الموضوع: الحمد الله اشتريت العربيه بس فى بعض الاستفسارات

الحمد الله انا اخدت عربيه اخو المدام ( 128 موديل 84 ) العربيه حالتها العامه كويسه بس فى بعض الملاحظات مش عارف اعمل فيها ايه بس فى الاول لازم تكونوا عارفين اني مش بفهم اي حاجه فى موضوع العربيات ده لاني لسه جديد جدا فى السواقه.
الملاحظات كالاتي :
1- العربيه لما بدوس على الفرامل وانا علي الثالث او الرابع بتحدف يمين ، فهل ده الطبيعي ولا دي مشكله عندي.
2- المفروض اضبط ضغط الهوا فى العجل على كام.
3- العربيه بتنقط زيت على الارض لما بتكون راكنه ( يعني لما بحركها الصبح بلاقي بقعه زيت صغيره كده مكانها)
4- العربيه معايا من يوم الاربعاء اللي فات وكانت زي الفل بس النهارده الصبح وانا نازل رايح الشغل وكلي امل وفرحه اني هاترحم من عذاب المواصلات العربيه ما رضيتش تدور ( هو اخو المدام كان قايلي لما ماترداش تدور الصبح كارك بنزين وانت ممور وبعد كده دور هاتدور) انا حاولت اعمل كده بس مافيش فايده بعد كده خليت حد يزق العربيه وانا احاول ادو برضه مادرتش وفى الاخر سبتهها ورحت الشغل مواصلات تاني
المهم ده ممكن يكون عيب ايه ( هو مش عيب المارش علشان انا سامع صوته ) والاهم احل المشكله دي ازاي.

المشاركة الأصلية كتبت بواسطة semsem_uno

بص هو الصح انك اول ما تجيب عربية استعمال قبل اي حاجة تطلع علي محطة البنزين و تغير زيت الموتور بالفلتر و زيت الفتيس و تطلع تجيب بوجيهات جديدة و سير دينامو و سير كاتينة و تغير ابلاتين و كوندنسر و فلتر هواء

1- كده يبقي في عجلة بتمسك و التانية لأ و ممكن يكون عيب في ماستر الفرامل
2- مش متأكد بصراحة
3- الزيت ده ممكن يكون من كرتيرة الزيت ( صندوق اسود كده بيبقي فيه زيت الموتور ) و لازم العربية تترفع لأنه ممكن يكون جي من مكان تاني بردو
4- ليه اكتر من سب (وش الأسبراتبر مشروخ او سلوك البوجيهات تعبانة او البوبينة بتاعة العربية تعبانة او الأبلاتين و الكوندنسر محروقين و ده ناتج انهم متغيروش بقالهم فترة)

يا باشا الف شكر على رد حضرتك
انا عارف اني المفروض اغير الحاجات دي بس زي ما انا قلت لك دي عربيه اخو المدام والمفروض ان هو مغير كل الكلام قريب على العموم انا هاساله غير الحاجات دي امتي.
هو السؤال امهم دلوقتي انا ازاي اخلي العربيه تدور ولو العربيه محتاجه حد يشوفها علشان تدور يكون الحد ده كهربائي ولا ميكانيكي والأهم انا ممكن الاقي كهربائي او ميكانيكي فى الشيخ زايد.