والله حضرتك عملت الصح وزيادةشكرا يا باشا هنعمل ايه بس
حرام لما كل شوية الاقي بنتي راجعة مضروبة مرة جسمها معلم من الضرب ومرة وشها احمر من الخوف والكارثة بجيبهم مرة من الباص على غير العادة لقيتهم نازلين الاتنين بيصرخوا وعياط والمشرف بتاع الباص بيقول مش هركبهم تانى قلت عملوا نصيبة قلت له خلاص هشوف فيه ايه الاول وكلمته بيني وبينه ان البنت الكبيرة عندها كهربا في المخ (الحمد لله اتضح بعد كدة انها سليمة وانه كان غباء دكاترة)
المهم واحنا راجعين على البيت احاول افهم منهم مش عارف من البكاء لغاية ما فهمت منهم الاقي فيه بنت قومت واحدة منهم من على الكرسي علشان تقعد زميلها جنبها تخيل
والبنت وبنتي ضربوا بعض والمشرف جه مع البنت التانية وقوم بنتي وبنتي من القهر حاولت تضربها والمشرف منعها والبنت الصغيرة بتعيط علشان اختها
اخدت البنتين في ايدي وعلى المدرسة وكلمت المسؤل عن الباصات قلت له اياك تتنقل انا جاي لك
رجت المدرسة والشرر بيطلع من عيني ودخلت فيهم شمال على طول وانا هخرب بيتكم وهطلع من هنا على الوزير (كان يسري الجندي وكان راجل محترم جدا عكس احمد زكي بدر) طيب اهدا لا مهداش المدير بعتت مدرسة جابت للبنت مية واهدي يا حبيبتي ايه اللى حصل البنت قالت اللى حصل وحقكم علينا ومش هتتكرر
طبعا رفضت واصريت على معاقبة المشرف والسواق وان البنت دي تتعاقب لان الباص مش بتاع اللى خلفوها ولا سينما علشان تقوم بنتي وتحجز المكان لزميلها وكان بها وفعلا بعدها احترموا نفسهم وبقوا لا مؤاخذة زي الجزم
وواحنا راجعين مش هقولك البنات كانوا مبسوطين ازاي لانهم حاسوا ان ابوهم مش هايسيب حد يأذيهم من غير ما يجيب لهم حقهم
وواحنا راجعين عدت عليهم الدرس بتاعنا من تانى ان اي حد يضربكم اضربوه عشر اضعاف ما ضربكم وانا المسؤل ومتخافوش
انا ضد ان الطفل يبقي عدواني
لكن ضد انه يبقي مستسلم وخاضع كل من هب ودب يأذيه معنويا او جسديا
وفي زماننا لازم الطفل يعرف ياخد حقه من وهو صغير علشان يعرف ياخد حقه وهو كبير
البنت التالتة بسم الله ما شاء الله مش مستنية اعلمها حاجة هي معلمانا كلنا الادب ومش بتسيب حقها وبتضرب اي حد في البيت لو اخد اي حاجة بتاعتها
وربنا يخليلك بناتك وتشوفهم عرايس
المفضلات