ان شاء الله ناوى اجربه
عرض للطباعة
بالنسبه لفيسكو 2000
انا واحد صاحبي عمل بيه لغايه دلوقتي حوالي 3500 كيلو والزيت منسوبه كويس نسبيا ولكن اللزوجه قلت شويه ومابقتش زي الاول وهو ناوي يمشي عليه لغايه 5000 كيلو ( عربيته اكسنت مو 2000.
انا مشيت عليه حوالي 1200 كيلو ومنسوبه تقريبا ثابت علي المقاس واللزوجه بتاعته كويسه بعد مشاوير السفر( والعربيه لسه سخنه) وجاري التقييم مع عدد كيلو مترات اكبر شويه .
ياريت من اللي عنده خبره في انواع الزيوت يدلي برأيه ..وكمان عايز اعرف ليه التغيير من نوع لآخر غلط علي الموتور؟!
دلوقتي انا داخل علي 2000 الملاحظ علي الزيت انه ابتدي ينقص علي المقاس ( حوالي ربع ليتر) مع انه من فتره كان مظبوط (في الالف الاولي) ونفس معدل استخدامي للسياره يعني من غير شد وحرق وانا الزيت عندي ماكانش بينقص في الموبيل xhp ...
اما بالنسبه للزوجه فهي مرضيه بعد المشاوير الطويله.
بالنسبه لصوت العربيه .. بصراحه اول ما حطيط الزيت الصوت كان عالي عن الموبيل لما بغيره ودلوقي حاسس برده انه عالي بس مش للدرجه المزعجه .
بس انا مش هاستني علي الزيت اكتر من كده لان نقص الزيت يعتبر علامه علي انه ابتدي يتاثر بالحراره ( في حاله سلامه الموتور فنيا).
وانا دلوقي عايز رأيكم لاني هاغير الزيت ومحتار ..
1- ارجع للموبيل xhp اللي كنت ممشي العربيه عليه بقالي فتره وبغيره علي 2500-3000
2- اجرب فيسكو 3000 لاني حاسس ان ده الزيت الموازي لمواصفات موبيل xhp SL مع فارق منشأ الصناعه ( اماراتي) حسب ما بسمع يعني ممكن يكون افضل من الموبيل المصري؟؟؟
3-اجرب نوع تاني بس يكون مضمون زي الشيل مثلا ؟؟.
مع العلم اني باسمع ان تعدد انواع الزيت ممكن يتعب الموتور..
ياريت اللي جرب يقولي ايه الاخبار معاه بكل صراحه لاني اثق في رأيكم.. واسف للاطاله
انا كمان يا صديقي تقريبا خلصت اول 2000 كم بزيت فيكسو 2000 , والفتره اللي فاتت زي ما قولتلك لاحظت حاجه بعد سفريتي لمرسى مطروح و مع مسافه حوالى 1500 كم في ايام معدوده , والملاحظه كالاتي :-
---- ملاحظات سلبيه -----
- مع موبيل 1 كانت الحاجه الوحيده اللي بتعمل تعريق او تبخير خفيف هي خرطوم البخار اللي طالع من وش التاكيهات
لكن حاليا بدأت الاقي تعريق زائد عن الطبيعي على خرطوم البخار وكمان ظهور مناطق جديده للتبخير , زي وش التاكيهات نفسه والخرطوم الموجود يمين الموتور (مش عارف اسمه) , لكن مش بالطريقه المبالغ فيها , بس بصراحه شكل التبخير ده بيزعلني
- لون الزيت تقريبا اتغير تماماً
---- ملاحظات ايجابيه -----
- مقياس الزيت لسا معتدل ومحصلش فيه نقص ملحوظ
- صوت المكنه معتدل ومع ال rpm العالى الصوت ناعم ومش مزعج , حتى لو على الغيارات الصغيره
دي ملاحظاتي الفتره اللي فاتت خلال الـ 1500 كم المقطوعه في طريق السفر والمشاوير الداخليه في مرسى مطروح (حوالى 950 كم للطريق والباقي تحركات داخل البلد) , و بردو عشان اكون وضحت الصوره كلها هوضح ظروف الطريق والعربيه خلال المسافه دي
- كان معدل سرعتي على الطريق 140 كم الى 170 كم (ذهاباً واياباً) مع حموله كامله للعربيه , مع توقفين للراحه خلال الطريق كل توقف لمده 10 دقايق او اقل تقريباً
