النهاردة روحت عند واحد إسمه عمرو فاتح ورشة صيانة خاصة به في آخر فيصل.هو أصلا بيشتغل في البافاريا فرع القطامية.وبالليل في ورشته.المهم عمل فحص شامل للعربية وكانت النتيجة كالآتي.

1- فيما يخص الميكانيكا بالكامل ( موتور - كهربة - حرارة - تبريد - تكييف ....إلخ ) كله تمام ومفيش أي مشاكل الحمد لله.

2- فيما يخص العفشة,,محتاجة بيضة مقص علوي خلفي يسار.و جلب مقص أمامية وشدادات. والباقي تمام والحمد لله رب العالمين علبة الدريكسيون تمام.

3- فيما يخص صالون العربية.محتاجة شغل سروجي لفرش القوايم الأمامية ( القوايم بتاعتها فرش قماش مش بلاسيتك و فك من الشمس ) وكذلك القايم الخلفي يمين. ومحتاجة كاوتش داخلي للباب الخلفي اليمين.

4- فيما يخص دورة البنزين..كنت عملت موضوع إمبارح بشتكي فيه من كتمة وبرجلة العربية لما التانك يقل عن النص..وبعد الكشف ((نظريا فقط )) إتضح إن ده بسبب الشوائب في البنزين ووضحت في ظهور دخنة سودة بسيطة في الدوارة الصبح فقط.لأن صاحبها القديم الله يساهله بيته كان في كرداسة ومحطات البنزين هناك تفكر الواحد بفيلم حين ميسرة كده.المهم الراجل قال حاول تحرق البنزين اللي في العربية كله وأروحله ينظف التانك ونفولها بنزين نظيف.

ده كل اللي في العربية.محتاج منكم حد يدلني علي مكان مضمون وأسعاره حنينة في قطع الغيار.لأن مستحيل ألجأ للوكيل بأي حال من الأحوال لأن هناك في إستهبال رسمي...أنا آسف علي الإطالة وشكرا.وأي حد عنده رأي في الأربع نقاط دول يا ريت يفيدني.