الموضوع: تويوتا _ستارليت_ ..... (أراء وتقييمات + صيانات + أسعار قطع غيار)

العربيه معايا من أول شهر 6-2009 وفي الفتره دي عامل بيها 45000 كم

باختصار عربيه ممتازه ومش معقده ومفيهاش مشاكل و 1000 سي سي عليها حلو جدا وأداءه ممتاز وانا شايفه احسن من ال1600 بتاع الادا التسعينات اللي بتتكلم فيها وعن تجارب كتير في الشد وكده

اول ماشتريتها انا كنت قلقان جدا من موضوع 1000 سي سي وكمان عجوز من التسعينات لأن اصغر عربيه ركبتها في حياتي كانت لانوس 1500 لكن راضي عن أداءه وجربتها في سفر لنويبع وما أدراك بصعوبه الطريق بس ما شاء الله ، ممكن تشوف الموضوع في قسم الرحلات تحت المنتدي العام

بالنسبه لقطع الغيار متقلقش منها خالص قطع غيار الموتور معظمها مشتركه مع كورولا الملكه لأن العربيه كلها اصلا تقدر تعتبرها كورولا بس اصغر شويه واسعارها عادي مش عاليه وهتلاقيها عند أي حد بتاع تويوتا ، يا راجل انا اصلا من شبين الكوم ومع ذلك كل حاجه موجوده عند بتوع التويوتا حتي طقم العمره والجوانات وكله كله

قطع الغيار الخارجيه مش بتنزل جديده لكن كلها موجوده استيراد واسعارها معقوله برضو مش عاليه وانت اصلا كل فين وفين لما هتحتاج حاجه منها يعني انا لحد الأن مشتريتش اي قطع غيار خارجيه غير جوز فوانيس خلفي غيرتهم أول ماشتريت العربيه وكان سعرهم 350 جنيه للفانوسين استيراد بحالة الجديد

بالنسبه للعفشه برضو كله موجود ويمكن دي اللي تعتبر غاليه نسبيا لكن مش قوي وده لاشتراكها مع موديلات تانيه ، علي سبيل المثال قاعده الموتور الخلفيه كنت شاريها استيراد كامله بالحديد بتاعها ب150 جنيه و هي هي بتاع تويوتا تريسل ... المساعدين كنت عايز اغير الخلفي واشتريتهم جداد ب550 جنيه هم هم بتوع الكورولا الخلفي بس لما فكيت عندي طلع المساعدين حالتها معقوله مغيرتهمش ولكن اكتشفت ان بتوع الكرولا الخلفي هم هم بتوع الاستارليت الأمامي ! السوست الخلفيه كنت جايب سوست اكبر شويه نفس المقاس بالظبط لكن فيها لفه واحده زياده طلعو زي سوست ايه بقي ؟ هي هي سوست الانسر والأتنين ب80 جنيه

نفسي والله اجمع اسعار قطع الغيار بس المشكله اني بنسي بطريقه وحشه

باختصار من وجهة نظري هي افضل عربيه في فئتها السعريه وعايز اقولك اني فكرت في كل اللي انت ممكن تكون فكرت فيه والحمد لله ان ربنا هداني ليها مع انها مكانتش في حساباتي و لاقيتها قدراً ونفس اليوم اللي اشتريتها فيه كنت متفرج علي اكسيل وابيزا (وعربيات تانيه كتير ومختلفه قبلهم)