- وبالنسبه للتحركات الداخليه كان معدل السرعه من 40 كم الى 60 كم عشان معظم الطرق محددة السرعه وعليها رادار , لكن في اماكن كنت فتح فيها لسرعات عاليه لمده بسيطه
وبصراحه بعد تجربتي دي تقريبا شبه قررت اني ارجع تاني للموبيل 1 وابعد عن الفيسكو ولكن ليس لعدم اثباته كفاءته , ولكن لان تضارب الاراء والاقوال حول جودته وكفاءته بدأ يقلقني , وبصراحه انا بالنسبه ليا المكنه مفهاش هزار , وعشان كده قولت استعمل المضمون والمشهور لان بردو الاسم التجاري ليه حسابه وسمعته وبالتالى الناس دي بتراعي حاجات كتير , ويمكن رأيي ده يكون مخالف لبعض اراء الزملاء الافاضل بإستخدام مثلا فيسكو 3000 او 5000 , بس انا بفضل الزيت التخليقي وفي حاله المقارنه بين فيسكو 5000 وموبيل 1 فأظن ان الموبيل 1 يكسب بحكم خبرة الشركه و سمعتها في السوق العالميه
وبإذن الله بردو هكمل متابعه حاله الزيت واداءه الفتره اللي جايه لمده 1000 كم مثلا , لو ظهرت ملاحظات سلبيه فـ ده هيخلي قراري أكيد في الابتعاد عن فيسكو , وان شاء الله هبلغكم الأخبار اول بأول
عجبتنى اوى الجملة دى !! كلامك دا مش هنا فى مصر . بكرر كلامى تانى مفيش فى جمهورية مصر العربية كلها غير مصفة واحدة لانتاج الزيت { مصر للبترول } و كل الشركات بتاخد حصصها من المصفة دى
انت مشفتش مشاركة الاخ اللى جاى من الكويت وحط موبيل وان قبل ما يسافر حصل اية و قال اية ؟؟؟
عموما فى معلومة جديدة عرفتها :
ان الزيوت التخليقية بصفة عامة نسبة التبخير فيها اعلى من الزيوت المعدنية بغض النظر عن ماركة الزيت طبعا مع فارق الاداء عن المعدنى للاحسن -- مصدر موثوق منة
انا كنت بستخدم زيت xhp موبيل وكنت بصراحه عاوز اغير لفيسكو 5000 لكن لقيته غير متوفر بنسبه لظروفي في الشغل عشان بسافر كتير ومش وغالبا مش بلاقي الزيت ده متوفر في اغلب المحفظات رحت غيرت امبارح زيت موبيل 1 لاول مره اجربه لسه طبعا مقدرش احكم علي اي حاجه بس اول حاجه لاحظتها واضحه ان صوت المتور نزل قرب النص يعني هدي المكنه بنسبه عاليه تكاد تصل للنص لاكن طبعا ده مش حكم اطلاقا باي طريقه من الطرق علي زيت فيسكوا لاني مجربتوش اصلا مع ان كان نفسي اجربه علي كلامك لاكن الظروف حكمت وعمتا هاقولكم ايه اخبار موبيل 1 بعد ما امشي بيه شويه خاصه اني هاعمل سفريات كبيره خالص بالعربيه الاسبوع الجاي
بمناسبة كلامى ان معدل تبخير الزيت التخليقى اكثر من المعدنى . اللى اتقالى ان لو انت من اللى بيسافروا كتير يفضل تحط معدنى مش تخليقى . و الله اعلم دا اللى همة قالوة
يا جماعة طب ليه محدش بيفكر فى زيت كاسترول او حاول يجربه انا بصراحة كنت فاكر انه مش موجود فى مصر بس بعد ما عرفت انه موجود هجربه ان شاء الله المرة الجاية
و كمان انا سمعت ان ترتيبه رقم 1 عالميا
و اعتقد انه مش هيبقى طالع من المصفى بتاعه مصر للبترول زى ما الاستاذ كريم فهمى قال ان الشركات كلها بتاخد حصصها من المصفى بتاعه مصر للبترول اعتقد انه هيبقى مستورد من الخارج و مفيش دخل للصناعة المصرية فيه
يا ريت لو حد يقدر ياكد المعلومات دى يبقى كتر خيره و لو فى عديل او معلومة مش مظبوطة قولتها يا ريت حد يقول الصح بتاعها