ثلاث مشكلات و ارجو المساعدة

**ahmedjumpo** · 30-08-2010 07:27 PM

السلام عليكم و رحمة الله و بركاته
كل عام و كل الاخوة بخير , اخوانى انا عندى تلات مشكلات :
الاولى ان المياه بتنقص بطريقة جامدة جدا حيث انى زودت 4 لتر فى ظرف اسبوعين و فى خلال الاسبوعين دول لم استخدم العربية الا تلات مرات و قد بحثت عن اى تسريب من الخراطيم و نظرت اسفل العربية و ملقاتش اى تسريب فماذا يكون السبب
ثانيا خلال ركنة العربية فان البنزين بينقص و بشم ريحة بنزين فى صالون العربية و برده بحثت عن اى تسريب سواء اسفل الكنبة عند التانك او من اسفل العربية و ملقاتش برده تسريب
ثالثا فى الصباح او لو العربية باردة و اجى ادور المارش مابيدورش رغم انى من اسبوعين عملت صيانة للمارش و كان كويس و اللى بيحصل و كانى مفيش كهرباء واصلة للمارش و ممكن اعد احاول 7 لـ 10 مرات علشان المارش يدور و بلاحظ فى بداية الدوارة فى الصباح بس دخنة بيضة خفيفة و عايز اعرف سببها
مع العلم ان العربية دايو ليجانزا موديل 99 عاملة 180 الف كم و عاملة كل الصيانة المعتادة من تغيير زيوت و فلاتر و السحب كويس
ارجو مساعدة الاخوة الكرام

**محمد الشامي** · 30-08-2010 07:53 PM

المشاركة الأصلية كتبت بواسطة ahmedjumpo

الاولى ان المياه بتنقص بطريقة جامدة جدا

اكبس دوره التبريد وكل شئ هيبان , ممكن يكون الريدياتير نفسه بينشع والمواسير فيها تأاكل

المشاركة الأصلية كتبت بواسطة ahmedjumpo

ثانيا خلال ركنة العربية فان البنزين بينقص و بشم ريحة بنزين فى صالون العربية و برده بحثت عن اى تسريب سواء اسفل الكنبة عند التانك او من اسفل العربية و ملقاتش برده تسريب

اكيد في تسريب في مكان ما , و في الغالب مش هتلاقي حاجه تحت العربيه لان البنزين سريع التطاير , دي محتاجه ميكانيكي فاهم يبصلك على كل ما له علاقه بالبنزين

المشاركة الأصلية كتبت بواسطة ahmedjumpo

ثالثا فى الصباح او لو العربية باردة و اجى ادور المارش مابيدورش رغم انى من اسبوعين عملت صيانة للمارش و كان كويس و اللى بيحصل و كانى مفيش كهرباء واصلة للمارش و ممكن اعد احاول 7 لـ 10 مرات علشان المارش يدور و

اعتقد انك لازم ترجع لنفس اللي عمل صيانه للمارش وتخليه يكمل شغله صح ويشوف ايه الحكايه

المشاركة الأصلية كتبت بواسطة ahmedjumpo

بلاحظ فى بداية الدوارة فى الصباح بس دخنة بيضة خفيفة و عايز اعرف سببها

لو الدخنه مصحوبه برائحه بنزين نئ الى حد ما , فـ بنسبه كبيره هتكون البوجيهات محتاجه تتغير
لو دخان ابيض مستمر حتى لو بعد تغيير البوجيهات فغالبا هيكون كاوتش صباب

**tarek_2005** · 30-08-2010 10:57 PM

المشاركة الأصلية كتبت بواسطة محمد الشامي

اعتقد انك لازم ترجع لنفس اللي عمل صيانه للمارش وتخليه يكمل شغله صح ويشوف ايه الحكايه

