا مكنتش فايق ارجع اشوف الحكايه دي
وخدت العربيه ومشيت
وهنا بقا جي النقطه المهمه ايه احساسي قبل الصيانه وبعد الصيانه:
1- السحب اختلاف نهائيا وكأني راكب عربيه تانيه بقت بتجري لوحدها
2-الفرامل بقت افضل بكتير جدا من الاول بس بردو في النهايه فرامل عاديه مش ايه بي اس بس ادائها مقبول جدا
3-صوت تزيق العفشه اختفي والعفشه بشكل عام بقت انعم بكتير من الاول
4-حاسس انو الدركسيون بقا اتقل شويه من الاول وللوهله الاولي كنت حاسس اني راكب عربيه مفيهاش باور اساسا بس بعد كدا اتعودت علي انه تقيل نسبيا عن الاول ودا مش عارف سببه
5-شدو فرامل اليد بطريقه غبيه بس مش مشكله
ودا الي حصل في التوكيل وبشكل عام الخدمه لو هقيمها هديلهم 8 من 10
وهما محتاجين مهندسين استقبال يكونو اكتر تفاهما وياخدو ويدو مع العميل علشان الراحه النفسيه وبتهئلي ان الاستراحه محتاجه تعديلات لانها سيئه يعني كان نفسي تبقا زي تويوتا او هوندا الي علي الدائري علي الاقل قدر تشوف العربيه وهما شغالين فيها من الازاز
بس
بس الحمد لله اليوم عدي علي خير
المفضلات