الموضوع: مقارنة شاملة بين بروتون و byd

المشاركة الأصلية كتبت بواسطة khpopo

احنا الى تشرفنا بناس زيكم الصراحه قمه فى الراى المحايد وامتياز فى الذوق :m_yes[1]:
ربنا يوفق

أخى الفاضل .. أشكرك على شعورك الطيب .. وكلامك الجميل .. وأهلا وسهلا بك فى كل وقت .. وحقيقى شرفتونا .. مع خالص تحياتى .

الموضوع ده من أحلى المواضيع اللي فيها مقارنة و الحمد لله .... مفيش أختلاف في الرأي أو خناقة قامت

شكرا يا محترمين ........... ربنا يديم المحبة و المعروف و الشعور الطيب .....

المشاركة الأصلية كتبت بواسطة tutankhamoun

شكرا يا محترمين ........... ربنا يديم المحبة و المعروف و الشعور الطيب .....

أمين .. أمين .. أمين .. .. .. أخى العزيز .. شكرا جزيلا لك ولجميع الأخوة المحترمين .. و لكم جميعا تحياتى .. .. ..

الإخوة المحترمين أعضاء نايل موتورز (طبعاً مش هفرق أي قسم لأننا كلنا أسرة هنا)

أولا:ً بحيي كل من شارك في هذه المناقشة المحترمة اللي بقالي زمان مشفتهاش
ثانياً : أحب أوضح نقطة صغيرة ان مشكلة علبة الدريكسيون متعتبرش مشكلة لأنها في بعض العربيات الساجا مش كلها (وانا كنت واحد منهم وغيرتها من غير أي مشاكل بس بعد فترة حوالي 20 يوم لأن عربيتي كانت أول عربية تتباع في السوق وأول عربية تعمل صيانة ومكانتش قطع الغيار متوفرة والمهندس في التوكيل قالي بالحرف الواحد حتى لو ترتب أي عطل على المشكلة دي احنا مسئولين عنه وانت مش عليك أي مسئولية هنصلحهولك برده) وبعد تغيير العلبة مكانش في مشاكل (على فكرة طول الفترة دي كانت العربية معايا ممتازة كل المشكلة عي نقص زيت البور بمعدل النص كل 1000 - 2000 كيلو حسب ما أذكر)

ثالثاً: ال byd حسب ما اسمع وأعرف ناس معاها العربية دي من أول ما نزلت قبل ما تتجمع هنا وطاحنين العربية وهي شغالة مفيش مشكلة

مشكلة الصيني عموماً ان أي منتج بييجي مصر يخضع لرغبة المستورد اللي لو معندوش ضمير بيطلب مواصفات تعبانة وللأسف الوحش مغطي على الحلو وبيخلي الناس تخاف من الصيني

وأكبر دليل على ان في صيني كويس ان توكيل زي عز العرب ياخد توكيل جريت وول وهو مش هيخاطر بإسمه في حاجة مش مضمونة

لاحظت ان الأخ اللي بيسأل ميال ل byd فأنصحه يستخير ويشوف العربيتين على الطبيعة مع إني متأكد من حيث الشكل والحجم والكماليات ال byd تكسب ولكن الساجا خلال الفترة اللي جاية هي الحصان الأسود وهيكون إعادة بيعها فيما بعد أسهل بإذن الله (طبعاً إعادة البيع مش هي الأساس اللي بشتري علشانة العربية) أهم حاجة تكون مرتاح نفسياً للعربية توكل على الله والعربية اللي انت مرتاحلها متترددش كتير

أما بالنسبة للساجا أأقدر أتكلم عليها فهي عربية ممتازة بالنسبة لسعرها وانا دلوقتي عامل 18000 كم وبقالها معايا 10 شهور وراضي عنها تماماً وتقدر ترجع لقسم بروتون وشوف المواضيع المكتوبة عن الساجا وهناك أنا كاتب بالتفصيل مش هقدر أكتب هنا خوفاً من الإطالة

وربنا يوفق الجميع