الموضوع: الاستبن نزل ولا حول ولا قوة إلا بالله - والسبب رعونة الناس في بلدنا

كل سنه والوحوش طيبين وبخير

انا مستلم العربيه من شهر كده وعامله 1200 كيلو دلوقتي والحمدلله عربيه كويسه جدا في كل حاجه وتستاهل تمنها

المهم حصلي النهاردة موقف مش ظريف لكن قدر الله وما شاء فعل - بس الموقف ده اظهرلي شيء مهم

الي حصل اني كنت ماشي النهارده بعد الفطار في منطقة شيراتون - مصر الجديده في شارع فاضي ومفتوح بس الاضائة فيه خافته شويه

طبعا انا فاتح النور العادي وماشي لقيت مطب طبعا عادي لوجي عارفه شغلها والي بعده كل ده والدنيا ظريفه

وبعد كده لقيت الطريق ممهد فجبت التالت وطلعت وعلى 3.5 rpm نقلت على الرابع وشفت على بعد 20 متر واحد واقف على الرصيف رعشتله نور وزمرتله وقولت امشي عادي وكان ده عند تقاطع بس المنطقه فاضيه قمت ماشي وكنت تقريبا على سرعه 70 وفجأة حسيت اني خبطت في حاجه جامد من تحت - انا اتلبشت وركنت بسرعه على اليمين نزلت ابص لقيت الكوتش الامامي شمال نايم على الارض والدريكسيون محدوف يمين!!!

نزلت ببص ورا لقيت اني خبطت في دبشه كبيره والخبطه كلها جت في فرده العجل الامامي شمال

المهم لقيت الولد الي كان واقف على الرصيف ده جيلي وقالي انا آسف هو حضرتك مشفتش الطوبه ولا ايه انا اصلي حطيتها علشان بعلم اختي تحود وكده

قولتله في حد يعمل كده يحط طوب بالحجم ده في المكان ده من الشارع

قالي ما الناس كلها عارفه ان ده شارع فاضي والناس بتيجي تتعلم فيه

قولتله ايوه بس بيحطه الطوب او الاقماع على جانب الطريق على اليمين مش في نصه على الشمال؟؟؟؟؟؟؟؟!


المهم قعد يتأسف وانا تحت امرك وحضرتك معاك عده ... لسه برد لقيت واحد جي معاه بالعده من عربيته وقالولي احنا هنغيرهالك لحد متروح بنزينه

المهم نزلت الاستبن وكان احساس وحش خالص والعربيه لسه ما مشيتش

المهم فكو العجله ببص عليها لقيت الكوتش نايم خالص والجنط شفته معوجه بشكل ملحوظ طبعا الدم فار في دماغي وهما عمالين يقولولي احنا اسفين وتحت امرك ... قولتلهم الحمد لله انا مش بقبل عوض

ركبوا العجله واتأسفوا وشكلهم ولاد ناس مش وش بهدله سبتهم ومشيت وحطيت الفرده البايظة في الشنطه


ولسه بقول يا هادي وبطلع حسيت بالدريكسيون في ايدي معوج ناحية الشمال
اتابني أسوء احساس في الدنيا وقولت اكيد حصل حاجه في الزوايا

المهم طلعت على بنزينة موبيل ملقتش فيها ظبط زوايا لكن رحت لبتاع الكاوتش قولتله بص على العجله وقرط عليها وظبط الضغط

وبعدين فتحت الشنطه وورتله الفرده

قالي الجنط ده اتعوج ما يتصلحش والكوتش عايز شنبر؟؟؟؟؟؟؟؟ وخدو بالكم من هذا اللص اللعين

قولتله طب شكرا ورجعت الفرده ومشيت وطلعت ادور على بنزينه تانيه فيها ظبط زوايا لاني مش هينفع امشي كده

المهم لقيت على طريق الاوتوستراد بنزينه وطنيه

دخلت لقيت فيه ظبط زوايا دخلت عليها وظبط العربيه

وابتدى يشيل الطاسات من الاربع فرد علشان يركب جهاز ظبط الزوايا والمفاجأة انه وهو بيشيل طاسة الفرده الشمال الي ورا لقيت برده شفة الجنط معوجه بس بصورة اقل بكتير جدا من الفرده الاماميه

