الأخ powersha ما تزعلش نفسك و تنكسر من جواك كلنا اتعرضنا لمواقف كثيره في حياتنا و بتبقا في الأول صعبه بس بتعدي و الانسان الذكي هو اللي يستخلص منها العبره .
المهم معلش انا شايف اما ان ضابط القسم ده شكله جوز اختك ده مصاحبه او ليه معرفه به , او انت معلش انا بكلمك بصراحه و ما تزعلش ( لسه صغير ) علي الكلام ده و بالتالي البيه الضابط مش مقتنع بيك او مش مصدق ان في واحد في السن ده يقدر يدخل قسم و يعمل محضر و الكلام ده , و ده طبعا ما يعبكش لا سمح الله بل بالعكس انا احترمتك جدا ودي مواقف الرجوله .
دلوقتي لازم تاخد حقك بالسبل المشروعه و هي هطول لو ما معاكش واسطه بس في النهايه هتاخد حقك , لانك لو ما معملتش كده هتتعقد من جواك و هيبقي عندك كره و ناقم علي المجتمع و انت اللي هتتعب برضه في الآخر ؟ طيب ليه كل ده؟؟!!
المطلوب دلوقتي تشوف حد من قرايبك او اخواتك ما ينفعش يبقوا شايلين ايديهم كده الموضوع مش سهل لو ما اتوضع لوش حد , و تروح تعمل محضر (و اهم حاجه ما تبالغش في الأحداث ) في نفس القسم و تثبت فيه واقعه الضرب و التقرير الطبي و تشوف شهود حضروا الواقعه وده مهم و الضابط ده لو رفض يبقي تطلع علي اداره التفتيش في مديريه الأمن اللي انت تابع ليها و لو ما حصلش حاجه تطلع علي وزاره الداخليه نفسها عندهم هناك مكتب لشكاوي المواطنين و بيعاملوا الناس كويس و ما تخافش و تشوف حد يكتب شكوتك بصيغه جيده توضح مدي الخطر و الاعتداء اللي وقع عليك والذي يهدد حياتك و حياه اسرتك , و لو لا قدر الله و ان شاء الله ما يحصلش ما تمش حاجه من الخطوتين اللي فاتوا , يبقي تشوف محامي يكتب مذكره و يوديها لمكتب المحامي العام في محافظتك شارحا فيها الأحداث و يوضح مدي تقصير الشرطه في اتخاذ اجراءاتها .
و بعد اذنك لو تسمح اقول رايي في موضوع اختك و ارجوا الا تعتبره تطفل علي خصوصيتك , وهو انه بعد ان شاء الله ما تاخد حقك من ابن اللذين ده و ان شاء الله يتحبس في القضيتين , يبقي الانفصال هو الحل لان واحد بالشكل ده غير امين علي حياه بشر و طالما وصل به انه لا يصرف علي البيت و سمح لنفسه انه يستغل ضعف حيلتكم و يتصرف كده يبقي ده بايع علي طول ذراعه و مش باقي حتي علي (شعره معاويه ) , و بالتالي حياه اختك معاه هتبقي مشاكل في مشاكل و لو معاها اولاد هيتبهدلوا اكتر , طيب وليه ؟؟؟
المهم بعد ما تحبسوه ما تنساش تعمل ليه محضر بعدم التعرض لاي حد من عيليتكم بما فيهم انت و اختك طبعا . و ربنا يوفقك و ابقي طمنا , في رعايه الله .
المفضلات