سخونية و رشح زيت على موتور 126

**bambino** · 14-08-2010 02:47 PM

السلام عليكم

عندى 126 و لمبة الزيت كانت ابتدت تنور (على خفيف) و أنا بسخنها واقفة. فيه رشح زيت على الموتور نازل من عند فتحة الزيت فوق لحد تحت خالص.

سألت قالولى غير غطا الزيت و فعلا لقيته سايب شوية. الجديد ماسك تمام. أنا لسه بطلع رخصتى أنا و مقدرش أمشى بيها عشان أقول أكتر لكن أنا عايز أعرف الماسورة القصيرة المفتوحة جنب فتحة الزيت دى بتعمل إيه بالظبط؟ قالولى فتحة الهوا...صح؟ و هل ممكن تكون هيه اللى بتسرب الزيت؟

طيب صاحب العربية كان سايب الخرطوم الواصل من الفلتر - فلتر الهوا - للماسورة دى مش موصله..هل توصيله يعمل مشكله؟

أنا شفت 126 تانية و الخرطوم ده فيها مش موجود أصلا و الموتور كله باللى حواليه فى كل حته كان غرقان شحم و هباب أصله زيت متراكم - أكيد نفس المشكلة... و لا إيه؟ مع العلم إنها بتمشى مسافات!! (بس صاحبتها مدام متعرفش حاجة فى الموتور)

و دى صور الموتور بتاعى

**samirayad** · 14-08-2010 08:36 PM

طيب صاحب العربية كان سايب الخرطوم الواصل من الفلتر - فلتر الهوا - للماسورة دى مش موصله..هل توصيله يعمل مشكله؟

هو فاصلها علشان المكنه خفيفه وبتنفخ زيت

وخللى بالك اليومين دول من موضوع اللمبه

وتابع مقاس الزيت كويس

لأن فيه شك أنك محتاج طقم شنبر

**bambino** · 15-08-2010 12:14 AM

شكرا جزيلا لردك السريع..عندى بعض أسئلة تانية، لو مافيهاش تقل:

المشاركة الأصلية كتبت بواسطة samirayad

هو فاصلها علشان المكنه خفيفه وبتنفخ زيت

يعنى ال 126 كلها كده و لا تقصد إن موتورى هوه اللى فيه مشكلة؟ و خفيفة تقصد بيها إنها بتنطر زيت لفوق؟ طب و هل فيه وسيلة لمنع طرطشة الزيت دى أو نفخ الزيت ده؟

وخللى بالك اليومين دول من موضوع اللمبه

وتابع مقاس الزيت كويس

لأن فيه شك أنك محتاج طقم شنبر

إيه هوه طقم الشنبر و يتكلف كام؟

شكرا جزيلا مرة تانية

و كل سنة و انت طيب

**samirayad** · 15-08-2010 02:13 AM

يعنى ال 126 كلها كده و لا تقصد إن موتورى هوه اللى فيه مشكلة؟

بالطبع أقصد مكنة سيارتك أنت وليس كل ال 126

و خفيفة تقصد بيها إنها بتنطر زيت لفوق؟

نعم بسبب هروب كبس من المحرك لمنطقة التاكيهات

طب و هل فيه وسيلة لمنع طرطشة الزيت دى أو نفخ الزيت ده؟

نعم ........فالوسيله هى تغيير طقم الشنبر وعمل الازم لوش السلندر

من تغيير دلايل وروديه لمنع تفويت الكبس لأعلى

إيه هوه طقم الشنبر و يتكلف كام؟

حلقات شبه الغوايش المفتوحه بمقاس معين بتتحط حول البساتم لحبك غرف الحريق حبك جيد ومنع التفويت

ولو على الشنبر والروديه

أعتقد مش حتتكلف كتير

نقول 500 ج بالمصنعيه

_________________

بس أنت تابع خروج الزيت من المنطقه دى وأنت مدور

وتابع مقاس الزيت برضه علشان تحافظ على موتورك من أى مشاكل

يعنى بعد مشوار صغير قيس الزيت وشوفه بينقص كتير ولا لا