فقولتله على القصه قالي بعد ما نخلص هنديها لبتوع الكوتش يبصوا عليها

المهم قعد يظبط في الزوايا وطبعا الموضوع كله كان في العجل الامامي ويتأكد من قرايات الجهاز ووزنه العجل والدريكسيون
وجاب مفتاح وراح للعجله الشمال قدام (وانا قولت في نفسي هو هيفك ايه ده) وانا على ايده وكان طبعا بيظط زاويه العجل

نزلت ابص على العربيه من تحت كانت طبعا حاجه جميله انك تنزل السلم وتشوف العربيه بالكامل من تحت وشوفت الدرع الي بيحمي المتور والحمد لله الطوب مجاش في اي حاجه في جسم العربيه

وقالي خلاص كده تمام ... حسابك كام ... قالي 20 جنيه قولتله ماشي كل سنه وانت طيب


المهم ركبت وحسيت ان الدنيا اتظبطت واتعدلت زي الاول

رحت لبتاع الكاوتش اول ما شاف الفرده الي في الشنطه قالي استعدال انت خبطت في طوبه ولا ايه يا باشا

قولتله ايوه الحمد لله قدر الله وما شاء فعل

المهم نفخ الكوتش تاني والعجيب انه اتنفخ وكشف عليه بالصابون مفيش اي خروم ولا حاجه؟؟؟ طيب هو هوى ازاي لو حد عنده اجابه يا وحوش؟؟؟

وجاب شاكوش وبدأ يعدل الجنط وكل دقه من الشكوش على الجنط كنت بحسها في دماغي ... اصل الفلوس لسه ما بردتش

المهم عدله وقولتله هي كده تمام؟؟؟ قالي زي الفل مفيهاش حاجه

قولتله طيب انا كنت لسه عند واحد بتاع كوتش في موبيل وقالي دي عايزة شمبر؟؟

رد عليه بصوت عالي وقالي شمبر!!!!!!!!!!!! ايه يا باشا دي تيوبليس

ده كان عايز يضحك عليك ويبعلك شمبر واصلا الكوتش ده تيوبليس مش بيتحطله شمبر

المهم سألني هو ده الاستبن .... قولتله لا الاستبن ركبته

خدته وقولتله بص بقى على الفرده الشمال ورا راح فكها وبرده استعدل الحته المعوجه في شفة الجنط وكشف عليها علشان الثقوب والخروم والحمد لله مفيش

وقمت مديله حلاوته واتكلت على الله وانا بقول الحمد لله

نيجي بقى للحاجه الجميله في الموضوع
اني اكتشقت ثبات واتزان العربيه دي ان بالسرعه دي وضخامة الحجر الي جه في العجل انا كنت حاسس اني ثابت على الارض ومتزن الحمد لله ... كان ممكن لا قدر الله في حركه زي دي العربيه تتقلب

انا حاولت اسرد القصه بالتفصيل الممل علشان الناس تستفيد من التجربه الوحشه دي وتاخد بالها من شوارعنا والناس الي في شوارعنا ... ربنا يهدي


ولو في حد منكم يا وحوش عنده نصيحه ليا بعد الي حصل ده يا ريت يقولي

شكرا جزيلا وربنا يسترها معانا جميعا

المشاركة الأصلية كتبت بواسطة m.osman

يعني الكاوتش طلع مش مخروم ؟
يبقى غالباً الفردة نامت عشان الجنط اتعوج ...

حمد لله على السلامة

الله يسلمك ... بس انا مش فاهم يعني ايه الفرده نامت عشان الجنط اتعوج ممكن حضرتك تشرحلي ... يعني هل دي خاصيه في الكاوتش التيوبليس؟

المشاركة الأصلية كتبت بواسطة mohamed1979

+1111111
فعلا الفرده نامت عاشان الجنط اتعوج

شكرا جزيلا للمشاركه
تحياتي