طبعاً غالباً هي عايزه تترصص لأن مش ممكن يكون في حاجه في عفشة العربية .
هو الأحسن طبعاً إن حضرتك توديها التوكيل , لانها في الضمان و المفروض إنهم يصلحوا أي حاجة حضرتك تشتكي منها ( طالما مش عيب إستخدام ) , لكن لو يعني مش عايز تروح مشوار التوكيل , عندك واحد ممتاز في ترصيص العجل : عارف شارع مصطفي النحاس , في نصه ح تلاقي جامع كبير و جنبه خزان ميه كبير أوي , أدامه علي الناحية التانية في محل إسمه Pirelli ( ماركة الكاوتش المشهورة ) , اليافطة لونها أصفر . المحل ده بيرصص كويس جداً . و فيه حاجه ممتازة إنه بيفك الكاوتش من الجنط عن طريق جهاز عنده مش بالشاكوش زي معظم الورش ( طبعاً لازم الجنط بيطوله خبطه أو إتنين بالشاكوش من الصنايعي اللي بيفك و ده بيبوظ شفة الجنط و يعوجه ) لكن الجهاز اللي المحل ده بيستخدمه , بيفك و يركب الكاوتش في الجنط بمنتهي السهولة و من غير أذي للجنط . و بعد ما بيصلح الكاوتش بيرصصه من غير حتي ما تتطب منه .
بس للأمانه أنا ماعرفش ينفع تروحله ترصص و خلاص و للا لأ :) أصل انا لما إتعاملت معاه كنت بغير كاوتش العربية , ف كان بيركب الكاوتش الجديد و يرصصه علي طول . و شفته بيصلح كاوتش عربية تانية , لكن إنك تروح ترصص ( من غير ما تكون شاري منه ) مش عارف بيوافق و للا لأ , بس أعتقد مافيهاش حاجة , كله شغل .
المفضلات