اعتقد دي مشكلة بطارية وليس مارش

**ahmedjumpo** · 31-08-2010 02:00 AM

فى الاول اشكر كل الاخوة على محاولة مساعدتى و ربنا يديم المحبة بين الاخوة الاعضاء
استاذ محمد الشامى بالنسبة لو عملت كبس لدورة التبريد هل هيوضح اماكن التسريب و مش المفروض لو فيه نشع يبان لانى شغلت العربية و هى واقفة مكانها فترة و بصيت تحت العربية مفيش اى تسريب
بالنسبة للمارش فانا لسه عامل الصيانة عند محمد السيد لان كان فى تعتيلة و اتصلح لكن بعدها لاحظت ان المارش بيقطع كهربا و العربية باردة بس و باذن الله هروح لمحمد السيد يشوف ايه المشكلة
بالنسبة للدخنة فهى فى بداية تشغيل العربية خصوصا بعد ركنة العربية لفترة كذا يوم و الدخنة مش مستمرة يدوب دقيقتين و تروح و البوجيهات مغيرهم من شهر و استخدامى للعربية مش كتير و هل ممكن يكون فى مشكلة فى الرشاشات

المشاركة الأصلية كتبت بواسطة tarek_2005

اعتقد دي مشكلة بطارية وليس مارش

اخبارك ايه يا طارق باشا وكل سنة وانت طيب و اخبار اللانوس معاك ايه , مش عارف ايه اللى خلاك تقول انها بطارية رغم انى كاشف على البطارية عند محمد السيد و زى ما انت عارف انى غيرت الدينامو كمان و قيسنا الشحن وكان كويس والموضوع بتاع المارش بيحصل و العربية باردة بس لكن لو سخنة بدور علطول
الاستاذ اشرف انا فعلا عملت زى ما انت قلت و لقيت الزيت كويس مش مطحن

**محمد الشامي** · 31-08-2010 02:14 AM

المشاركة الأصلية كتبت بواسطة ahmedjumpo

لو عملت كبس لدورة التبريد هل هيوضح اماكن التسريب و مش المفروض لو فيه نشع يبان لانى شغلت العربية و هى واقفة مكانها فترة و بصيت تحت العربية مفيش اى تسريب

كبس دوره التبريد هيكشفلك اي عيوب في دوره التبريد , سواء نشع او تسريب او ثقوب في الردياتير

النشع اللي بيحصل من مواسير الريدياتير بيكون بسيط لكن تأثيره كبير , و في الغالب النشع ده بيزيد مع تشغيل الموتور وده نتيجه ضغط الهواء اللي بيحصل جوا الدوره , وبالتالى حراره الموتور وجسم الريدياتير هتخلي النشع ده يتبخر اول بأول , وهيكون من الصعب انك تشوف النشع بشكل مباشر

وفي احتمال تاني وهو الاهم والاصعب في الكشف , احتمال كبير تكون طبات الميا اللي في الموتور حصلها تأاكل وبتسرب الميا من ضهر الموتور او من ادام , والصعوبه ف ان مكان الطبات الخلفيه صعب انك تشوفه بسهوله , والطبات الاماميه في الغالب بتكون مختفيه تحت صاجه فرن الشكمان (ان وجد)

يعني كبس دوره التبريد هيوفر عليك عناء البحث والحيره فعلا

المشاركة الأصلية كتبت بواسطة ahmedjumpo

بالنسبة للمارش فانا لسه عامل الصيانة عند محمد السيد لان كان فى تعتيلة و اتصلح لكن بعدها لاحظت ان المارش بيقطع كهربا و العربية باردة بس و باذن الله هروح لمحمد السيد يشوف ايه المشكلة

طالما محمد السيد هو اللي كان شغال فيها يبقا اطمن , الراجل ده فاهم ومفيش خوف منه , حضرتك بس ارجعله وفهمه المشكله حصلت ازاي وامتى وان شاء الله تكون الحكايه بسيطه خالص

المشاركة الأصلية كتبت بواسطة ahmedjumpo

بالنسبة للدخنة فهى فى بداية تشغيل العربية خصوصا بعد ركنة العربية لفترة كذا يوم و الدخنة مش مستمرة يدوب دقيقتين و تروح و البوجيهات مغيرهم من شهر و استخدامى للعربية مش كتير و هل ممكن يكون فى مشكلة فى الرشاشات

