الموضوع: تويوتا _ستارليت_ ..... (أراء وتقييمات + صيانات + أسعار قطع غيار)

السلام عليكم .. اخوكم محمود وعندى ستارلت 94 بقالى سنة .. ربنا يكرمكم على المجهود الجميل اللى بتعملوه ويجعله فى ميزان حسناتكم .. فمن كان فى حاجة اخيه كان الله فى حاجته .. بجد ستارلت عربيه جميلة جدا وتحس فيها باصالة اليابانى بتاع زمان لما كانت تويوتا بتقول انا تويوتا .. العربية اول ما جبتها يا جماعة غيرت حاجات كتير اوى وكنت حاسس انى اضحك عليا وطبعا لانى كنت اول مرة اشترى مستعمل .. طبعا اول ما غيرت زيت حطيت موبيل 3000 ولما الميكانيكى عرف كان هاين عليه يضربنى ههههههه .. ولكن قدر الله وما شاء فعل واعتقد ان دا كان سبب فى ان الماتور كفائته تقل شوية ولكن ربنا سلم ومكنتش مشيت عليها كتير وغيرت نوع الزيت .. غيرت كمان سير الكاتينا وطقم اصلاح سيرفو الفرامل وتيل امامى وتيل خلفى بالبلى والاولسيهات وطقم جوانات وبطارية جافة .. ما علينا مش عايز اطول عليكم بس انا عندى شوية مشاكل وبجد فرحت لما عرفت المنتديات هنا ولقيت حد مهتم بالعربية وعنده خلفيه عنها .. المشكلة الاولى : الموتور عندى مخنوق يعنى العربية اخرها 110 وتحس ان العربيه مش قادرة تجيب اكتر وصوت الموتور بيعلى والميكانيكى قالى انها محتاجة طقم دبرياج كامل فهل دا صحيح وياترى يعمل كام ؟؟؟
المشكلة التانية : دواسة البنزين تقيلة وبردو الميكانيكى قالى ان جراب الاكسلتير عايز يتغير ولفيت عليه مش لاقيه اعمل ايه ؟؟ .. اسف على الاطالة

المشاركة الأصلية كتبت بواسطة pro_samir

عليكم السلام

اهلا بيك أخ محمود معليش علي التأخير في الرد

عجبني كلمة "أصالة الياباني" دايما بقول كده عليها :)) .. الموديلات الجديده متحسش فيها بالموضوع ده خالص

الزيت انا بستعمل شيل اصفر وبغيره متوسط 3500 كم وساعات 4000 حسب ، وما شاء الله زي الفل

طقم الدبرياج فعلا بيخلي صوت العربيه عالي والسحب ضعيف وده بيكون علي كل الغيارات مش الرابع فقط

في حركه قريتها هنا في المنتدي لو عايز تتأكد من طقم الدبرياج ، وانت واقف شد اليد وعشق رابع وسيب الدبرياج من غير ما تسند بنزين ، لو العربيه بطلت بسلاسه يبقي مفيش مشكله لكن لو رجرجت وحسيت انها بتتنطط كده يبقي الدبرياج وحش .. انا مجربتهاش علي دبرياج بايظ بس شوف هتعمل ايه معاك

بالنسبه لجراب الاكسراتير اعتقد ممكن تشوف بتاع الكورولا ، لو تقدر تفكه وتاخده تشتري زيه هتوفر علي نفسك كتير خصوصا ان ناس بيكون عندهم حاجتها وميعرفوهاش علشان مشتركه مع كورولا

ولو تكرمت يا ريت تقولنا اسعار واماكن شراء كل الحاجات اللي غيرتها ، خصوصا الأولسيهات علشان كان حد بيسأل عليها من يومين في الجروب