اعتقد بنسبه كبيره والله اعلم انه فعلا طقم كاوتش الصبابات محتاج يتغير , لان الدخنه البيضه المستمره لمده دقيقه او اتنين بعد بدايه الدواره بتكون بسبب البوجيهات او كاوتش الصبابات , و حضرتك قولت ان البوجيهات متغيره , اذا ده معناه ان كاوتش الصبابات هو السبب

عيب الرشاشات حسب كلام محمد ممدوح يعمل دخنه سوداء , بالإضافه لتأخير في الدواره بشكل عام

وبالمره ممكن تحط العربيه على الاسكانر عند محمد السيد عشان تطمئن على الرشاشات , و على الحساسات بشكل عام

**ahmedjumpo** · 31-08-2010 02:34 AM

استاذ محمد هل فى طريقة لمعرفة حالة كاوتش الصبابات و كيف تحدث الدخنة لو الكاوتش تالف و اليس المفترض طالما الكاوتش تالف ان تستمر الدخنة باقى اليوم

**محمد الشامي** · 31-08-2010 02:42 AM

المشاركة الأصلية كتبت بواسطة ahmedjumpo

استاذ محمد هل فى طريقة لمعرفة حالة كاوتش الصبابات و كيف تحدث الدخنة لو الكاوتش تالف و اليس المفترض طالما الكاوتش تالف ان تستمر الدخنة باقى اليوم

والله يا استاذي في بعض تفاصيل فنيه انا مش هقدر افيدك فيها
لكن ان شاء الله حضرتك تستفيد من المواضيع دي

http://www.nilemotors.net/Nile/147976-a.html
http://www.nilemotors.net/Nile/176280-a.html
http://www.nilemotors.net/Nile/115702-a.html

**ahmedjumpo** · 03-09-2010 05:06 PM

دلوقتى انا عرفت سبب نقص المياه و طلع حاجة غريبة لانى بمتابعة العربية و طول ما هى دايرة المياه مش بتنقص و لكن لما بتبطل بلاقى المياة اسفل السيارة ففتحت الكبوت و شغلت العربية و بعد فترة بطلتها فوجدت المياه مندفعة من ناحية غطاء القربة و زى ما يكون منفس و التنفيس ده بيحصل وقت تبطيل العربية و الحمد لله غيرت غطاء القربة بواحد بتاع اوبل جديد و بقت كويسة
فى استفسار هل ممكن يكون استهلاك البنزين و العربية مركونة يكون له سبب قريب من موضوع المياه بمعنى ان لما ببطل العربية مثلا يكون راجع البنزين فيه مشكلة مثلا او ممكن لما بشغل العربية فى الصباح تكون كمية البنزين التى يتم ضخها تكون عالية جدا و بالتالى بيتهدر بدون فايدة

**محمد الشامي** · 03-09-2010 05:44 PM

مبروك اولا اكتشاف سبب نقص الميا اللي كان عند حضرتك , لكن الاهم من اكتشاف السبب هو متابعه معدل نقص الميا بعد تغيير غطا القربه

وبالنسبه لإستهلاك البنزين , فأكيد الوضع مختلف عن سبب نقص الميا , الأفضل انك تروح لميكانيكي فاهم كويس في الدايو وتخليه يبصلك على التانك والخراطيم وكل ما يخص دوره البنزين , وان شاء الله تكتشف السبب ويكون حاجه بسيطه

الموضوع: ثلاث مشكلات و ارجو المساعدة

LinkBack

أدوات الموضوع

عرض

-

-

-

-

-

المواضيع المتشابهه

ارجو ارجو ارجو المساعدة فى هذا الاختيار وذالك على سبيل الحصر بين هذين السيارتين

ارجو المساعدة عندى كل ده مفيش bass خالص ارجو الحل

ارجو المساعدة عندى كل ده مفيش bass خالص ارجو الحل

ثلاث سيارات صغيرة من إنفينيتي في ثلاث سنوات

ارجو المساعدة ارجوا المساعدة

الكلمات الدلالية لهذا الموضوع

المفضلات

المفضلات

ضوابط المشاركة