وعليكم السلام ا/ سمير .. متشكر جدا على الرد انا كنت متابع بشدة وانت افدتنى
بالنسبة لموضوع الزيت انا مكنت اعرف ان الموتور خفيف شوية وبياكل زيت لما استخدمت الموبيل .. ولكن الحمد لله لحقت الموضوع وبقيت احط زيت اماراتى وعلبة زيت شمبر وبمشى عليه 2000 والموتور تمام .. اما بالنسبة لموضوع الدبرياج هبقى اجربه لما اصلح سلك فرامل اليد عشان اتقطع ودايخ عليه .. بالنسبة للحاجات اللى غيرتها كالتالى :
تيل امامى 75 كورى من السرساوى.
تيل خلفى 145 من واحد فى التوفيقية ناسى اسمه بس اكتشفت ان اسعاره عالية فمبقتش اتعامل معاه تانى .
بلى للعجل الخلفى واولسيهات 50ج تقريبا من مجمع على الدين فى اكتوبر عندنا .
سير كاتينا 75 يابانى وطقم جوانات 120 كورى تقريبا من واحد اسمه السنى عند محكمة امبابة .
طلمبة مياه 120 يابانى من السنى بردو.

عندى استفسار بخصوص الابواب الامامية هل صوتها عالى فى كل العربيات استارليت ولا الجلد محتاج يتغير ولو حبيت اغيره الاقيه جديد ولا من التوفيقية بالمتر .. خصوصا وان الابواب الخلفية بتقفل بسلاسة وصوتها هادى ..

المشاركة الأصلية كتبت بواسطة pro_samir

شكرا يا باشا

الابواب عندي برضو الأماميه مش حلوه والخلفي تمام وقفلته مكتومه

بس ده بسبب ان الأمامي بيستهلكو أكتر .. لو جربت تهز الباب وهو مفتوح فوق وتحت هتلاقي البنوز مبوشه ده اللي بيخليه مش مظبوط ، المفروض البنوز دي بتتغير هتلاقي قفله الباب اتغيرت خالص .. من ساعة ما جبت العربيه عايز اعملهم بس مصادفتش صنايعي ابواب كويس

والجلد اكيد محتاج يتغير كفايه عليه 20 سنه سواء الابواب او مجاري الازاز بس يا ريت يكون في انواع نضيفه

لا شكر على واجب
بالنسبة للبنوز دى انا فاكر ان كان واحد بيعملى الباب وقالى عشان تزبط الباب لازم نفكه ونوديه للخراط يعمل البنوز .. دلوقتى السؤال هل اعمل كدا ؟؟ ولا هلاقى منها جديد او استيراد ؟؟ .. وبالنسبة للجلد اجيبه منين ؟؟؟ وهل هلاقى منه جديد ؟؟؟ وجزاكم الله خيرا

السلام عليكم
انا عندى كام مشكلة كده وموش عارف ابدء احل منين

1- اول لما بدور العربية الصبح اول مارش بحس انه ولا حاجة يعنى العربية بتلقط وتفصل بسرعة جدا - تانى تدويرة لازم ازود بنزين وانا بدور وبتدور عادى لكن لو شلت رجلى من على البنزين تبطل - لازم افضل ساند رجلى على البنزين شوية عشان ماتبطلش بعد شويى اشيل رجلى تفضل شغالة عادى وتسخن عادى جدا

2- على السلانسيه او لما بعدى مطبات بحس بخبط من قدام ناحية الشمال لكن لما امشى عادى واجرى مابيبقاش فيه حاجة ( ده عفشة ولا حاجة تانية)
3- انا بسافر بيها دمنهور كتير من الاسكندرية لما ببقى جايب 110 مثلا ودوس فرامل عشان مطبات الزراعى بتبطل بس بتبطل من غير اى تنتيش بحس ان العربية اتطفت كده مع ان الكهربا شغالة الودينامو كشفت عليه تمام وساعات بتبطل معايا برده وان اماشى جو البلد اوقات لما بشل رجلى من على البنزين تبطل ولازم ادوسلها بنزين كام مرة ورة بعض ترجع تمشى عادى ( ممكن الكرابرتير عايز يتظبط ولا ايه ولا ايه)
4- وبعدين هيا سحبها كويس بي ماعدتش بيها ال 120 قبل كده بحس ان اخرها كده ؟
5- وانا برخص عرفت ان العربية مغيرة موتور لو عايز اعرف تاريخ انتاجه اعرفه منين ؟

العربية ستارليت 92 برغم المشاكل دى بس لما بتقى ماشية بحس ان الموتور اسد بسم الله ماشاء الله (اصالة اليابانى )

مستنى الرد من الراجل اللى كله واجب ومابيتاخرش عن سؤال حد برو سمير